މާލޭގައި ހުއްދަނެތި މައުދަން ގުދަން ނުކުރަން އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ)އިން އެދިއްޖެ އެވެ.
އީޕީއޭއިން ކުރި އިއުލާނެއްގައި ބުނެފައި ވަނީ، މާލޭގައި މީހުން ދިރިއުޅޭ ސަރަހައްދުތަކުގައި އެލްމިނިއަމާއި ދަގަނޑާއި ލޮއި ފަދަ މައުދަންތައް ގުދަންކުރުމާއި ސާފުކުރުމާއި ރީސައިކަލްކުރުން ފަދަ މަސައްކަތްތައް ކުރުމުގެ ސަބަބުން އެސަރަހައްދުތަކުގައި ދިރިއުޅޭ މީހުންނަށް އުނދަގޫވާތީ އާއި، ސިއްހަތަށް ނުރައްކާވާތީ އެކަމުގެ ރިޕޯޓު އެ އެޖެންސީއަށް ލިބެމުންދާ ކަމަށެވެ.
ކުނި މެޖޭޖުކުރުމުގެ ގާނޫނުގައި ކުނި މެނޭޖްކުރުން، ރީސައިކަލްކުރުން ނުވަތަ އެހެން އެއްވެސްކަމެއް ކުރަންވާނީ ތަންފީޒީ އިދާރާއެއްގެ ހުއްދައާއެކުކަމަށް ބަޔާންކޮށްފައިވާކަން ފާހަގަކޮށް އީޕީއޭއިން ބުނެފައި ވަނީ، ހުއްދަނެތި އެގާނޫނާ ހިލާފުވުމަކީ އަދަބު ކަނޑައެޅިފައިވާ ކަމެއް ކަމަށެވެ.
އެއްވެސް ރައްކާތެރިކަމެއް ނެތި މައުދަންތައް ގުދަންކުރުމާއި ސާފުކުރުމާއި ރީސައިކަލް ކުރުމުގެ މަސައްކަތްތަކުގެ ސަބަބުން އެ ސަރަހައްދުގައި ދިރިއުޅޭ މީހުންނަށް އަދި އެސަރަހައްދުގައި ހިނގާބިގާވެ އުޅޭ މީހުންގެ ސިއްހަތަށް ބޮޑެތި ގެއްލުންތަކެއް ލިބިގެންދާނެކަމަށް އީޕީއޭއިން ބުނެފައިވެ އެވެ.
"އެފަދަ މަސައްކަތްތަކީ ކުނީގެ މިންވަރު މަދުކުރުމަށް ކުރެވޭ ކަމަކަށް ވީނަމަވެސް އެ މަސައްކަތްތައް ކުރަންވާނީ އަޅަންޖެހޭ ސަލާމަތީ ފިޔަވަޅުތައް އެޅުމާއެކު، ނަގަންޖެހޭ އެންމެހާ ހުއްދަތައް ނެގުމަށް ފަހުގައެވެ،" އީޕީއޭގެ ބަޔާނުގައި ބުނެފައިވެ އެވެ.
އަދި މިފަދަ މަސައްކަތްތައް ކުރާ ފަރާތްތަކުން މިއަދުން ފެށިގެން 30 ދުވަހުގެ މުއްދަތެއްގައި އެކަމަށް އެދި ހުށަހަޅަން ޖެހޭ ފޯމު ހުށަހެޅުމަށް އީޕީއޭއިން ވަނީ އެދިފަ އެވެ.
މީގެއިތުރުން، އެފަދަ މަސައްކަތްތައް ކުރުމުގައި އަޅަންޖެހޭ ސަލާމަތީ ފިޔަވަޅުތައް އެޅުމަށް ވެސް އެދިފައި ވެއެވެ.
