ކުރިއަށް އޮތް ރޯދަމަހު ގދ. ތިނަދޫގައި ކުޅިވަރުކުޅުމާއި މުނިފޫހިފިލުވުމުގެ އެއްވެސް ހަރަކާތެއް ކުރިއަށް ގެންދާނަމަ ފިޔަވަޅު އަޅަން ކަމަށް އެރަށު ކައުންސިލުން ނިންމައިފި އެވެ.
ތިނަދޫ ކައުންސިލުން ކުރި އިއުލާނެއްގައި ބުނީ، ދުވާލު ވަގުތުގައި އަދި ހާއްސަކޮށް ރޭގަނޑު ވަގުތު ކުޅިވަރު ހަރަކާތްތަކާއި މުނިފޫހިފިލުވުމުގެ ހަރަކާތްތައް އެއްވެސް މިންވަރަކަށް އިންތިޒާމްކޮށް ނުހިންގުމަށް އަންގާފައި ވެއެވެ.
ކައުންސިލުން ބުނީ މި ނިންމުން ނިންމާފައި ވަނީ ރޯދަމަހު އަޅުކަންތައް ފުރިހަމައަށް ކުރުމަށާއި، ރައްޔިތުންގެ މެދުގައި އިސްލާމީ ރިވެތި އާދަތައް އަށަގެންނެވުމަށްޓަކާ ކަމަށެވެ.
މި ކަންކަން ކުރިއަށް ގެންދިއުމަށްޓަކައި އެއްބާރުލުން ނުދޭ އަދި ގަސްތުގައި މިފަދަ އުސޫލުތަކާ ހިލާފަށް އަމަލުތައް ބަހައްޓާ ފަރާތްތަކަށް އެއްބާާރުލުން ނުދޭނެ ކަމަށާއި، އަދި މިކަންކަމާ ހިލާފަށް އަމަލުތައް ބަހައްޓާ މީހުންނާ މެދު ފިޔަވަޅު އަޅަން ޖެހޭ ހާލަތުގައި ކައުންސިލުން އެފަދަ ފިޔަވަޅު ވެސް އަޅާނެ ކަމަށް ބުނެފައި ވެއެވެ.
އެހެން ނަމަވެސް ކަސްރަތާއި ސިއްހީ ބޭނުންތަކަށް ހަރަކާތްތެރިވާ ފަރާތްތަކަށް ހާއްސަކޮށް ކުޅިވަރު މައިދާންތަކާއި ޓްރެކް އާންމުކޮށް ހުޅުވާލާފައި ހުންނާނެ ކަމަށް އެ ކައުންސިލުން ކުރި އިއުލާނުގައި ބުނެފައި ވެއެވެ.
މީގެ ތެރެއިން ވެސް ކައުންސިލުގެ ބެލުމުގެ ދަށުގައިވާ ތަންތަން ހުޅުވާލެވޭނެ ވަގުތުތައް ފަހުން އިއުލާނުކުރާނެ ކަމަށް ބުނެފައި ވެއެވެ.
