މި އަހަރުގެ ރިޔާސީ އިންތިހާބުގައި ޖުމްހޫރީ ޕާޓީއިން އެހެން އެއްވެސް ޕާޓީއަކާއެކު ކޯލިޝަން ހެދުމަށް މަޝްވަރާ ކުރާނީ ޕާޓީގެ ކައުންސިލުން ރިޔާސީ އިންތިހާބާ މެދު ގޮތެއް ނިންމުމުން ކަމަށް އެ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެ އެވެ.
ރިޔާސީ އިންތިހާބުގައި ޖޭޕީއިން ކުރިއަށްދާނެ ގޮތެއް މިހާތަނަށް ނިންމާފައި ނުވާއިރު މިއަދު ގާސިމް ވަނީ ރައީސް އިބްރާހިމް މުހައްމަދު ސޯލިހާ ބައްދަލުކުރައްވާފަ އެވެ.
އެ ބައްދަލުކުރެއްވުމަށްފަހު ނޫސްވެރިންނަށް ގާސިމް ވިދާޅުވީ މިއަދު ބައްދަލުވުމުގައި ކުރެވުނީ ސިޔާސީ މަޝްރަހުގެ މަޝްވަރާ ކަމަށެވެ.
ރިޔާސީ އިންތިހާބުގައި ރައީސް ސޯލިހާ އެކު ކޯލިޝަން ހެދުމާ ގުޅޭ މަޝްވަރާއެއް ކުރެވުނުތޯ ނޫސްވެރިޔަކު ކުރި ސުވާލަށް ޖަވާބު ދެއްވަމުން ގާސިމް ވިދާޅުވީ، ކޯލިޝަން ހެދުމާ ގުޅޭގޮތުން ވާހަކަ ދައްކާނީ އެ ޕާޓީގެ ކައުންސިލުން ވަކި ގޮތެއް ނިންމުމުން ކަމަށެވެ.
"މިހާތަނަށް ކައުންސިލުން ވަކި ގޮތަކަށް ނުނިންމާ، ކޮންފަރެންސުން އެއޮތީ ގަރާރެއް ފާސްކޮށްފައި، އެ ގަރާރުގަ މި ބުނަނީ އަޅުގަނޑުމެން ވަކި މީހަކު އިންތިހާބަށް ނެރެން" ގާސިމް ވިދާޅުވި އެވެ.
އޭގެއިތުރުން، ކުރިއަށް އޮތް އިންތިހާބުގައި ވާދަކުރުމާމެދު ގާސިމް ދެކިލައްވާ ގޮތާ ގުޅިގެން އަދި ވާހަކަ ދައްކަން ހިޔާލު ނުކުރައްވާ ކަމަށްވެސް ވިދާޅުވި އެވެ.
މިހާރު އިދިކޮޅުގައި އޮތް ޕީޕީއެމް އާއެކު ކޯލިޝަނެއް ހެދުމަށް އެއްވެސް މަޝްވަރާކުރެވިފައިވޭތޯ ސުވާލުކުރުމުންވެސް ގާސިމް ދެއްކި ޖަވާބަކީ ކޯލިޝަނުގެ ވާހަކަ ދެކެވޭނީ ކައުންސިލްގެ ނިންމުމަށްފަހު ކަމަށެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ޖުމްހޫރީ ޕާޓީގެ ކެންޑިޑޭޓަކު ނެރުމަށް ނުވަތަ އެ ޕާޓީ އިސްވެ އޮވެ އުފައްދާ ކޯލިޝަނަކުން ވާދަ ކުރުމަށް, ނިމިގެން ދިޔަ ހަފުތާ ބަންދުގައި ބޭއްވި އެ ޕާޓީގެ ގައުމީ ކޮންފަރެންސުން ވަނީ ނިންމައިފަ އެވެ. ރައްޔިތުންގެ މަޖިލިހުގެ ތިނަދޫ ދެކުނު ދާއިރާގެ ކުރީގެ މެމްބަރު އަބްދުﷲ އަހުމަދު ހުށަހެޅުއްވި އެ ގަރާރު ކޮންފަރެންސްގެ އިއްތިފާގުން ފާސްވި ނަމަވެސް، ގަރާރަށް އަމަލު ކުރާނީ ކައުންސިލުން ގޮތެއް ނިންމުމުންނެވެ.
ކޮންފަރެންސް ނިންމުމުގެ ރަސްމިއްޔާތުގައި ގާސިމް ވިދާޅުވެފައިވަނީ ރާއްޖޭގެ ވެރިކަމާ ހެދި "މޮޔަވާން ޖެހޭ" ސަބަބެއް ނެތް ކަމަށާއި ރައީސުލްޖުމްހޫރިއްޔާގެ މަގާމަށް ވުރެ އޭނާގެ ޝައުގު އޮތީ މި ގައުމުގައި ތެދުވެރިކަމާއި އިހުލާސްތެރިކަމާއެކު ކުރެވޭ މަސައްކަތްތަކަކަށް ތަރުހީބު ދީ އެކަންތައްތައް ކުރިއަށް ގެންގޮސް ނިންމުމަށް ކަމަށެވެ.
"އަޅުގަނޑު ކޮންކަމަކާތޯ މިތާ ރައީސުލްޖުމްހޫރިއްޔާގެ ކަމުގެ މަގާމަށް އަންނަން އަޅުގަނޑު މަސައްކަތް ކުރަންވީ. ކޮން އެއްޗަކަށް ހަދަންތޯ. ކޯއްޗެއްތޯ އަޅުގަނޑަށް ނެތީ. ﷲ އަޅުގަނޑަށް ދެއްވާފައިވާ އެ ނިއުމަތް ވަނީ ފުރާ ފުރިހަމަ ކުރައްވާފައި. ވަރަށް ރަނގަޅަށް. އައިމް ނޮޓް ކްރޭޒީ އިނގޭތޯ؟،" އޭނާ ވިދާޅުވި އެވެ.
ރައީސް ސޯލިހާއި ގާސިމްގެ ބައްދަލުވުމާ ގުޅޭ ގޮތުން ރައީސް އޮފީހުން އެއްވެސް ވާހަކައެއް ހާމައެއް ނުކުރެ އެވެ.
