އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި އެމްޑީޕީއާއެކު ކޯލިޝަން ހެދުމަށް މީދޫ ދާއިރާގެ މެމްބަރު އަދި ވިޔަފާރިވެރިޔާ އަހުމަދު ސިޔާމް މުހައްމަދުގެ އެމްޑީއޭއިން މިއަދު ނިންމުމާ ގުޅިގެން ރައީސް އިބްރާހިމް މުހައްމަދު ސޯލިހާއި އެމްޑީޕީން އެކަމަށް މަރުހަބާ ކިޔައިފި އެވެ.
އެމްޑީއޭއިން ބުނީ ކޯލިޝަން ހަދަން ނިންމީ ދިވެހިރައްޔިތުންގެ ލާބަޔާ މަންފާއަށާއި ރާއްޖޭގެ ސިޔާސީ ހަމަޖެހުން ގާއިމް ކުރުމަށް ކަމަށެވެ.
އެކަމަށް މަރުހަބާ ދަންނަވައި ރައީސް ސޯލިހު ކުރެއްވި ޓްވީޓުގައި ވިދާޅުވީ އެކުގައި މަސައްކަތް ކުރާނީ މަސައްކަތްކުރާނީ ދިވެހިރާއްޖޭގެ ހަމަޖެހުމާ ތަރައްގީއާ ކުރިއެރުމަށް އަޅުގަނޑުމެން ފެށި ދަތުރު މަޑުނުޖެހި ކުރިއަށް ގެންދިޔުމަށް ކަމަށެވެ.
އެމްޑީއޭއިން ކޯލިޝަން ހެދުމަށް ނިންމުމާ ގުޅިގެން އެމްޑީޕީން މިރޭ ނެރުނު ބަޔާނެއްގައި ބުނީ ރައީސް އިބްރާހިމް މުހައްމަދު ސާލިހްގެ ވެރިކަމުގެ މި ހިނގާ ދައުރުގައި ގައުމަށް ގެނެސްދެއްވި ހަމަޖެހުން ދެމިއޮވެ ރައްޔިތުންނަށް ކުރިއެރުމާއި ފާގަތިކަން އިއްތިހާދުގެ ސަރުކާރަކުން ކަމަށް ގަބޫލުކުރާތީ ނިންމި ނިންމުމެއް ކަމަށް އެ ޕާޓީން ގަބޫލުކުރާ ކަމަށެވެ.
އެމްޑީއޭއިން އެމްޑީޕީއާއެކު ކޯލިޝަން ހެދުމުގެ ކުރިން ވަނީ އެމްޑީޕީ އާއި ޕީޕީއެމްއާއެކުގައި ވެސް ކޯލިޝަންގެ މަޝްވަރާތައް ކޮށްފަ އެވެ. ޕީޕީއެމްގެ މަޝްވަރާތަކަކީ އެ ޕާޓީގެ ރިޔާސީ ކެންޑިޑޭޓު ޔާމީން އަބްދުލްގައްޔޫމްގެ އެދުމުގެ މަތީން ކުރިއަށް ގެންދިޔަ މަޝްވަރާތަކެކެވެ.
އެމްޑީއޭއިން 2013 ވަނަ އަހަރުގެ އިންތިހާބަށް ނިކުތީ ޕީޕީއެމްގެ ކޯލިޝަން ޕާޓުނަރެއްގެ ގޮތުގަ އެވެ. އަދި، 2014 ގެ މަޖިލިސް އިންތިހާބުގައި ވެސް އެމްޑީއޭއިން ވާދަކުރީ ޕީޕީއެމްއާ އެކު ކޯލިޝަން ހަދައިގެންނެވެ. އެފަހަރު އެ ޕާޓީން މަޖިލީހުގެ ފަސް ގޮނޑި ކާމިޔާބު ކުރި އެވެ. އެންމެ ފަހުން ބޭއްވި 2018 ވަނަ އަހަރުގެ އިންތިހާބުގައި އެޕާޓީއިން އެއްވެސް ކެނޑިޑޭޓަކަށް ތާއީދެއް ނުކުރެ އެވެ.
