މަސައްކަތްތެރިންނަށް އިޖުތިމާއީ ރައްކާތެރިކަން ފޯރުކޮށްދިނުމުގެ އުސޫލުގެ ދަށުން ވާޒީފާ ގެއްލޭ ފަރާތްތަކަށް އަން-އެމްޕްލޯއިމަންޓް އިންޝުއަރަންސް ބެނެފިޓް ދިނުމަށް މަސައްކަތް ކުރައްވަމުން ގެންދަވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
މޯލްޑިވްސް ޓްރޭޑް ޔޫނިއަން (އެމްޓީޔޫ) ގެ ކޮންގްރެސްގައި ވާހަކަ ދައްކަވަމުން ރައީސް ސޯލިހު ވިދާޅުވީ ވަޒީފާ ގެއްލޭ ފަރާތްތަކަށް ދައުލަތުން އެހީތެރިކަން ފޯރުކޮށްދިނުމަށް ގަސްތުކުރައްވަނީ ހަރުދަނާ އުސޫލުތަކެއްގެ ތެރެއިން ބައްޓަން ކުރެވޭ ނިޒާމެއްގެ ދަށުން ކަމަށެވެ.
"އެކަމަށްޓަކައި ގާނޫނީ އޮނިގަނޑަށް ގެންނަންޖެހޭ ބަދަލުތަކާ ބެހޭގޮތުން، ބޭރުގެ ފަންނީ އެހީއާއެކު، ކަމާބެހޭ ގާނޫނުގެ ދެލިކޮޕީ އެކުލަވައިލުމުގެ މަސައްކަތް މިހާރު މި އަންނަނީ ކުރަމުން. އިރާދަކުރެއްވިއްޔާ، މާލަސްތަކެއްނުވެ އެ ބިލުވެސް ރައްޔިތުންގެ މަޖިލީހަށް އަޅުގަނޑުމެންނަށް ފޮނުވޭނެ،" ރައީސް ވިދާޅުވި އެވެ.
އޭގެ އިތުރުން، ވަޒީފާ ބޭނުންވާ ފަރާތްތަކަށް އެ ފުރުސަތުތައް ހޯދައިދިނުމަށް ސަރުކާރުން ގިނަ މަސައްކަތްތަކެއް ކުރަމުން އަންނަކަން ފާހަގަ ކުރައްވައި ރައީސް ވިދާޅުވީ މިދިޔަ ހަފުތާ ހުޅުވި ނޭޝަނަލް ޖޮބް ސެންޓަރަކީ އެ ކުރިއަށް އެޅި މުހިންމު ފިޔަވަޅެއް ކަމަށެވެ.
"ރާއްޖޭގެ އެހެން ސަރަޙައްދުތަކުގައިވެސް ޒަމާނީ ޖޮބް ސެންޓަރުތައް ގާއިމްކުރުމުގެ މަސައްކަތް އަޅުގަނޑުމެން މި އަންނަނީ ކުރަމުން،" ރައީސް ވިދާޅުވި އެވެ.
އެ ސެންޓަރުގެ އިތުރުން ހުޅުމާލެ އާއި ރ. ދުވާފަރުގައި ހުންނަ ޖޮބް ސެންޓަރާއި ރަށު ކައުންސިލްތަކުގައި ހުރި ޖޮބް ސެންޓަރު ޑެސްކުތަކުން ވެސް ވަޒީފާ ހޯދާ ފަރާތްތަކާއި ވަޒީފާ ދޭ ފަރާތްތައް ގުޅުވުމުގެ ހިދުމަތް ދެމުންދާކަން ރައީސް ފާހަގަކުރެއްވި އެވެ.
ރައީސްގެ ވާހަކަފުޅުގައި އިތުރަށް ވިދާޅުވީ މި ސަރުކާރުން ތައާރަފް ކުރި ފެށި މިނިމަމް ވޭޖުގެ ގާނޫނާއެކު 28،000 އަށްވުރެ ގިނަ މަސައްކަތްތެރިންގެ އާމްދަނީއަށް ހެޔޮ ބަދަލެއް ގެނެވުނު ކަމަށެވެ.
"އެނގިވަޑައިގަންނަވާނެ، މިނިމަމްވޭޖަކީ ގާނޫނުގައި ހިމެނިފައި އޮތަސް، އެކަން ތަންފީޒު ކުރުމަށް ކުރީގެ ސަރުކާރުތަކުން މާބޮޑު ސަމާލުކަމެއް ދީފައި އޮތް ކަމެއް ނޫން. ނަމަވެސް، އަޅުގަނޑު މި މަގާމާ ހަވާލުވެ، އެންމެ ފުރަތަމަ ހާސިލް ކުރަން ކަނޑައެޅި ކަންކަމުގެ ތެރޭގައި، މިނިމަމްވޭޖް ތަންފީޒު ކުރުން ހިމެނޭނެ،" ރައީސް ވިދާޅުވި އެވެ.
ނަމަވެސް މިނިމަމް ވޭޖު ފަދަ ބޮޑު މަސައްކަތެއްގައި ގިނަ ގޮންޖެހުންތައް ކުރިމަތިވި ކަމަށާއި އެކަންކަމުން އަރައިގަނެވުނީ މަސައްކަތްތެރިންނާއި ވަޒީފާ ދޭ ފަރާތްތަކާއެކު ކުރިއަށް ގެންދިޔަ ބިނާކުރެވެނިވި މަޝްވަރާތަކުގެ ސަބަބުން ކަމަށް ރައީސް ވިދާޅުވި އެވެ.
މިނިމަމް ވޭޖުގެ ސަބަބުން ހުރިހާ ދާއިރާއެއްގެ މަސައްކަތްތެރިންނަށް ވެސް މަންފާ ލިބެމުންދާ ކަމަށާއި އެގޮތުން ފަތުރުވެރިކަމުގެ ސިނާއަތުގައި މަސައްކަތްކުރާ 13،000 އަށްވުރެ ގިނަ މަސައްކަތްތެރިންނާއި ސަރުކާރުގައި ވަޒީފާ އަދާކުރާ 15،000 އަށްވުރެ ގިނަ މުވައްޒަފުންނަށް އެކަމުގެ ނަފާ ލިބެމުންދާ ކަން ރައީސް ފާހަގަކުރެއްވި އެވެ.
މިނިމަމް ވޭޖަށްފަހު ސަރުކާރުން މަސައްކަތްތެރިންގެ ހައްގުގައި ކުރި އެންމެ މުހިންމު އެއް ކަމަކީ ފަތުރުވެރިކަމުގެ ސިނާއަތުގައި މަސައްކަތްކުރާ މީހުންނަށް ސާވިސް ޗާޖުގެ ފައިދާ ހަމަހަމައަށް ލިބިދިނުމަށް ގާނޫނަށް ގެނައި ބަދަލުތައް ކަން ރައީސް ފާހަގަކުރެއްވި އެވެ.
