ކުރީގެ ރައީސް އަބްދުﷲ ޔާމީންއާއެކު މޯލްޑިވްސް ޑިމޮކްރެޓިކް އެލަޔަންސްއިން ހެދި ކޯލިޝަން އެއްބަސްވުމުގެ ދަށުން އެ ޕާޓީއަށް ލިބެން ޖެހޭ 10 ޕަސެންޓު ވެސް ނުލިބޭ ކަމަށް ބުނެފި އެވެ.
އެމްޑީއޭއިން 2013 ވަނަ އަހަރުގެ އިންތިހާބަށް ނިކުތީ ޕީޕީއެމްގެ ކޯލިޝަން ޕާޓުނަރެއްގެ ގޮތުގަ އެވެ. އަދި، 2014 ގެ މަޖިލިސް އިންތިހާބުގައި ވެސް އެމްޑީއޭއިން ވާދަކުރީ ޕީޕީއެމްއާ އެކު ކޯލިޝަން ހަދައިގެންނެވެ. އެފަހަރު އެ ޕާޓީން މަޖިލީހުގެ ފަސް ގޮނޑި ކާމިޔާބު ކުރި އެވެ.
އެއަށްފަހު ވެސް ޕީޕީއެމްއާ އެކު ތަފާތު އެކި މަސައްކަތްތައް ކުރުމަށްފަހު 2018 ވަނަ އިންތިހާބަށް ޕީޕީއެމްއިން ކުރިމަތިލީ އެމްޑީއޭގެ ތާއީދާ ނުލަ އެވެ. އެއީ ކޯލިޝަންގެ އެގްރީމެންޓު ހަމަވުމުންނެވެ.
މީދޫ ދާއިރާގެ މެންބަރު އަދި ވިޔަފާރިވެރިޔާ އަހުމަދު ސިޔާމް މުހައްމަދުގެ އެމްޑީއޭއިން މިއަދު ވަނީ ކުރިއަށް އޮތް ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހަށް ތާއީދު ކުރަން ނިންމައިފަ އެވެ.
އެ ޕާޓީން އެމްޑީޕީއާއެކު ކޯލިޝަން ހަދަން ނިންމާފައިވަނީ އިދިކޮޅު ޕީޕީއެމް އިން ވެސް ކޯލިޝަން ހެދުމަށް ދައުވަތު ދީފައި ވަނިކޮށެވެ.
އެމްޑީއޭއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ޕާޓީގެ ނައިބު ރައީސް އަލީ މައުރޫފް ވިދާޅުވީ ޔާމީނާއެކު ހެދި ކޯލިޝަންގެ ތަޖުރިބާ އެމްޑީއޭއަށް ހިތި ކަމަށެވެ.
"ކޯލިޝަން ސަރުކާރެއްގައި އަޅުގަނޑުމެން ތަހައްމަލު ކުރަމުން ދިޔައީ ވަރަށް ހިތްދަތިކަން،" މައުރޫފް ވިދާޅުވި އެވެ.
އެހެންނަމަވެސް އެ ކޯލިޝަން ވެރިކަން ނިމެން ދެން ދެމެހެއްޓީ ގައުމީ މަސްލަހަތަށް ކަމަށް އޭނާ ވިދާޅުވި އެވެ.
މައުރޫފް ވިދާޅުވީ އެ ޕާޓީން ހިތް ނޭދޭ އެތައް ކަމެއް ޔާމީންގެ ވެރިކަމުގައި ކުރިމަތިވި ކަމަށާއި ދެ ވަނަ ދައުރަކަށް ނުދާން ނިންމީ ވެސް އެ ސަބަބަށްޓަކައި ކަމަށެވެ.
"އަދި އަޅުގަނޑުމެންނާއެކީ ކޯލިޝަންގައި ހެދި އެއްބަސްވުމުގައި އޮތް 20 ޕަސެންޓުގެ ތެރެއިން އަޅުގަނޑުމެންނަށް 10 ޕަސެންޓު ވެސް ނުލިބޭ،" މައުރޫފް ވިދާޅުވި އެވެ.
އެމްޑީއޭއިން ކޯލިޝަން ހަދަނީ ސަރުކާރުން ލިބޭނެ މަންފާ އާއި މަގާމުތަކަށް ނޫން ކަމަށް ވިދާޅުވެ މައުރޫފް އިތުރަށް ވިދާޅުވީ އެ ޕާޓީން ކޯލިޝަން ހަދަނީ ގައުމާއި ރައްޔިތުންނަށް ކަމަށެވެ.
