ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ ހާއްސަ އެޑްވައިޒުންގެ ތެރޭގައި ހިމެނޭ މަޖިލީހުގެ ކުރީގެ މެންބަރު އިލްހާމް އަހުމަދު، ރައްޔިތުންގެ މަޖިލީހުގެ ރައީސް މުހައްމަދު ނަޝީދާއެކު މިއަދު ބައްދަލުވުމެއް ބާއްވައިފި އެވެ.
އެ ބައްދަލުވުމަށް ފަހު، ނަޝީދާއި އެމަނިކުފާނުގެ އަރިސް ބޭފުޅުންގެ ތެރޭގައި ހިމެނޭ ރައީސް އޮފީހުގެ މިނިސްޓަރު މުހައްމަދު ޝިފާޒް އާއި ހެންވޭރު ހުޅަނގު ދާއިރާގެ މެންބަރު ހަސަން ލަތީފާއި ހުޅުދޫ ދާއިރާގެ މެންބަރު އިލްޔާސް ލަބީބާއެކު އިލްހާމް ނަންގަވާފައިވާ ފޮޓޯއެއް ދަނީ ޓްވިޓާގައި ދައުރުވަމުންނެވެ.
ބައްދަލުވުމާ ގުޅޭ ގޮތުން "އަދަދު" އިން ސުވާލުކުރުމުން އިލްހާމް ވިދާޅުވީ ނަޝީދުގެ ދައުވަތަށް ބައެއް ކަންކަމާ މަޝްވަރާ ކުރެއްވުމަށް ބައްދަލުވެވަޑައިގަތީ ކަމަށެވެ. މި ވަގުތަށް މަޝްވަރާ ކުރެއްވި ކަންކަން ހާމަކުރެވެން ނެތް ކަމަށް ވެސް އޭނާ ވިދާޅުވި އެވެ.
ބައްދަލުވުމުގެ މާ ބޮޑު ތަފްސީލެއް ނުލިބުނު ނަމަވެސް ބެލެވޭ ގޮތުގައި މިއީ ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީއާ ގުޅިގެން ނަޝީދު މަސައްކަތް ކުރެއްވުމާ ގުޅޭ ގޮތުން މަޝްވަރާކުރެއްވުމަށް ގެންދެވި ބައްދަލުވުމެކެވެ.
މިއަދު މަޖިލީހުގެ ޖަލްސާގައި ވާހަކަ ދައްކަވަމުން، ކުރިން އެމްޑީޕީގެ ޗެއާޕާސަނަކަށް ވެސް ހުންނެވި ހަސަން ލަތީފު ވެސް ވަނީ މިހާރު އޮތް ސަރުކާރުގައި އެމްޑީޕީއަށް ލިބޭ 40 އިންސައްތައަށް ވުރެ ބޮޑު އިންސައްތައެއް ލިބޭ ގޮތަށް އެހެން ޕާޓީއެއްގެ ކެންޑިޑޭޓަކަށް ތާއީދުކޮށްގެން ނުކުތުމަށް ތާއީދުކުރައްވައި ވާހަކަ ދައްކަވައިފަ އެވެ.
"މިހާރު އޮތް ސަރުކާރުގައި 40 ޕަސެންޓު އޮތް އިރު، އެއަށް ވުރެ ރަނގަޅު ޕަސެންޓޭޖަކާ އެކީގައި، އެމްޑީޕީއަށް ސަރުކާރަށް އާދެވިފައި، އެމްޑީޕީގެ ސިޔާސަތުތަކާއި އަސާސްތަކާއި އުސޫލުތައް އުފެއްދޭނެ ސަރުކާރެއް އުފެއްދުން މާ މުހިންމު، އެމްޑީޕީގެ ނަމެއްގައި ރައީސެއް ހުރުމަށް ވުރެ،" އޭނާ ވިދާޅުވި އެވެ.
