ރާއްޖެއިން ޔޫރަޕަށް އެކްސްޕޯޓްކުރާ މަހުން ނަގާ 24 ޕަސެންޓު ޑިއުޓީ ކަނޑާލުމަށް މަސައްކަތް ކޮށްދެއްވުމަށް ޖަރުމަނު ސަރުކާރުގެ ފަރާތުން ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު އެދިވަޑައިގެންފި އެވެ.
ޑިއުޓީ ކުޑަކޮށްދެއްވުމަށް ރައީސް މިކަމަށް އެދިވަޑައިގެންނެވީ ޖަރުމަނުގައި ހުންނަވާ ރާއްޖޭގެ އޮނަރަރީ ކޮންސުލް ޖެނެރަލް، ކްރިސްޓިއަން ފޮން ސްޓެޓެން އަދި އޮނަރަރީ ކޮންސުލް، އެންޑްރިއާސް ޕީޓާ ވިއްޓެއާއެކު ޖަރުމަނުގައި ބޭއްވި ބައްދަލުވުމެއްގަ އެވެ.
އޭގެ އިތުރުން، ރާއްޖޭގެ ފަތުރުވެރިކަން އިޝްތިހާރު ކުރުމަށާއި ޖަރުމަނާއި ރާއްޖެއާ ދެމެދު އޮތް ސިޔާސީ ގުޅުން އިތުރަށް ބަދަހި ކުރުމަށް ކުރަމުންދާ މަސައްކަތް ފާހަގަކުރައްވައި، ޖަރުމަނުގައި ހުންނަވާ ދިވެހިރާއްޖޭގެ އޮނަރަރީ ކޮންސުލް ޖެނެރަލްއާ، އޮނަރަރީ ކޮންސުލްއަށް ރައީސް ވަނީ ޝުކުރު އަދާކުރައްވާފަ އެވެ.
ރައީސް އާއި އޮނަރަރީ ކޮންސުލް ޖެެނެރަލް އަދި އޮނަރަރީ ކޮންސުލް ބޭއްވެވި އެބައްދަލުކުރެއްވުން ނިންމަވާލެއްވީ، ދެގައުމުގެ ރައްޔިތުންގެ ލާބައާ މަންފާއަށްޓަކައި އެކުގައި ގުޅިގެން މަސައްކަތް ކުރައްވާނެކަމުގެ ޔަގީންކަން ދެއްވަމުންނެވެ.
ދިވެހިރާއްޖެއާ ޖަރުމަނާ ދެމެދު ސިޔާސީ ގުޅުން ގާއިމް ކުރީ ޖުލައި 5، 1966 ގަ އެވެ.
