ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ސިޔާސަތުތަކާއި މޯލްޑިވްސް ނޭޝަނަލް ޕާޓީ (އެމްއެންޕީ) ގެ ސިޔާސަތުތަކާ ތަފާތު ކަމަށާއި އެހެންކަމުން ވެރިކަމުގެ ބޭނުމުގައި އެ ޕާޓީއާ އެކު ކޯލިޝަން ނަހަދާނެ ކަމަށް އެމްއެންޕީގެ ރައީސް މުހައްމަދު ނާޒިމް (ކާނަލް ނާޒިމް) ވިދާޅުވެއްޖެ އެވެ.
ރިޔާސީ އިންތިހާބުގައި އެމްއެންޕީން ވާދަކުރާނެކަން ހާމަކޮށްފައިވާއިރު އެމްޑީޕީން ގެންދަނީ އިންތިހާބަށް ނުކުތުމަށް ކޯލިޝަނެއް ގާއިމު ކުރުމުގެ މަސައްކަތްތައް ކުރަމުންނެވެ. އަދާލަތު ޕާޓީ އާއި މޯލްޑިވްސް ޑެވެލޮޕްމަންޓު އެލަޔަންސް ވަނީ އެ ކޯލިޝަނާއި ގުޅިފަ އެވެ.
ޖުމްހޫރީ ޕާޓީއަށް ވެސް ކޯލިޝަނުގެ ދައުވަތު ދީފައިވާއިރު އެމްއެންޕީއަށް އަދި އެ ދައުވަތު ދީފައި ނުވެ އެވެ. ކާނަލް ނާޒިމް އެމްއެންޕީ އުފެއްދީ ވެސް ކޭޕީން ވަކިވެވަޑައިގަތުމަށް ފަހު އެވެ. އޭނާ ވަނީ އެއީ މިވަގުތު ސަރުކާރު ކޯލިޝަނުގައި އޮތުމުން ޖޭޕީގެ މެމްބަރުންގެ ގޮތުގައި ސަރުކާރުން ކުރާ ގޯސް ކަންކަމަށް ވެސް އެއްޗެއް ބުނެވެން ނެތުމުން ނިންމި ނިންމުމެއް ކަމަށް ހާމަކުރައްވާފަ އެވެ.
އިންތިހާބަށް އެކުގައި ނުކުތުމުގެ މަޝްވަރާއަށް އެމްޑީޕީން އެދިފައި ނުވާއިރު ކާނަލް ނާޒިމް މިވަނީ އެފަދަ ފުރުސަތެއް ވެސް ނެތް ކަމަށް ހާމަކުރައްވާފަ އެވެ.
ނާޒިމް ވިދާޅުވާ ގޮތުން ނަމަ އެއީ އެމްއެންޕީއަކީ ވަކީ އުސޫލުތަކެއް ހިފަހައްޓާ ޕާޓީއަކަށް ވެފައި އެމްޑީޕީއާ ދެމެދު ސިޔާސަތުގައި ބޮޑެތި ތަފާތުތަކެއް ހުރުމުންނެވެ. އެގޮތުން، "ވެރިކަމުގެ ބޭނުމުގައި ގައުމީ ބޮޑެތި މައްސަލަތަކުގައި ގައުމަށް ގެއްލުންވާނޭ ފަދަ ސިޔާސަތެއްގައި ބައިވެރި ނުވާނޭ" ކަމަށް ނާޒިމް ރޭ ކްލަބްހައުސްގައި ހާމަކުރެއްވި އެވެ.
އަދި، ރައީސް އިބްރާހިމް މުހައްމަދު ސޯލިހުގެ އިގްތިސާދީ ސިޔާސަތުތަކަށް ވަރަށް ބޮޑަށް ފާޑުވިދާޅުވި އެވެ.
"މި ސަރުކާރުގެ އިގްތިސާދީ ސިޔާސަތުތަކަކީ ވަރަށް ދޯހަޅި ސިޔާސަތުތަކެއް. ދެއުޅި އެއްނުވާ ގޮތަށް ކަންކަން މި ދަނީ. ގަބޫލުކުރަން ލޯނު ނަގަން ޖެހޭ ކަން ވެސް. އެކަމަކު ލޯނު މެނޭޖު ކުރުމުގެ ސިޔާސަތެއް ނެތް. މި ފެންނަނީ ތާކުންތާކު ނުޖެހޭ ގޮތަށް އެކި ކަންކަމަށް ހަރަދުކުރާ ތަން،" ނާޒިމް ވިދާޅުވި އެވެ.
އިންތިހާބުގެ ފުރަތަމަ ބުރަށް ފަހު ދެވަނަ ބުރުގައި ކޯލިޝަނެއް ހަދަން ޖެހިއްޖެ ހާލަތެއްގައި އެމްއެންޕީގެ ސިޔާސަތުތަކާ އެއްގޮތްވާ ގޮތަށް ޕާޓީއަކާ އެކު ކުރިއަށްދާނެ ކަމުގެ އިޝާރާތެއް ވެސް ނާޒިމް ދެއްވި އެވެ.
