ޖުމްހޫރީ ޕާޓީ (ޖޭޕީ) ގެ ލީޑަރުގެ މަގާމަށް ހަތަރު ވަނަ ދައުރަކަށް ހޮވިވަޑައިގެންނެވި މާމިގިލީ ދައިރާގެ މެމްބަރު އަދި މަޝްހޫރު ވިޔަފާރިވެރިޔާ ގާސިމް އިބްރާހިމް، ރައީސް އިބްރާހިމް މުހައްމަދު ސޯލިހުއާ ބައްދަލުކުރެއްވުމަށް ރައީސް އޮފީހަށް މިއަދު ވަޑައިގެންފި އެވެ.
އެ ބައްދަލުވުން އޮތްކަމުގު މައުލޫމާތު ރައީސް އޮފީހާއި ގާސިމްގެ ފަރާތުން ވެސް އާންމެއް ނުކުރެ އެވެ. ނަމަވެސް ގާސިމް ރައީސް އޮފީހަށް ވަދެވަޑައިގަތް މަންޒަރު "އަދަދު" ގެ ނޫސްވެރިންނަށް ވަނީ ފެނިފަ އެވެ. އަދި، މި ދެ ބޭފުޅުންގެ ބައްދަލުވުމެއް މިއަދު އޮންނަކަން ވަނީ ކަށަވަރު ކުރެވިފަ އެވެ.
ނަމަވެސް، މި ބައްދަލުވުމުގައި މަޝްވަރާ ކުރަން ހަމަޖެހިފައިވާ ކަންކަމާއި ގުޅޭގޮތުން އިތުރު މައުލޫމާތެއް ހާމަކޮށްފައި ނުވެ އެވެ.
ސަރުކާރުގައި ހުރި ޖޭޕީގެ އިސް ބޭފުޅަކު މި ބައްދަލުވުމާ ގުޅޭގޮތުން "އަދަދު" އަށް ވިދާޅުވީ ކުރިއަށް އޮތް ތަނުގައި "ކުރަން ޖެހޭ ކަންކަން ނިންމުމަށް" ބޭއްވި ބައްދަލުވުމެއް ކަމަށެވެ.
މިވަގުތު ކޯލިޝަނުގައި އޮތް ނަމަވެސް 2023 ގެ އިންތިހާބަށް އެމްޑީޕީއާ އެކު ނުކުތުމަށް ޖޭޕީން ނިންމާފައި ނުވެ އެވެ.
އެކަމުގެ މަޝްވަރާތައް އެ ޕާޓީން ކުރަމުންދާއިރު ކޯލިޝަނަކާ އެކު އިންތިހާބަށް ދިޔުމަށް ބޭނުންވާ ކަމަށް ވިދާޅުވެ ރައީސް ސޮއިކުރައްވައި ޖޭޕީއަށް ވަނީ ސިޓީފުޅެއް ފޮނުއްވާފަ އެވެ. އެ ސިޓީފުޅާ ގުޅިގެން އެ ޕާޓީން އަދި ވަކި ގޮތެއް ނިންމާފައި ނުވެ އެވެ.
ސެޕްޓެމްބަރު 9، ގައި އޮންނަ ރިޔާސީ އިންތިހާބަށް ކޯލިޝަން ހެދުމުގެ ބާރު އެމްޑީޕީގެ ގައުމީ މަޖިލީހުން ރައީސް ސޯލިހަށް ދީފައިވާއިރު، އެމަނިކުފާނުގެ މަންދޫބުންތަކެއް ވެސް ގާސިމްއާ ބައްދަލުކުރެއްވި އެވެ.
ޖޭޕީން ރިޔާސީ އިންތިހާބަށް ކުރިމަތިލުމަށް ކޮންގްރެސްއިން ލަފާ ދީފައިވާއިރު, ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީގެ ލީޑަރު ގާސިމް އިބްރާހިމް، ރައީސް ސޯލިހާ އެކު ކޯލިޝަން ހެދުމުގެ އުއްމީދު ބޮޑު ކަމަށް ރައީސް ސޯލިހުގެ ފަޅިން ވަނީ ބުނެފަ އެވެ.
