ފޯ ނޭޝަންސް ކަޕްގައި މިރޭ ސިންގަޕޫރު ސީދާ ތިން ސެޓުން ބަލިކޮށް ގައުމީ ފިރިހެން ވޮލީބޯޅަ ޓީމުން ފުރަތަމަ މޮޅު ހޯދައިފި އެވެ.
މިއީ ގައުމީ ޓީމުގެ ކޯޗުކަމާ ބްރެޒިލްގެ ސާޖިއޯ ވެލޯސޯ ހަވާލުވި ފަހުން ޓީމު މޮޅުވި ފުރަތަމަ މެޗެވެ. އޭނާ ކޯޗުކޮށްދިން ފުރަތަމަ މެޗުގައި ރޭ މެލޭޝިއާ އަތުން ރާއްޖެ ބަލިވީ 3-1 އިންނެވެ. ސިންގަޕޫރުގެ ކޯޗަކަށް ހުރީ ކުރިން ރާއްޖޭގެ ޓީމަށް އިރުޝާދުދިން ތައިލެންޑްގެ ސުންޓޮން ފޮސީޓާ އެވެ.
މި މެޗުން މޮޅުވުމުން ލީގު ބުރުގެ އެއް ވަނަ އަށް ދިޔުމުގެ ފުރުސަތު ރާއްޖެ އަށް އެބައޮތެވެ. ރާއްޖެ ޖެހޭނީ ފަސް ސެޓަށް ނުގޮސް އަފްގާނިސްތާން ބަލިކުރާށެވެ. މިރޭ، ސިންގަޕޫރު އަތުން މޮޅުވި މެޗުގައި ގައުމީ ޓީމުން ސެޓުތައް ގެންދިޔައީ 26-24، 25-20 އަދި 25-21 އިންނެވެ.
މެޗުގެ ފުރަތަމަ ސެޓު ސިންގަޕޫރުން ފެށި ވަރުގަދަކޮށެވެ. ހަތަރު ޕޮއިންޓްގެ ލީޑަކާ އެކު ފެށި ނަމަވެސް ރާއްޖެއިން މަޑު މަޑުން ސްކޯ ކައިރިކޮށް 8-8 އިން އެއްވަރުކުރި އެވެ. އޭގެ ފަހުން ދިވެހި ޓީމަށް ހެދުނު ގޯސްތަކެއްގެ ފައިދާ ނަގައި ސިންގަޕޫރު ޓީމުން ހަތަރު ޕޮއިންޓް ލީޑެއް ނެގި އެވެ. މި ލީޑު ދެ ޕޮއިންޓަށް ހަނިކުރި ނަމަވެސް އަރާ ހަމަކުރެވޭ ގޮތެއް ނުވި އެވެ.
މި ސެޓުގެ އޮއިވަރު ބަދަލުވީ ރާއްޖެ އިން ގެނައި ދެ ބަދަލާއިއެކުގަ އެވެ. މިގޮތުން ހުސައިން ޝާހިދު (ޝާޑު) އާއި ހައިލަމް ހަސަން ކުޅެން އަރުވައި 19-19 އިން ސްކޯ އެއްވަރުކުރި އެވެ. އޭގެ ފަހުން 21-20 އިން ފުރަތަމަ ފަހަރަށް ރާއްޖެއިން މި ސެޓުގައި ލީޑު ނެގި އެވެ. މި ލީޑުގައި އޮވެ ސެޓު ނިންމާލުމުގެ ކުރިން ސިންގަޕޫރުން 23-23 އިން އެއްވަރުކުރި އެވެ. އަނެއްކާވެސް ރާއްޖޭގެ ކެޕްޓަން އަލީ ހުޒާމް (ހުޒަންޓެ)ގެ ބާރު ދެ ހަމަލާއަކުން ރާއްޖެއިން މުހިންމު ޕޮއިންޓްތަކެއް ހޯދައި 26-24 އިން ސެޓު ކާމިޔާބުކުރި އެވެ.
ދެވަނަ ސެޓު ފަށައިގެން ވާދަވެރިކޮށް ދިޔަ ނަމަވެސް ރާއްޖެ އިން ވަނީ އެޓޭކް ވަރުގަދަކޮށް ލީޑު ނަގައި އެ ލީޑު ފުޅާކޮށްފަ އެވެ. ފުރަތަމަ ސެޓު ނިންމާލިއިރު، ކުޅުނު ފޯމުގައި ގިނަ ކުޅުންތެރިން ފެނުނުއިރު، ސިންގަޕޫރު ޓީމުން މިސްޓޭކްތައް ހަދަން ފެށި އެވެ. އޭގެ ފައިދާ ނަގައި ސެޓުގެ މެދުތެރެއިން ހަތަރު ޕޮއިންޓްގެ ލީޑެއް ނެގި އެވެ. 18-16 އަށް ސިންގަޕޫރުން ސްކޯ ކައިރިކުރި ނަމަވެސް ހަސަން ނިލާމް (ޕާޓޭ) އާއި ހުޒާމްގެ ބާރު ހަމަލާތަކުން ރައްޖެ އިން އަނެއްކާވެސް ހަތަރު ޕޮއިންޓްގެ ލީޑު ހޯދި އެވެ. އެ ފޯމުގައި ގޮސް ރާއްޖެއިން ދެ ވަނަ ސެޓު ހޯދީ 25-20 އިންނެވެ.
މެޗުގެ ތިން ވަނަ ސެޓުވެސް ރާއްޖެ ފެށީ ފޯމުގަ އެވެ. މި ގޮތުން ސެޓުގެ އެންމެ ކުރީކޮޅު ލީޑެއް ނަގައި އެ ލީޑު ދެމެހެއްޓި އެވެ. މި ސެޓުގައި ރާއްޖޭގެ ބްލޮކްތަކާއި ޑިފެންސް ކުޅުންތެރިންގެ މަސައްކަތް މިދިޔަ ސެޓެކޭ އެއްގޮތަށް ފާހަގަވި އެވެ. ހަތަރު ޕޮއިންޓްގެ ލީޑެއްގައި އޮވެ ކުޅެމުން ދަނިކޮށް ސިންގަޕޫރުން 17-15 އަށް ސްކޯ ކައިރިކުރި އެވެ. އެ ވަގުތު ރާއްޖޭގެ ކޯޗު ވެލޯސޯ ވަނީ ޓީމު ހަމައަކަށް އަޅުވައިފަ އެވެ. ލީޑު ގެއްލުނަނުދީ ހިފަހައްޓައި ރާއްޖެއިން ވަނީ 25-20 އިން މި ސެޓު ހޯދައި މެޗު ކާމިޔާބުކޮށްފަ އެވެ.
ފަހު ސެޓުގައިވެސް މެޗުގެ މޮޅު ކުޅުންތެރިޔާގެ މަގާމް ހޯދި ނިލާމްގެ ބާރު ހަމަލާތައް ހުއްޓުވުމުގައި ސިންގަޕޫރަށް އުނދަގޫތައް ކުރިމަތިވި އެވެ.
ލީގު ބުރުގައި ރާއްޖެ ކުޅޭ ފަހު މެޗުގައި ނުކުންނާނީ މާދަމާރޭ އަފްގާނިސްތާނާ ދެކޮޅަށެވެ. ސިންގަޕޫރަށް އޮތީ މެލޭޝިއާ އާ ދެކޮޅަށް ކުޅޭ މެޗެވެ.
