ކުރިއަށް އޮތް ރިޔާސީ އިންތިހާބަށް ކޯލިޝަން ހެދުމާ މެދު ގޮތެއް ނިންމާނީ ބޮޑެތި ޕާޓީތަކާއެކު އިތުރަށް މަޝްވަރާކުރުމަށްފަހު ކަމަށް އެމްޑީއޭއިން ބުނެފި އެވެ.
މިއަދު ހަވީރު "ސަންސިޔާމް ބިލްޑިން"ގައި ޕީޕީއެމްއާއެކު ބޭއްވި ބައްދަލުވުމަށް ނޫސްވެރިންނަށް މައުލޫމާތު ދެއްވަމުން އެމްޑީއޭގެ ނައިބު ރައީސް އަލީ މައުރޫފު ވިދާޅުވީ، ކުރިއަށް އޮތް ރިޔާސީ އިންތިހާބުގައި ކޯލިޝަން ހެދުމާ މެދު ގޮތެއް ނިންމުމަށް ރާއްޖޭގެ އެންމެ ބޮޑު ދެ ސިޔާސީ ޕާޓީ އެމްޑީޕީ އަދި ޕީޕީއެމްއާ އެކު އިތުރަށް މަޝްވަރާކުރާނެ ކަމަށެވެ.
"އަޅުގަނޑުމެން ވަރަށް ޔަގީންކޮށް ބުނަން ކެރޭ އެއް ވާހަކައަކީ 2023ގައި އަޅުގަނޑުމެން ކޯލިޝަން ޕާޓީއަކާއެކު ނުކުންނާނަމޭ. އަދި ކޮން ޕާޓީއެއް ކަމެއް ނުނިންމަން. އަޅުގަނޑުމެންގެ ރައީސް ގޮތެއް ނިންމަވާނީ" މައުރޫފް ވިދާޅުވި އެވެ.
މައުރޫފް ވިދާޅުވީ ކޯލިޝަން ހަދަން ނިންމީ އެޕާޓީގެ ރައީސް އަހްމަދު ސިޔާމް ރިޔާސީ އިންތިހާބުގައި ކެނޑިޑޭޓެއްގެ ގޮތުގައި ވާދަ ނުކުރުމަށް ނިންމިނިންްމުމާ އެކު އެ ޕާޓީގެ ގައުމީ މަޖިލީހުން މަޝްވަރާކުރުމަށް ފަހު ކަމަށެވެ.
އަދި ޕާޓީގެ ކައުންސިލުގެ ތެރެއިން ކޯލިޝަން މަޝްވަރާތަަކަށް ހާއްސަ ކޮމިޓީއެއް ވެސް މިހާރު އުފައްދާފައިވާނެ ކަމަށާއި، ކޯލިޝަން ހަދާނެ ޕާޓީއެއް ނިންމާނީ އެ ކޮމެޓީއިން މަޝްވަރާކޮށް ސިޔާމަށް ހުށަަހެޅުުން އެމަނިކުފާނު ކަމަށެވެ.
"ކައުންސިލުން އަޅުގަނޑުމެން ނިންމީ ނުކުމެވަޑައިނުގަންނަވާ ނަމަ[އިންތިހާބުގައި ވާދަނުކުރާ ނަމަ] ކޯލިޝަނަކާ އެކީގައި 2023ގައި ދަތުރުކުރަން. އަޅުގަނޑުމެންނަކީ ސިޔާސީ ޕާޓީއެއް ވީމަ އެއްވެސް ހާލަތެއްގައި ސިޔާސީ ގޮތުން މަރުވާކަށް ބޭނުމެއް ނެތޭ،" މައުރޫފް ވިދާޅުވި އެވެ.
"އަދަދު"އިން ކުރި ސުވާލަކަށް ޖަވާބުދެއްވަމުން މައުރޫފް ވިދާޅުވީ މާދަމާ އޮންނަ އެޕާޓީގެ ކައުންސިލް ބައްދަލުވުމުގައި އެމްޑީޕީ އަދި ޕީޕީއެމްއާއެކު ކުރެވުނު މަޝްވަރާތަކުގައި ހުށަހެޅުނު ހުށަހެޅުންތަކާ ގުޅޭގޮތުން މަޝްވަރާކުރާނެ ކަމަށެވެ.
އަދި ކޯލިޝަން ހެދުމާމެދު ގޮތެއް ނިންމޭނީ ކިހާ މުއްދަތެއްގެ ތެރޭގައިކަން ދަންނަވަން އަދި ދަތިކަމަށް ވެސް އޭނާ ވިދާޅުވި އެވެ.
ކުރިއަށް އޮތް ރިޔާސީ އިންތިހާބުގައި ޖޭޕީއާ އެކު ކޯލިޝަން ހެދުމާ ގުޅޭގޮތުން މަޝްވަރާކުރުމަށް ބައްދަލުކުރުމަށް އެ ޕާޓީން އެދިފައި ނުވާކަމަށް އެމްޑީއޭގެ މިއަދުގެ ބައްދަލުވުމުގައި މައުރޫފް ވިދާޅުވި އެވެ. އެހެން ނަމަވެސް ނުރަސްމީގޮތެއްގައި ވިޔަސް އެވާހަަަތައް ޖޭޕީއާއެކު ވެސް ދެކެވެމުން އަންނަ ކަމަށް މައުރޫފް ވިދާާޅުވި އެވެ.
އެމްޑީއޭއިން 2013 ވަނަ އަހަރުގެ އިންތިހާބަށް ނުކުތީ ޕީޕީއެމްގެ ކޯލިޝަން ޕާޓުނަރެއްގެ ގޮތުގަ އެވެ. އަދި، 2014 ގެ މަޖިލިސް އިންތިހާބުގައި ވެސް އެމްޑީއޭއިން ވާދަކުރީ ޕީޕީއެމްއާ އެކު ކޯލިޝަން ހަދައިގެންނެވެ. އެފަހަރު އެ ޕާޓީން މަޖިލީހުގެ ދެ ގޮނޑި ކާމިޔާބު ކުރި އެވެ. އެންމެ ފަހުން ބޭއްވި 2018 ވަނަ އަހަރުގެ އިންތިހާބުގައި އެޕާޓީއިން އެއްވެސް ކެނޑިޑޭޓަކަށް ތާއީދެއް ނުކުރެ އެވެ.
