ކޮންމެ ބަޔަކު ވެސް ވެރިކަމަށް އަންނަނީ ޖުމްހޫރީ ޕާޓީއާއެކުގައި ނަމަވެސް ވެރިކަން ހިންގުމުގައި އެ ޕާޓީ ބައިވެރި ނުކުރާ ކަމަށް އެ ޕާޓީގެ ލީޑަރު އަދި މި ސަރުކާރުގެ ކޯލިޝަން ބައިވެރިޔާ ގާސިމް އިބްރާހިމް މިއަދު ވިދާޅުވެއްޖެ އެވެ.
ދަރުބާރުގޭގައި މިހާރު ފެށިގެން ކުރިއަށްދާ ޖުމްހޫރީ ޕާޓީގެ ކޮންގްރެސް ފެށުމުގެ ރަސްމިއްްޔާތުގައި ވާހަކަ ދައްކަވަމުން ގާސިމް ވިދާޅުވީ 2008 ވަނަ އަހަރުގެ ފަހުން ރާއްޖޭގައި އެކުލަވާލެވުނު ކޮންމެ ސަރުކާރެއްގައި އެ ޕާޓީގެ ދައުރު ވަރަށް ބޮޑު ކަމަށެވެ.
"ޖުމްހޫރީ ޕާޓީން ސީދާ ވެރިކަމަށް ނާދެވި، އަޅުގަނޑުމެންގެ ތަސައްވަރުތައް އޮޅާލަން މި ޖެހެނީ ކޮންމެ ފަހަރު ޖުމްހޫރީ ޕާޓިއާއެކު ކޯލިޝަން ހަދާ ފުރަތަމަ ރައުންޑުގައި އެއް ވަނަ ދެ ވަނަ ލިބޭ ޕާޓީއަކާ،" ގާސިމް ވިދާޅުވި އެވެ.
ކޯލިޝަން ސަރުކާރެއްގެ މެނިފެސްޓޯގެ ތެރެއަށް ޖޭޕީގެ ވިސްނުމާއި ވައުދުތައް ވައްދައިގެން މަސައްކަތް ކުރަމުން އަންނަ ކަން ފާހަގަކޮށް މި ސަރުކާރުގައި ވެސް އެންމެ ހިންގުންތެރި ވަޒީރުންނަަކީ ޖޭޕީ ސްލޮޓުތަކުގައި ތިބި ބައެއް ކަމަށް ގާސިމް ވިދާޅުވި އެވެ.
ހުރިހާ ސިޔާސަތުތަކާއި ވައުދުތައް ފުއްދުމުގައި އަދި މަޖިލިސް އިންތިހާބާއި ކައުންސިލް އިންތިހާބުގައި ވެސް ޖޭޕީ ބައިވެރިކުރުމަށް ކޯލިޝަންގައި އެދުނު ނަމަވެސް ކަން ވަނީ އެހެން ނޫން ކަމަށް ގާސިމް ވިދާޅުވި އެވެ.
"ހިތާމައަކީ ސަރުކާރު އެކުލަވާލުމަށް ފަހު ސަރުކާރުން ހާސިލް ކުރާ ރަނގަޅު ކަންކަން ޖުމްހޫރީ ޕާޓިއަށް ނިސްބަތް ކުރުމަށް ބައެއް ފަރާތްތަކުން ޖެހިލުންވާ ކަން. ސަރުކާރުން ވައުދު ފުއްދަމުން ދާއިރު ކޯލިޝަން ޕާޓްނަރުގެ ރޯލެއް އޮންނަ ކަމަކަށް ނުދެކޭ، އެކަމަކު ސަރުކާރު އެކުލަވާލަން ވީމާ ޖޭޕީ ވަރެއް ނޯވޭ،" ގާސިމް ވިދާޅުވި އެވެ.
ގާސިމް އިތުރަށް ވިދާޅުވީ ކެބިނެޓުގައާއި ކޮމްޕެނީތަކުގައި ވެސް ޖޭޕީގެ މެންބަރުން ތިއްބަވާއިރު، އެ ބޭފުޅުން ކިތަންމެ ބުރަކޮށް މަސައްކަތް ކުރެއްވި ނަމަވެސް ނެރެވޭ ހެޔޮ ނަތީޖާގައި "ބައިވެރިވުން އޮންނަ ކަމަކަށް" ނުވާ ކަމަށް ވާ "އެހީތެރިކަމެއް އޮންނަ ކަމަކަށް" ވެސް ނުވާ ކަމަށެވެ.
"މިއީ ކިހިނެއް ވާނެ ކަމެއްތޯ،" ގާސިމް ވިދާޅުވި އެވެ.
މިފަދަ ތަޖުރިބާތަކުން ޖޭޕީން އަންނަނީ އިބުރަތް ހާސިލް ކުރަމުން ކަމަށާއި 2008، 2013 އަދި 2018ގައި ވެސް ސަރުކާރުތަކަށް ވެރިކަމަށް އާދެވިފައިވަނީ ޖޭޕީގެ ސަބަބުން ކަމަށް ގާސިމް ވިދާޅުވި އެވެ.
"ޖޭޕީއާއެކު ކޯލިޝަން ނުހެދި ނަމަ އެ ޕާޓީތަކުގެ ސަރުކާރެއް ވުޖޫދެއް ނުވީސް، އެހެންކަމުން ފާއިތުވި އަދި ހިނގަމުންދާ ސަރުކާރުތަކުގެ ރަނގަޅު ކަންކަން ޖޫމްހޫރީ ޕާޓީއަށް ނިސްބަތް ވާނެ،" ގާސިމް ވިދާޅުވި އެވެ.
ޖޭޕީ މިވަގުތު އޮތީ ސަރުކާރު ހިންގާ ކޯލިޝަންގެ ބައިވެރިއެއްގެ ގޮތުގަ އެވެ. އެހެންނަމަވެސް ސަރުކާރު ހިންގުމުގައި ބައިވެރި ނުކުރާ ކަމުގެ ޝަކުވާއަކީ އަބަދުވެސް ކުރާ ޝަކުވާ އެކެވެ.
ކުރިއަށް އޮތް ރިޔާސީ އިންތިހާބުގައި ޖޭޕީން އަމަލު ކުރާނެ ގޮތެއް މިހާތަނަށް ނިންމާފައިނުވެ އެވެ.
