ނަފްސާނީގޮތުންނާއި ޖިސްމާނީ ގޮތުން އަންހެނުންނަށް ދިމާވާ މައްސަލަތަކަށް ހައްލެއް ހޯދަން ދިރާސާއެއް ކުރުމަށް ގޮވާލައި މަޖިލީހަށް ގަރާރެއް ހުށަހަޅައިފި އެވެ.
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ އީވާ އަބްދުﷲ ހުށަހެޅުއްވި ގަރާރުގައި ވަނީ ތަފާތު އެކި ދާއިރާތަކުގައި އަންހެނުން މަސައްކަތް ކުރަމުން ދާއިރު، ސިއްހީ ގޮތުން އަންހެނުންނަށް ގިނަ މައްސަލަތަކަކާ ކުރިމަތިލާން ޖެހޭ ކަން ފާހަގަކޮށްފަ އެވެ.
މިގޮތުން ދަރިމައިވުމުގެ މައްސަލަތަކާއި ހައިލުވުމުގައި ދިމާވާ މައްސަލަތަކާއި ވިހެއުމާއި ވިހެއުމަށްފަހު ވެސް ތަފާތު އެކި ގޮތްގޮތުން މައްސަލަތައް ދިމާވާއިރު، އެފަދަ ކަންކަން ގިނަ ފަހަރު ބިނާވެގެން ދަނީ ޖިސްމާނީގޮތުންނާއި ނަފްސާނީ ގޮތުން ދިމާވާ ކަންކަމުގެ ސަބަބުން ކަމަށްވާތީ އެވެ.
"ޖިސްމާނީ ގޮތުން އަންހެނުންގެ ސިއްހަތަށް ލިބޭ އަނިޔާތަކުގެ ތެރޭގައި އެންމެ ކަންބޮޑުވާ އެއް ކަމެއްގެ ގޮތުގައި ޖިންސީ ގޮތުން ދޭ އަނިޔާގެ ޝިކާރައަކަށްވުމާއި ގެވެށި އަނިޔާގެ ނުރައްކަލަށް އަންހެނުން ހުށަހެޅިގެން ދިއުން ހިމެނޭ،" ގަރާރުގައި ބުނެފައިވެ އެވެ.
ގަރާރުގައި އިތުރަށް ބުނެފައިވާ ގޮތުގައި އަންހެނުންގެ ސިއްހަތަށް ދިމާވާ މައްސަލަތައް ހައްލުވާން އޮތީ އަންހެނުންނާމެދު ކުރާ ތަފާތުކުރުންތަކާއި އަންހެނުންގެ ސިއްހީ ދުޅަހެޔޮކަމާއި އިޖުތިމާއި ހާލަތަށް ރިއާޔަތްކޮށް ފުޅާ ދާއިރާއެއްގައި ދިރާސާއެއް ކުރެވިގެންނެވެ.
އަދި މި ދިރާސާގެ އަލީގައި އަންހެނުންގެ ކަންކަމާ ގުޅޭ ސިޔާސަތުތައް ކަނޑައެޅުމަށް ގޮވާލާއިފައިވެ އެވެ.
