ގާނޫނު އަސާސީގައި ރިޔާސީ އިންތިހާބު ކާމިޔާބު ކުރުމަށް ހުރަސްކުރަން ޖެހޭ "50 އިންސައްތަ އަދި އިތުރު އެއް ވޯޓު" މިހާތަނަށް ވެސް ހުރަސްކުރެވުނީ ޖުމްހޫރީ ޕާޓީ ބައިވެރިވެގެނެވެ. އަދިވެސް ސިޔާސީ މަސްރަހުގެ ހަގީގަތް އޮތީ އެ ގޮތަށެވެ.
އެހެންވެ، ވެރިކަން ހޯދަން ވުމުން އެމްޑީޕީ އަދި ޕީޕީއެމަށް އަބަދުވެސް ޖޭޕީ މުހިންމުވެ އެވެ. ނަމަވެސް ވެރިކަމަށް އައުމަށް ފަހު، ލިބޭ ކާމިޔާބުތަކުގައި ޖޭޕީ ފޯރުކޮށްދޭ ދައުރު ބަލައިނުގަންނަ ކަމަށް، އެ ޕާޓީގެ ލީޑަރު ގާސިމް އިބްރާހީމް އަބަދުވެސް ވިދާޅުވެ އެވެ. މިހާރު ދަރުބާރުގޭގައި ކުރިއަށްދާ ޖޭޕީގެ ކޮންގްރެސް ފަށަމުން ވެސް ގާސިމް އިޝާރާތް ކުރައްވަން ޖެހުނީ މާޒީގެ އެ ސަފުހާތަކަށެވެ.
ޖުމްހޫރީ ޕާޓީގެ އިސް މަގާމުތަކަށާއި، ޕާޓީގެ ކައުންސިލް އިންތިހާބު ކުރުމާއި، ކުރިއަށް އޮތް ރިޔާސީ އިންތިހާބުގައި ވާދަކުރުމާ މެދު ޕާޓީން ނިންމާނެ ގޮތެއް ވެސް އެޖެންޑާ ކޮށްފައިވާ އެ ކޮންގްރެސް ވަށައިގެން ފެންނަނީ "ޖުމްހޫރީ ޕާޓީ 2023" ލިޔެފައިވާ ރަތް ކުލައިގެ ބެނާތަކެވެ.
ޖޭޕީގެ ކޮންގްރެސް މަންދޫބުންގެ ރޫހު އޮތީ ވެސް ބެނާތަކުގައި ލިޔެފައިވާ ފަދައިންނެވެ. ކައުންސިލް މަގާމުތަކުގެ އިންތިހާބުގެ ވޯޓު ގުނަމުން ދިޔަ އެ ވަގުތުކޮޅު، ގިނަ މެންބަރުން އިންތިޒާރު ކުރަމުން ދިޔައީ ވެސް ވޯޓުގެ ނަތީޖާއަށާއި ކުރިއަށް ތާވަލުކޮށްފައިވާ ގަރާރަށެވެ.
ރައްޔިތުންގެ މަޖިލީހުގެ ތިނަދޫ އުތުރު ދާއިރާގެ ކުރީގެ މެންބަރު އަބްދުﷲ އަހުމަދު (އަބުޅޯ) ހުށަހަޅުއްވާފައިވާ ގަރާރުގައި ވަނީ ކުރިއަށް އޮތް ރިޔާސީ އިންތިހާބުގައި އެ ޕާޓީ ވާދަކުރުމަށެވެ. އަދި ކޯލިޝަނެއް އުފެއްދި ނަމަވެސް، އޭގައި އިސް ވާން ވާނީ އެ ޕާޓީ އެވެ. ރިޔާސީ ކެންޑިޑޭޓުގެ ސްލޮޓް އޮންނަން ވާނީ ޖޭޕީއަށެވެ.
ދެހާސްއަށްވަނަ އަހަރުން ފެށިގެން ޖުމްހޫރީ ޕާޓީގެ މެންބަރެއްގެ ގޮތުގައި އުޅެފައިވާ މެންބަރު އަސްލަމް ބުނީ، ކޮންގްރެސްއަށް މިހާރު ހުށަހެޅިފައިވާ ގަރާރު ކޮންގްރެސް އިން ފާސްވާނެ ކަމަށް އުންމީދު ކުރެވޭ ކަމަށެވެ. އަދި އަސާސީ ގަވާއިދުން އެ ބާރު ކައުންސިލްގައި އޮތަސް، ކޮންގްރެސްގެ ނިންމުމަށް އިހުތިރާމު ކުރާނެ ކަމަށް އުންމީދު ކުރާ ކަމަށް އޭނާ ބުންޏެވެ.
