ދިވެހިރާއްޖެއިން ފަލަސްތީނަށް ކަނޑައަޅުއްވާފައި ހުންނަވާ ނޮން-ރެޒިޑެންޓް ސަފީރު، މުހައްމަދު ހަލީލު ފަލަސްތީނުގެ ރައީސަށް ފަތްކޮޅު އަރުވައިފި އެވެ.
ހަލީލު، ފަލަސްތީނުގެ ރައީސް މަހުމޫދު އައްބާސްއާ ބައްދަލުކުރައްވައި އެމަނިކުފާނަށް ސަފީރުކަމުގެ ފަތްކޮޅު އަރުވާފައިވަނީ އިއްޔެ އުރުދުންގައި ހުންނަ ފަލަސްތީނުގެ އެމްބަސީގައި ކުރިއަށް ދިޔަ ފަތްކޮޅު އެރުވުމުގެ ރަސްމިއްޔާތުގަ އެވެ.
ފަތްކޮޅު އެރުށްވުމަށްފަހު ރައީސް އައްބާސް ވަނީ ރާއްޖޭގެ ސަފީރަށް މަރުހަބާ ދަންނަވައި އެބޭފުޅާގެ ސަފީރުކަމުގެ ދައުރުގައި ކާމިޔާބީއަށް އެދިވަޑައިގަންނަވާ ކަމަށް ވިދާޅުވެފަ އެވެ. އަދި، ރައީސް އިބްރާހިމް މުހައްމަދު ސޯލިހު ފަލަސްތީނާ ދޭތެރޭ ބަހައްޓަވާ ގާތްކަން ފާހަގަކުރައްވާ އެކަމަށް އައްބާސް ޝުކުރު އަދާކުރެއްވި އެވެ.
މީގެއިތުރުން ރައީސް އައްބާސް ވަނީ ފަލަސްތީނުގެ ރައްޔިތުން މިނިވަންކަމަށް ކުރަމުންގެންދާ މަސައްކަތުގައި ރާއްޖޭގެ ދައުލަތާއި ދިވެހިން އަބަދުވެސް ކުރަމުންގެންދާ ތާއީދަށާއި މެދުއިރުމަތީ ސަރަހައްދުގެ އަމަންއަމާންކަން ގާއިމުކުރުމަށް ރާއްޖެއިން ދޭ އަހައްމިއްޔަތު ކަން ފާހަގަކުރައްވާފަ އެވެ.
އެގޮތުން ފަލަސްތީނުގެ ރައްޔިތުންގެ އިންސާނީ ހައްގުތަައް ރައްކާތެރިކުރުމަށްޓަކައި ބައިނަލްއަގުވާމީ ފެންވަރުގައި ރާއްޖެއިން އަބަދުވެސް ވަކާލާތުކުރަމުންގެންދާތީ އެކަމަށް ޝުކުރުއަދާކުރައްވާ ރައީސް އައްބާސް ވަނީ ރާއްޖޭގެ މަސައްކަތަށް ތައުރީފުކުރައްވާފަ އެވެ.
ރާއްޖޭގެ ސަފީރު ހަލީލު ދެއްކެވި ވާހަކަފުޅުގައި ރާއްޖޭގެ ރައްޔިތުންނާއި ރައީސް ސޯލިހުގެ ފަރާތުން ފަލަސްތީނުގެ ރައްޔިތުންނާއި ރައީސް އައްބާހަށް ޝުކުރުއަދާކުރެއްވި އެވެ. އަދި، ފަލަސްތީނުގެ ދިފާއުގައި ރައީސް ސޯލިހުގެ ސަރުކާރާއި ދިވެހިން ތިބޭނެ ކަމުގެ ޔަގީންކަން ހަލީލު ދެއްވި އެވެ.
މީގެއިތުރުން، 1967ގެ ކުރިން ކަނޑައަޅާފައިވާ ބޯޑަރުތަކުގެ މައްޗަށް ބިނާވެފައިވާ އަދި އިރުމަތީ ގުދުސް ވެރިރަށެއްގެ ގޮތުގައި ހަމަޖެހިފައިވާ އަމިއްލަ ސިޔާދަތެއް ލިބިފައިވާ މިނިވަން ފަލަސްތީނެއް ގާއިމުކުރުމަށް ދިވެހި ސަރުކާރުން ތާއީދުކުރަމުންދާ ސިޔާސަތު ހަލީލު ތަކުރާރުކުރެއްވި އެވެ.
ރާއްޖެއާއި ފަލަސްތީނާ ދެމެދު 4 އޭޕްރިލް 1982 ގައި ސިޔާސީ ގުޅުން ގާއިމު ކުރެވުނު ނަމަވެސް، މިއީ ރާއްޖެއިން ފަލަސްތީނަށް ކަނޑައެޅި ސަފީރަކު އެ ގައުމުގެ ރައީސަކަށް ފަތްކޮޅު އެރުވި ފުރަތަމަ ފަހަރެވެ.
