މި އަހަރު ރާއްޖެއިން ހައްޖަށް މީހުން ގެންދިއުމަށް ބޭނުންވާ ފަރާތްތަކުން ޕްރޮޕޯސަލް ހުށަހެޅުމުގެ ފުރުސަތު ހުޅުވާލައިފި އެވެ.
އިސްލާމިކް މިނިސްޓްރީއިން މިއަދު ކުރި އިއުލާނުގައި ބުނެފައިވަނީ ޕްރޮޕޯސަލް ހުށަހެޅުމުގެ ފުރުސަތު ލިބޭނީ މިދިޔަ އަހަރުގެ މޭ މަހުގެ ތެރޭ އެކުލަވާލި 'ދިވެހި ރާއްޖެއިން ހައްޖަށް މީހުން ގެންދިއުމާބެހޭ އުސޫލު' ގައިވާ ގޮތުގެ މަތިން ޝަރުތު ހަމަވާ ފަރާތްތަކަށް އެކަނި ކަަމަށެވެ.
މި އުސޫލުގައިވާ ގޮތުގެ މަތިން ޕްރޮޕޯސަލް ހުށަހެޅޭނީ ސައްތައިންސައްތަ ދިވެހި ހިއްސާ އޮންނަ ކުންފުނި ތަކަށެވެ. މި ކުންފުނިތަކުގައި ތިރީގައިވާ ޝަރުތުތައްވެސް ހުންނަންވާނެ ކަމަށް އެ އުސޫލުގައި ބުނެފައިވެ އެވެ.
- ރާއްޖޭއިން އުމްރާއަށް މީހުން ގެންދިއުމުގެ ހުއްދަ އޮވެ އެ ހިދުމަތް ދެ އަހަރު ދީފައިވުން
- ކުންފުނީގެ ޑިރެކްޓަރުންނަކީ ޖިނާއީ ކުށެއްގައި ހުކުމެއް ތަންފީޒުކުރަމުންދާ ނުވަތަ ޖިނާއި ކުށުގެ ތެރެއިން ފައިސާގެ ހިޔާނާތާ ބެހޭ އެއްވެސް މައްސަލައެއްގެ ތުހުމަތުކުރެވިފައިވާ ފަރާތެއްކަމުގައި ނުވުން
- ހުއްދައަށް އެދޭ ކުންފުނީގެ ބޯޑުގައި މަދަނީ ކުށެއްގެ ހުކުމް ތަންފީޒުކުރަމުންދާ ފަރާތެއް ހިމެނޭނަމަ ހުކުމާ އެއްގޮތަށް ފައިސާ ދައްކަމުން ދިއުން
- ހައްޖުގެ ކަމަކާ ގުޅިގެން ސައޫދީ އަރަބިއްޔާގެ ނުވަތަ ހައްޖުގެ ކަންތައްތަކާ ގުޅުންހުރި އެއްވެސް އިދާރާއަކަށް ފައިސާ ދައްކަންޖެހި، އެ ފައިސާ ދައްކައިފައިނުވާ، ނުވަތަ ގަވާއިދުން ފައިސާ ދައްކަމުން ނުދާ ކުންފުންޏެއް ކަމުގައި ނުވުން
- އެއްވެސް ޓެކްސް އިދާރާއަކަށް ދައްކަންޖެހިފައި އޮތް ކުންފުންޏެއް ކަމުގައި ނުވުން
މީގެއިތުރުން، ހައްޖުގެ ޕްރޮޕޯސަލްއާ ގުޅޭ މައުލޫމާތު ކަރުދާސް މިނިސްޓްރީގެ ވެބްސައިޓުން ލިބެން ހުންނާނެ ކަމަށާއި ޕްރޮޕޯސަލް ހުށަހެޅުމާ ގުޅޭ މައުލޫމާތު ސެޝަން 2 އެޕްރީލް 2023 ގެ 10:00 ގައި އިސްލާމިން މިނިސްޓްރީގެ މީޓިން ރޫމް 1 ގައި އޮންނާނެ ކަމަށް އެ މިނިސްޓްރީގެ އިއުލާނުގައި ބުނެފައިވެ އެވެ.
އަދި، ޕްރޮޕޯސަލް ހުށަހަޅާ ފަރާތްތަކުން ދައްކަންޖެހޭ ފީ ދެއްކުމުގެ ފުރުސަތު 13 އެޕްރީލް 2023 ގެ 12:00 އާ ހަމައަށް ހުޅުވާލެވިފައި އޮންނާނެ ކަމަށް އެ މިނިސްޓްރީއިން ވަނީ ބުނެފަ އެވެ. ފީއެއްގެ ގޮތުގައި ދައްކަން ޖެހޭނީ 10،000 ރުފިޔާ އެވެ.
މިނިސްޓްރީއިން އިތުރަށް ބުނެފައިވަނީ ޕްރޮޕޯސަލް ހުށަހެޅުމުގެ ފުރުސަތު އޮންނާނީ ހަމައެކަނި ފީ ދައްކާ ފަރާތްތަކަށް ކަމަށެވެ.
ޕްރޮޕޯސަލް ހުށަހެޅުމުގެ ސުންގަޑިއެއްގެ ގޮތުގައި އިއުލާނުގައި ބުނެފައިވަނީ 14 އެޕްރީލް 2023 ގެ 10:00 އާ ހަމައަށެވެ.
މި އަހަރު ސައުދީ ސަރުކާރުން ރާއްޖެއަށް ރަސްމީ ހައްޖު ކޯޓާގެ ގޮތުގައި ދީފައިވަނީ 1،000 ކޯޓާ އެވެ. މީގެ އިތުރުންވެސް ދިވެހިންނަށް އިތުރު ކޯޓާ ހޯދުމުގެ މަސައްކަތް ކުރަމުންދާ ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވަނީ ވިދާޅުވެފަ އެވެ.
މިދިޔަ އަހަރު ރާއްޖެއަށް ލިބުނީ 453 މީހުންގެ ކޯޓާއެކެވެ. އެ ކޯޓާއަށް މީހުން ހައްޖަށް ގެންދިޔައީ ހަމައެކަނި ހައްޖު ކޯޕަރޭޝަންގެ ފަރާތުންނެވެ.
މި އަހަރު ކޮވިޑުގެ ކުރިން ހައްޖުވެރިންނަށް ދިން އަދަދަށް ކޯޓާ ދޫކުރާނެ ކަމަށް ސައުދީ ސަރުކާރުން ވަނީ އިއުލާނުކޮށްފަ އެވެ.
ކޮވިޑްގެ ކުރިން ހައްޖުގެ އަޅުކަމުގައި ދެ މިލިއަނަށްވުރެ ގިނަ މީހުން ބައިވެރިވިއިރު، ބަލި ކޮންޓްރޯލްކުރުމަށްޓަކައި އެޅި ވަރުގަދަ ފިޔަވަޅުތަކާއެކު 2021ގެ ހައްޖުގައި ފުރުސަތު ދިނީ އެންމެ 10،000 މީހުންނަށެވެ. ނަމަވެސް، ކޮވިޑު ފެތުރުން މަދުވެ ފިޔަވަޅުތަކަށް ދިން ލުޔާއެކު މިދިޔަ އަހަރު ސައުދީން ވަނީ އެއްމިލިއަން މީހުންނަށް ހައްޖު ކޯޓާ ދޫކޮށްފަ އެވެ.
