އިންޑިއަން ނޭވީއާ ގުޅިގެން އެމްއެންޑީއެފުން ކުރިއަށް ގެންދިޔަ ތިން ވަނަ ހައިޑްރޯގްރެފިކް ސާވޭ ނިންމާލައިފި އެވެ.
ޖެނުއަރީ 19 ވަނަ ދުވަހުން ފެބްރުއަރީ 26 އަށް އިންޑިއަން ނޭވަލް ޝިޕް އިންވެސްޓިގޭޓަރުން މި ސާވޭ ކުރިއަށް ގެންގޮސްފައި ވަނީ ދިވެހި ސަރުކާރުގެ އެދުމުގެ މަތިންނެވެ.
އެގޮތުން, މި މުއްދަތުގައި އިހަވަންދިއްޕޮޅާއި ތިލަފުންމަތީގެ އަތޮޅިތައް އަދި ގައްލަންދު ކަނޑު ހިމެނޭހެން އުތުރުގެ ސަރަހައްދުތައް ސާވޭކޮށްފައި ވެއެވެ.
ރާއްޖޭގައި ހުންނަ އިންޑިއަން އެމްބަސީން ބުނީ މި ސާވޭގައި 6308 ކިލޯމީޓަރުގެ ސައުންޑިން ކަވަރުކޮށްފައިވާ ކަމަށެވެ. އަދި ސައުންޑިން ލައިންތަކުން 2630 އަކަ ކިލޯމީޓަރުގެ ސާވޭއެއް ކޮށްފައިވާ ކަމަށެވެ.
މި ސާވޭތައް ކުރިއަށް ގެންގޮސްފައިވަނީ ދިވެހި ސިފައިންނާއި އިންޑިއާ ސިފައިން ގުޅިގެން އެއްގަމާއި ބޯޓާއި ހެލިކޮޕްޓަރާއި އުޅަނދުފަހަރުގައި ގަދަވަޔާއި ވިއްސާރައިގައި ކަމަށް އިންޑިއާ އެމްބަސީން ބުނެ އެވެ.
މި ސާވޭގައި ހެލިކޮޕްޓަރާއި ބޯޓު ބޭނުން ކުރުމުގެ އިތުރުން 88 ކިލޯމީޓަރުގެ ފައިމަގުގައި ހިނގާފައިވާއިރު ގިނަ ސަރަހައްދުތަކެއްގައި ސާވޭކުރުމަށް މަލްޓި ބީމް އެކޯ ސައުންޑާ ބޭނުންކޮށްފައި ވެއެވެ.
ސާވޭގެ ހޯދުންތަކަށް އަލިއަޅުވާލަމުން އިންޑިއާ އެމްބަސީގެ ނޫސްބަޔާނުގައި ބުނީ މި ސާވޭގައި އިހަވަންދިއްޕޮޅުން އަލަށް 52 ޝޮލް ފެނިފައިވާ ކަމަށެވެ.
ތިން ވަނަ ހައިޑްރޯގްރެފިކް ސާވޭއަށްފަހު އައިއެންއެސް އިންވެސްޓިގޭޓަރުގައި ބޭއްވި ރަސްމިއްޔާތެއްގައި ވަނީ ސާވޭކުރި ސަރަހައްދުތަކުގެ ހަތަރު ފެއާ ޝީޓް, ޑިފެންސް މިނިސްޓަރު މާރިޔާ އަހުމަދު ދީދީއާ ހަވާލުކޮށްފަ އެވެ.
ހައިޑްރޯގްރެފިކް ސާވޭ ކުރިއަށް ގެންދިޔަ ބޯޓުން ކުޅުދުއްފުއްޓާއި މާރަންދޫ އަދި ހޯރަފުށީގެ އުދައިގެ އޮބްޒަވޭޝަންތަކެއް ކޮށްފައިވާއިރު, ކުރިއަށް އޮތްތަނުގައި އުދައިގެ ސައްހަ އަންދާޒާތައް ކުރެވޭނެ ކަމަށް އެ ނޫސްބަޔާނުގައި ބުނެ އެވެ. އެ ބަޔާނުގައި ބުނީ މާރަންދު އާއި ހޯރަފުށީގައި އާ ބެންޗްމާކްތަކެއް ގާއިމުކޮށްފައިވާ ކަމަށާއި, އޭގެ ސަބަބުން އުދައިގެ ސައްހަ ރީޑިން އާއި އަންދާޒާތަކަށް މަގުފަހިވެގެންދާނެ ކަމަށެވެ.
ހަމައެއާއެކު މި ސާވޭގެ ސަބަބުން މުސްތަގުބަލުގައި އިހަވަންދިއްޕޮޅު އަދި ތިލަދުންމަތި ހިމެނޭގޮތަށް ބޮޑު ދެ ޗާޓާއި މީޑިއަމް ސްކޭލް ޗާޓް ޗާޕުކުރުމަށް މަގުފަހިވެގެންދާނެ އެވެ. ރާއްޖޭގެ ކަނޑުގެ ސަރަހައްދުތަކުގައި ފުޅާ ދާއިރާއެއްގައި ކުރިއަށްގެންދާ މި ސާވޭތަކުގެ ސަބަބުން އުޅަނދުފަހަރުގެ ނެވިގޭޝަނަލް ސޭފްޓީ އިތުރުވެ, އަޕްޑޭޓެޑް, އިލެކްޓްރޯނިކް ނެވިގޭޝަނަލް ޗާޓުތައް އުފެދިގެންދާނެ އެވެ.
މި ސާވޭގައި ސަބަބުން ދިވެހި ސިފައިންގެ ތެރޭގައި ހައިޑްރޯގްރެފިކް ފެސިލިޓީތައް ގާއިމުކުރުމަށް އެހީތެރިވެދޭއިރު, އިންޑިއާއިން ވަނީ ހައިޑްރޯގްރެފިކް ސާވޭ ސެޓެއް ވެސް ރާއްޖެއަށް ދީފަ އެވެ. މީގެ ސަބަބުން މޯލްޑިވްސް ހައިޑްރޯގްރެފިކް ސާވިސްގެ ސާވޭތައް ހެދުމުގެ ގާބިލުކަން އިތުރުވެގެންދާނެ ކަމަށް އިންޑިއާ އެމްބަސީން ބުނެ އެވެ.
