މާލެ ސިޓީ ކައުންސިލާއި ފުލުހުންނާ ދެމެދު ހެދުނު ސްޕެޝަލް ކޮންސްޓެބިއުލަރީ ހިދުމަތް، ފުލުހުން ހުއްޓާލީ ސިޓީ ކައުންސިލާ މަޝްވަރާކުރުމެއް ނެތި ކުއްލިއަކަށް ކަމަށް މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
ކޮންސްޓެބިއުލަރީ ހިދުމަތް ހުއްޓިފައި އޮތުމުން "އަދަދު" އިން ސުވާލުކުރުމުން މުއިއްޒު ވިދާޅުވީ، މިދިޔަ ފެބްރުއަރީ މަހުގެ ފަހުކޮޅު ފުލުހުންގެ ފަރާތުން ކައުންސިލަށް ކުއްލި ސިޓީއެއްގައި ވަގުތުން އެ ހިދުމަތް ހުއްޓާލުމަށް އެންގީ ކަމަށެވެ.
"ސަބަބެއް ކަމަށް ބުނެފައި އިންނަނީ އެމީހުންނަށް ދޭން އޮތް ފައިސާ ނުދޭ ވާހަކަ، ދެން އަޅުގަނޑު ބަލައިލި އިރު މި މައްސަލައިގައި އަޅުގަނޑުމެންނާ އެއްވެސް ވަރަކަށް މީޓުކޮށް މަޝްވަރާކުރެވިފައެއް ނެތް، އަޅުގަނޑުމެން އެކަން ހައްލުކުރަން އިސްވެ ހުށަހަޅާފަވެސް އޮންނާނެ،" މޭޔަރު ވިދާޅުވި އެވެ.
މުއިއްޒު އިތުރަށް ވިދާޅުވީ ފައިސާ ދެއްކުމުގެ ކަންތައް ނުވެ އޮތީ، ސިޓީ ކައުންސިލުގެ އެކައުންޓުން ޕޭމަންޓު ހަދާއިރު ފުލުހުންނަކީ ސަރުކާރުގެ އިދާރާއެއް ކަމުން ވަކި އެކައުންޓެއް ހެދުމަށް އިދާރީ ގޮތުން ކުރަންޖެހޭ ކަމެއްގައި ލަސްވެގެން ކަމަށެވެ.
އަދި، އެކަން އެހެން މެދުވެރިކަން ފުލުހުންނަށް އެންގީވެސް ސިޓީ ކައުންސިލުން ކަމަށާއި އެ މަސައްކަތުގައި ގިނަ ދުވަސްތަކެއް ހޭދަވިކަމަށް އޭނާ ވިދާޅުވި އެވެ.
"ނަމަވެސް އެބޭފުޅުން މި ސިޓީ ފޮނުއްވުމުގެ ކުރިން އެބޭފުޅުން އެކަން ހަމަޖައްސައިވެސް ދިން ކުރިއަށްދާން، ހަމަވެސް ޖެހިފަ އިނީ، އެއްވެސް ވަރަކަށް ފައިސާ ނުލިބިގެން ލަސްވެގެން އަޅުގަނޑުމެންނަށް ސިޓީއެއްވެސް ނުފޮނުވާ އެބޭފުޅުންނެއް،" މުއިއްޒު ވިދާޅުވި އެވެ.
މީގެއިތުރުން، ސިޓީ ކައުންސިލުން ފުލުހުންގެ ސިޓީގެ ޖަވާބުގައި އެ ކަމާމެދު މަޝްވަރާކުރުމަށް އެދުނު ނަމަވެސް ޖަވާބެއް ނުލިބޭ ކަމަށާއި ވެވުނު އެއްބަސްވުން މިހާރު އުވާލެވިފައިވާ ކަމަށް މޭޔަރު ވިދާޅުވި އެވެ.
އުވާލެވުނު އެއްބަސްވުމުގެ ދަށުން މާލެ ސިޓީގައި ކޮންސްޓެބިއުލަރީންގެ ހިދުމަތް ފުލުހުން ދޭން ފެށީ މިދިޔަ އޯގަސްޓު މަހުގެ ތެރޭގަ އެވެ. އެގޮތުން މާލޭގެ މިސްކިތްތަކާއި މަގުތައް އަދި އާންމު ސަރަހައްދުތައް ބެލެހެއްޓުމަށް 40 ފުލުހަކު ކޮންސްޓެބިއުލަރީންގެ ގޮތުގައި ހަރަކާތްތެރިވި އެވެ.
