އެމްއާރުއެމަކީ ޕީޕީއެމްގެ އެތެރޭގެ ހިޔާލު ތަފާތުވުމެއްގެ ތެރެއިން އުފެދިގެން އައި ޕާޓީއެކެވެ. އެމްއާރުއެމް އުފެއްދެވުމުގައި އިސްކޮށް ތިއްބެވި ކުރީގެ ރައީސް މައުމޫން އަބްދުލްގައްޔޫމާއި އެމަނިކުފާނުގެ ދަރިކަލުން އަހުމަދު ފާރިސް މައުމޫނަކީ ޕީޕީއެމްގެ ދެ ފައުންޑަރުންނެވެ.
މައުމޫންގެ ކޮއްކޯފުޅު، އޭރުގެ ރައީސް އަބްދުﷲ ޔާމީނާ ދެމެދު އުފެދުނު ހިޔާލު ތަފާތުވުމުގެ ތެރެއިން މައުމޫން ޕީޕީއެމުން ވަކި ކުރީ އެވެ. އެ ފަހުން، ވެރިކަން ވައްޓާލަން އުޅުމުގެ ތުހުމަތުގައި މައުމޫނާއި ފާރިސް އަދި މައުމޫންގެ ދަރިކަލުން ޔުމްނާ މައުމޫންގެ ފިރިކަލުން ނަދީމް ވެސް ހައްޔަރު ކުރި އެވެ. އެ ހާލަތުން އަރައިގަތުމަށް، ރައީސް އިބްރާހީމް މުހައްމަދު ސޯލިހު ވެރިކަމަށް ގެންނަން ބައިއަތު ހިއްޕެވި އެވެ.
ފަސް އަހަރު ފަހުން އަނެއްކާ ވެސް ރިޔާސީ އިންތިހާބުގެ މުސޫމަށް ގައުމު ތައްޔާރުވެފައި އޮތް އިރު، އެމްއާރުއެމްގެ ރައީސަކަށް މިހާރު ހުންނެވި އަހުމަދު ފާރިސް މައުމޫން "އަދަދު" ނޫހަށް ދެއްވި އިންޓަވިއުގައި ވިދާޅުވީ އިންތިހާބާ ދިމާކޮށް އެ ޕާޓީގައި ތަފާތު އެކި ހިޔާލުތައް އެބަ ހުރި ކަމަށެވެ.
"ވަކި ބޭފުޅަކު ވަކި ކޮޅަކަށް ހުންނެވީކީއެއް ވެސް ނޫން، ޕާޓީގެ އެކްސްކޯގައި ތިއްބެވި ބޭފުޅުންގެ ވެސް ހިޔާލުތައް އެބަ ހުރި ދެކޮޅަށް ވެސް، މިހާރު އޮތް ހާލަތާއި ސަރުކާރުގައި އޮތް ހިތްހަމަޖެހުންތަކާއި ހިތްހަމަނުޖެހުންތައް ވެސް ކޮންމެ ބޭފުޅެއްގެ ވިސްނެވުމުގައި ވެސް އެބަ ހުންނެވި،" ފާރިސް ވިދާޅުވި އެވެ.
ރިޔާސީ އިންތިހާބުގައި ވާދަކުރުމުގެ ފުރުސަތު މި ވަގުތަށް ޔާމީނަށް ބަންދުވެފައި އޮތް އިރު، ޔާމީން ވާދަނުކުރާނަމަ އެ ޕާޓީއާ ގުޅިގެން އެމްއާރުއެމުން އިންތިހާބަށް ނުކުމެދާނެ ކަމުގެ އަޑުތައް ވެސް ގަދަ އެވެ.
ޕީޕީއެމާއެކު ރިޔާސީ އިންތިހާބުގައި މަސައްކަތްކުރާނެތޯ ސުވާލުކުރުމުން ފާރިސް ވިދާޅުވީ، އެމްއާރުއެމުން އިސްކަން ދެނީ ގައުމުގައި ހުރި ބޮޑެތި މައްސަލަތަކަށް އެ ޕާޓީން ބޭނުންވާ ހައްލުތަކެއް ލިބޭނެ ގޮތެއް ބެލުމަށް ކަމަށެވެ. ގެނެވޭނަމަ ކޮންމެ ޕާޓީއަކަސް އެންމެ ރަނގަޅު ކަމަށް ފާރިސް ވިދާޅުވި އެވެ.
"އެމްއާރުއެމުން ބޭނުންވާ ހައްލުތައް ގައުމަށް ގެނެވޭނަމަ، އަޅުގަނޑުމެން ކޮންމެ އޮޕްޝަނެއް ވެސް ރަނގަޅު، ގައުމުގައި ހުރި މައްސަލަތައް ހައްލުވާނެ އޮޕްޝަނަކަށް އަޅުގަނޑު ބަލަމުން މި ދަނީ،" ފާރިސް ވިދާޅުވި އެވެ.
ފާރިސް މައުމޫން "އަދަދު" ނޫހަށް ދެއްވި އިންޓަވިއު - ފޮޓޯ: މިރާޝް ނާޝިމް / އަދަދު
ނަމަވެސް ޔާމީންގެ ވެރިކަމުގައި އޮތް ހާލަތު ހަނދާންނެތިގެން ނުދާ ކަން ވެސް އިންޓަވިއުގެ ތެރެއިން ފާރިސް ފާހަގަ ކުރެއްވި އެވެ. އޭރު ސިޔާސީ ޕާޓީތައް ހިންގުމާއި، ހިޔާލު ފާޅުކުރުމުގެ މިނިވަންކަން ނެތް ކަމަށް އޭނާ ގަބޫލުކުރައްވަ އެވެ.
ރައީސް ސޯލިހާއެކު، ކުޑަމިނުން އެ ހާލަތު ރަނގަޅުވެފައިވާ ކަން ވެސް ފާރިސް ފާހަގަ ކުރެއްވި އެވެ.
"މިއީ ވަރަށް މުހިންމު ފުރުސަތެއް ރައްޔިތުން ވިސްނާލަން، ކެންޑިޑޭޓެއްގެ އެޖެންޑާއާއި ސިޔާސަތުތައް، އަދި އެ ކަން ކުރެވޭނެކަމުގެ ކިހައި ޔަގީންކަމެއް އޮތްތޯ ވެސް ބަލަން ޖެހޭނެ ފަހަރެއް، މި ކަންކަމަށް ރައްޔިތުން ވިސްނަންވީ، އަޅުގަނޑުމެން [އެމްއާރުއެމުން] ވެސް ވިސްނާނީ އެ ކަންކަމަށް،" ފާރިސް ވިދާޅުވި އެވެ.
ރިޔާސީ އިންތިހާބަށް އެމްއާރުއެމްގެ ސްޓޭންޑް އަދި ކަނޑަނާޅަ އެވެ. ރައީސް ސޯލިހުގެ ސަރުކާރުގެ ކޯލިޝަންގައި ހިމެނޭ އެމްއާރުއެމަށް ރައީސް ސޯލިހު ވެސް ވަނީ އަނެއްކާ ވެސް ކޯލިޝަން ހަދަން ދައުވަތު އަރުވައިފަ އެވެ. މި ހުރިހާ ކަމެއް އަދި އޮތީ އެމްއާރުއެމްގެ އެތެރޭގެ މަޝްވަރާގައި ހުއްޓިފަ އެވެ
