އައިޖީއެމްއެޗުގެ ލެބޯޓަރީ ހުންނަ ދަރުމަވަންތަ އިމާރާތުގެ ފެނުގެ ސިސްޓަމަށް ބުރޫއަރާ އެ ހޮސްޕިޓަލުންދޭ ލެބޯޓަރީގެ ހިދުމަތް ވަގުތީގޮތުން ހުއްޓިއްޖެ އެވެ.
އެ ހޮސްޕިޓަލުން ކުރި ޓުވީޓެއްގައި ބުނެފައިވަނީ ލެބޯޓަރީ ހުންނަ ދަރުމަވަންތަ އިމާރާތުގެ 9 ވަނަ ފަންގިފިލާގެ ފެނުގެ ސިސްޓަމަށް ޖެހުނު މައްސަލައެއްގެ ސަބަބުން މިވަގުތު ޓެސްޓުތައް ހެދުން ހުއްޓިފައިވާ ކަމަށެވެ. އަދި ހިދުމަތް ދެވެން ފެށުނުހާ އަވަހަކަށް އެކަން އިއުލާން ކުރާނެ ކަމަށް ވަނީ ބުނެފަ އެވެ.
މިކަމާ ގުޅިގެން އައިޖީއެމްއެޗުގެ މީޑިއާ އޮފިޝަލް ވިދާޅުވީ، ލެބޯޓަރީ އަކީ 24 ގަޑިއިރު ހިދުމަތްދޭ ތަނެއް ކަމަށާއި ޓެސްޓުތައް ހެދުމަށް އެޕޮއިންޓުމަންޓު ހަދަން ނުޖެހޭތީ، މައްސަލަ ޖެހުނު ހިސާބުން މިކަން އިއުލާނުކޮށްފައިވާނެ ކަމަށެވެ.
ލެބޯޓަރީ އިން ޓެސްޓުތައް ހެދުން މެދުކެނޑުނު ނަމަވެސް، އެމަޖެންސީ ހާލަތެއްގައި ޓެސްޓު ހެދުމުގެ ގާބިލުކަން އައިޖީއެމްއެޗުގައި ހުރިތޯ ސުވާލުކުރުމުން އެ އޮފިޝަލް ވިދާޅުވީ، މިވަގުތު އެޑްމިޓްކޮށްފައިވާ ފަރާތްތަކުގެ ޓެސްޓުތައް ހުޅުމާލެއަށް ފޮނުވައިގެން ހަދަން ނިންމާފައިވާ ކަމަށެވެ.
ރާއްޖޭގެ އެކި ހިސާބުތަކުގައި އެކި ފެންވަރުގެ ހޮސްޕިޓަލުތައް ގާއިމުކުރެވިފައި ހުރި ނަމަވެސް، އަދިވެސް ރާއްޖޭގެ އެންމެ ގިނަ ބަޔަކު ހިދުމަތް ހޯދާ ހޮސްޕިޓަލަކީ އައިޖީއެމްއެޗެވެ.
ނިމިދިޔަ ސަރުކާރުގައި އިމާރާތްކުރި ދަރުމަވަންތަ އިމާރާތާއެކު، އައިޖީއެމްއެޗުގެ ބައެއް ހިދުމަތްތައް އެތަނަށް ބަދަލުކުރެވި، އެ ހޮސްޕިޓަލަށް ކުރިން ދިމާވެފައިއޮތް ޖާގައިގެ ދަތިކަމަށް ކޮންމެވެސް ވަރެއްގެ ހައްލެއް ލިބުނެވެ.