ހަސަން ލަތީފު އެ މޭރުމުން ވާހަކަ ދެއްކެވީ، އެމްޑީޕީއަށް އެންމެ ރަނގަޅު ގޮތަކީ ޖުމްހޫރީ ޕާޓީގެ ރިޔާސީ ކެންޑިޑޭޓެއް ނެރެގެން ޖުމްހޫރީ ޕާޓީއަށް ވެރިކަން ހޯދައިދިނުން ކަމަށް އެމްޑީޕީގެ މެންބަރުންނަށް ވިސްނައިދިނުމަށް ނަޝީދު މަސައްކަތް ކުރައްވަމުން ގެންދަވާ ކަމަށް ހެންވޭރު އުތުރު ދާއިރާގެ މެންބަރު ހުސައިން ޝަހީމް (އަނދުން) ފުރަތަމަ ވިދާޅުވުމާ ގުޅިގެނެވެ.
އެ ވާހަކައަށް ފަހު ނަޝީދު ވިދާޅުވީ ސަރުކާރުގައި މިހާރު އޮތް ހިއްސާއަށް ވުރެ ބޮޑު ހިއްސާއެއް ލިބޭ ނަމަ އެމްޑީޕިއަށް ރަނގަޅުވާނެ ކަމަށެވެ.
"މިވަގުތު އެމްޑީޕީއަށް ލިބިފައި އޮތީ 40 ޕަސެންޓު ސަރުކާރުގެ، އެއަށް ވުރެ އިތުރު މިންވަރެއް ލިބޭ ގޮތް ކަމަށް ވަންޏާ އެ ޕާޓީއަށް ރަނގަޅު ގޮތް ކަމަށް ލަފާ ކުރެވިދާނެ،" ނުސީދާކޮށް އެކަމަށް ތާއީދު ކުރައްވަމުން އެމްޑީޕީ ޕްރައިމަރީގައި ނާކާމިޔާބުވެވަޑައިގެންނެވި ނަޝީދު ވިދާޅުވި އެވެ.
އެމްޑީޕީގެ ރިޔާސީ ޕްރައިމަރީ ރައީސް އިބްރާހީމް މުހައްމަދު ސޯލިހު ކާމިޔާބު ކުރެއްވިއިރު، ރައީސަށް ތާއީދުކުރައްވަން އެ ޕްރައިމަރީން ނާކާމިޔާބުވެވަޑައިގެންނެވި ނަޝީދު ނުނިންމަވަ އެވެ. ކުރިން އެމްޑީޕީގެ ރިޔާސީ ކެންޑިޑޭޓަކަށް އަބަދުވެސް ހުންނެވި ނަޝީދު ވިދާޅުވަމުން ގެންދަވަނީ ރައީސް ސޯލިހާއެކު އެމްޑީޕީއަށް ރިޔާސީ އިންތިހާބު ކާމިޔާބު ނުކުރެވޭނެ ކަމަށެވެ.
ރައީސް ސޯލިހު ބޭނުންފުޅުވަނީ މިހާރު އޮތް ސަރުކާރު ކޯލިޝަންގެ ބައިވެރިންނާއެކު ރިޔާސީ އިންތިހާބުގެ ފުރަތަމަ ބުރަށް ނުކުތުމަށެވެ. ނަމަވެސް އެމަނިކުފާނުގެ ދައުވަތު މިހާތަނަށް ގަބޫލުކޮށްފައިވަނީ އަދާލަތު ޕާޓީ އެކަންޏެވެ. ޖުމްހޫރީ ޕާޓީން އިންތިހާބަށް ނުކުތުމަށް ކައުންސިލަށް ލަފާ ދިނުމަށް އެ ޕާޓީގެ ކޮންގްރެސްއިން ނިންމާފައިވާއިރު، އެމްއާރުއެމް އިން އަދި އިންތިހާބާ ގުޅޭ ގޮތުން ވަކި އެއްޗެއް ނުބުނެ އެވެ.
އެކަމަކު ސަރުކާރުން މިހާރު ވަނީ އެމްޑީއޭއާއެކު ކޯލިޝަނެއް ހެދުމަށް އެއްބަސްވެފަ އެވެ.