"ކޮންގްރެސްއިން ނިންމާ ގޮތަކަށް ކުރިއަށް ދާން ބޭނުން، އެ ގަރާރު ފާސްވާނެ އިރާދަކުރެއްވިއްޔާ، މިއީ ޖޭޕީގެ ފަހަރެއްގެ ގޮތުގައި އަޅުގަނޑު ގަބޫލުކުރަނީ،" އުމުރުން 45 އަހަރުގެ އަސްލަމް ބުންޏެވެ.
މީގެ ތިން އަހަރު ކުރިން ޖުމްހޫރީ ޕާޓިއާ ގުޅުނު އަހުމަދު ޝާކިރު ބުނީ މިހާރު އެތައް ސަރުކާރެއް ފެނުނު އިރު، ދެން އޭނާ ވެސް ބޭނުން ވަނީ ގާސިމް އިބްރާހީމް ވާދަކުރުމަށެވެ. މިހާރު އޮތް ސަރުކާރު ކޯލިޝަން އިތުރަށް ދަމަހައްޓަން ބޭނުން ނުވާ ކަމަށް އޭނާ ބުންޏެވެ.
"އެ ގަރާރަށް ބަހުސް ވަގުތުގައި އެ ކަމަށް (ގާސިމް ވާދަކުރުމަށް) ވަރަށް ބޮޑަށް އެދޭނަން، މިހާރު މި އޮތް ގޮތަށް ރައީސް [އިބްރާހީމް މުހައްމަދު ސޯލިހް] އާއެކު ކޯލިޝަން ދަމަހައްޓަން އެބަ ވާހަކަ ދައްކާ، އެކަމަކު އަޅުގަނޑު ބޭނުމެއް ނޫން އެ ގޮތެއް،" އުމުރުން 54 އަހަރުގެ ޝާކިރު ބުންޏެވެ.
ދެހާސްފަނަރަވަނަ އަހަރުން ފެށިގެން ޖުމްހޫރީ ޕާޓީގައި ހަރަކާތްތެރިވާ އާދަމް ނަސީރު ވެސް ބުނީ ޖުމްހޫރީ ޕާޓީގެ ސިޔާސަތުތައް ފުރިހަމައަށް ތަންފީޒުވެވެން އަންނާނެ މަގަކީ ޖުމްހޫރީ ޕާޓީ އިސްވެ އޮވެ އިންތިހާބުގައި ވާދަކުރުން ކަމަށް ވާތީ އޭނާ ވެސް ބޭނުންވަނީ އެ ގޮތް ކަމަށެވެ.
ހަސަން ނިހާދު ނަމަކަށް ކިޔާ ޒުވާނަކު ވެސް ބުނީ ރާއްޖޭގެ މައި ދެ ސިޔާސީ ޕާޓީ ތަޖުރިބާކުރެވުމަށް ފަހު، ދެން އެހެން އިހުތިޔާރަކަށް ދިވެހިން ބޭނުން ވެފައިވާ ކަމަށެވެ. އެހެންކަމުން މިހާރު އޮތް ކޯލިޝަން ދެމެހެއްޓުމުގެ ބަދަލުގައި އޭނާ ވެސް ބޭނުންވަނީ، އޭނާ ނިސްބަތްވާ ޖޭޕީން އިންތިހާބަށް ނުކުތުމަށެވެ.
ސެޕްޓެމްބަރު މަހުގެ ނުވަވަނަ ދުވަހު އޮންނަ ރިޔާސީ އިންތިހާބުގެ ވާދަވެރިކަމާއި، އެ އިންތިހާބު ކާމިޔާބު ކުރުމަށް ރައީސް އިބްރާހީމް މުހައްމަދު ސޯލިހު ކޯލިޝަނެއް އުފައްދަން ކުރާ މަސައްކަތާއި، ޖުމްހޫރީ ޕާޓީއާއި އެ ޕާޓީގެ ލީޑަރު ގާސިމް އިބްރާހީމްގެ ސިޔާސީ މުސްތަގުބަލާއި، މުޅި ގައުމުގެ ސިޔާސީ މުސްތަގުބަލު އޮންނާނެ ގިޮތުގެ ތަސްވީރު ފުރިހަމަކުރުން މިި ވަގުތަށް ހުއްޓިފައި މި އޮތީ ޖޭޕީގެ މި ކޮންގްރެސްއަށެވެ.