ރިޔާސީ އިންތިހާބަށް ނުކުތުމާމެދު ޖުމްހޫރީ ޕާޓީން ބޭއްވި ކޮންގްރެސްގައި ބަހުސް ކޮށްފައިވާއިރު, ބަހުސް ކުރެއްވި ގިނަ މެންބަރުން ތާއިދު ކުރެއްވީ ގާސިމް އިންތިހާބަށް ކުރިމަތިލުމަށެވެ. ނަމަވެސް ގަރާރު ޗެއާ ކުރެއްވި ޖޭޕީގެ ލީޑަރު ގާސިމް, އެކަމާ ބެހޭގޮތުން ދެކެވަޑައިގަންނަވާ ގޮތެއް ހާމައެއް ނުކުރައްވަ އެވެ.
މިދިޔަ މަހު ބޭއްވި އެމްޑީޕީގެ ޕްރައިމަރީގައި އެ ޕާޓީގެ ރައީސް އަދި ކުރީގެ ރައީސް މުހައްމަދު ނަޝީދުގެ މައްޗަށް ކުރި ހޯއްދަވައި، ރިޔާސީ ޓިކެޓު ކާމިޔާބު ކުރެއްވުމުގެ ކުރިން ވެސް، ރައީސް ސޯލިހު ވަނީ ރިޔާސީ އިންތިހާބަށް ކޯލިޝަން ހައްދަވާނެ ކަމަށް ވިދާޅުވެފަ އެވެ.
ކޯލިޝަނަކާ ނުލައި އެމްޑީޕީއަށް އެކަނި އިންތިހާބު ކާމިޔާބު ނުކުރެވޭނެ ކަމަށާއި ކޯލިޝަނެއްގެ ތެރެއިން ވެރިކަން ކުރެއްވޭނެ އެމްޑީޕީގެ ހަމައެކަނި ކެންޑިޑޭޓަކީ އެމަނިކުފާނު ކަމަށް ރައީސް ސޯލިހު ވިދާޅުވެފައިވެ އެވެ.
އެމަނިކުފާނާ އެކު ކޯލިޝަން ހެދުމަށް ވިޔަފާރިވެރިޔާ އަދި ދ. މީދޫ ދާއިރާގެ މެމްބަރު އަހްމަދު ސިޔާމް މުހައްމަދުގެ މޯލްޑިވްސް ޑެވެލޮޕްމަންޓު އެލަޔަންސް (އެމްޑީއޭ) އަދި އަދާލަތު ޕާޓީ (އޭޕީ) އިން ވަނީ ނިންމާފަ އެވެ.
މިވަގުތު ރައީސްގެ ދައުވަތު ލިބުނު ޕާޓީތަކުގެ ތެރެއިން ގޮތް ނިންމާފައި ނުވަނީ ރައީސް މައުމޫން އަބްދުލްގައްޔޫމުގެ މޯލްޑިވްސް ރިފޯމް މޫވްމަންޓު (އެމްއާރުއެމް) އަދި ޖޭޕީންނެވެ.
ގާސިމް އިބްރާހިމް ވަނީ މީގެ ކުރިން 2008 ވަނަ އަހަރާއި 2013 ވަނަ އަހަރުގެ ރިޔާސީ އިންތިހާބުގައި ވާދަ ކުރައްވައިފަ އެވެ. ރާއްޖޭގެ ބޮޑެތި ސިޔާސީ ޕާޓީތަކުން ވެސް ތިބީ ޖުމްހޫރީ ޕާޓީން ރިޔާސީ އިންތިހާބާ މެދު ނިންމާ ގޮތެއްގެ އިންތިޒާރުގަ އެވެ.
