އެމްޑީޕީގެ ކުރީގެ ރައީސް ޑރ. މުހައްމަދު މުނައްވަރު ރިޔާސީ އިންތިހާބުގައި ވާދަކުރައްވަން ނިންމަވައިފި އެވެ.
ކުރީގެ ރައީސް މައުމޫނު އަބްދުލް ގައްޔޫމުގެ ވެރިކަމުގައި ބަންޑާރަ ނައިބުގެ މަގާމު އަދާކުރެއްވި، އައްޑޫ އަށް ނިސްބަތްވާ އުމުރުން 61 އަހަރުގެ ޑރ. މުނައްވަރު، ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ވާދަ ކުރައްވާކަން އިއުލާނު ކުރެއްވީ އެ މަނިކުފާނުގެ ފޭސްބުކްގައި ހިއްސާކުރެއްވި ޕޯސްޓާއެކު އެވެ.
އެ ނިންމެވުމާ ގުޅިގެން ޑރ. މުނައްވަރު "އަދަދު" އަށް މިއަދު ވިދާޅުވީ އިންތިހާބަށް ވާދަކުރައްވަނީ "ގައުމަށް ފެތުރިފައި އޮތް މާޔޫސްކަމުން" މިންޖުކުރުމުގެ ނިޔަތުގައި ކަމަށެވެ.
"މުޅިން ފެތުރިފައި މި އޮތީ ބޮޑު މާޔޫސް ކަމެއް. ގައުމު ގެއްލިގެން ދަނީ ކަމަށް. އަޅުގަނޑުމެންގެ މިނިވަންކަން ގެއްލިގެން ދަނީ ކަމަށް. އަޅުގަނޑުމެންގެ އިގުތިސޯދު މި އޮންނަނީ ނުރައްކަލެއްގެ ތެރޭގައި ކަމަށް،" 2008 ގައި ބޭއްވި އެމްޑީޕީގެ ފުރަތަމަ ރިޔާސީ ޕްރައިމަރީއަށް ފަހު، އެ ޕާޓީން ވަކިވަވަޑައިގެން ހުންނެވި މުނައްވަރު ވިދާޅުވި އެވެ.
ދައުލަތުގެ ދަރަނި ބޮޑުވެފައިވާއިރު، ހަރަދު ކުޑަކުރުމުގެ ބަދަލުގައި މިހާރު ވެސް ފެންނަމުންދަނީ "އިންތިހާބީ ބޭނުމަށް އިތުރަށް ގޯސްވަމުންދާ ތަން" ކަމަށް އޭނާ ވިދާޅުވި އެވެ.
ސަރުކާރު ހިންގުމުގައި ވެސް އިންސާފެއް ނެތް ކަމަށާއި ފެންނަމުން ދަނީ ރައްޓެހިންނާއި ގާތް މީހުންނަށް ތަފާތުކުރުން އޮވެ، އެކިއެކި ޑީލްތައް ހަދަމުންދާތަން ކަމަށް އޭނާ ފާހަގަ ކުރެއްވި އެވެ.
"އެ ހިސާބަށް ދިޔައީމަ ކޮންމެވެސް ބަޔަކު ދެތުވެ ނޫނެކޭ ބުނަންޖެހޭނެ ދެއްތޯ؟" ރިޔާސީ އިންތިހާބަށް ނުކުންނަވަން ނިންމެވި ސަބަބުތައް އޭނާ ކިޔައި ދެއްވި އެވެ.
މިއަހަރު ބޭއްވި އެމްޑީޕީގެ ރިޔާސީ ޕްރައިމަރީގައި އެ ޕާޓީގެ ރައީސް މުހައްމަދު ނަޝީދަށް ތާއިދު ކުރެއްވި ނަމަވެސް، ރިޔާސީ އިންތިހާބަށް ވާދަކުރެއްވުމަށްޓަކައި އެ މަނިކުފާނާ މަޝްވަރާ ނުކުރައްވާ ކަމަށް ޑރ. މުނައްވަރު ވިދާޅުވި އެވެ.
"މިކަމުގައި ނަޝީދާ މަޝްވަރާއެއް ނުކުރަން. ނަމަވެސް ގައުމަށް ހެޔޮއެދޭ، ގައުމާމެދު ފުންކޮށް ވިސްނާ، މި ދާ ގޮތް ކަމުނުދާ ގިނަ ބަޔެއްގެ ތާއިދު އެބަ އޮތް. އެފަދަ ބޭފުޅުންގެ ހިޔާލާއި ދެކެވުނު ވާހަކަތަކާއެކު މިހާ ހިސާބަށް މިކަން އައީ،" އޭނާ ވިދާޅުވި އެވެ.
ރިޔާސީ އިންތިހާބުގައި ސިޔާސީ ޕާޓީއަކާއެކު ކޯލިޝަން ހެދުމުގެ ވިސްނުމެއް ނެތް ކަމަށާއި، "މި ނުކުންނަނީ ދިވެހި ރައްޔިތުންނާއެކު ކޯލިޝަން ހަދަން" ކަމަށް ޑރ. މުނައްވަރު ވިދާޅުވި އެވެ.
