ކުރިއަށް އޮތް ރިޔާސީ އިންތިހާބުގައި އިދިކޮޅު ޕީޕީއެމް/ ޕީއެންސީއާ އެކު ކޯލިޝަން ހެދުމުގެ ދައުވަތުދީ، ޕާޓީގެ ލީޑާޝިޕު ދ. މީދޫ ދާއިރާގެ މެމްބަރު އަހްމަދު ސިޔާމް މުހައްމަދު އަރިހަށް ދާން ނިންމައިފި އެވެ.
ސިޔާމްގެ މޯލްޑިވްސް ޑިވެލޮޕްމަންޓު އެލަޔަންސް (އެމްޑީއޭ) އިން މިއަދު ބުނި ގޮތުގައި ކޯލިޝަން ހެދުމުގެ ރަސްމީ ދައުވަތު އިދިކޮޅުން މިއަދު ވަނީ ފޮނުވައިފަ އެވެ.
އެކަމާ ގުޅިގެން އިދިކޮޅުގެ ތަރުޖަމާނު ހީނާ ވަލީދު "އަދަދު" އަށް ވިދާޅުވީ ކޯލިޝަން ހެދުމުގެ ދައުވަތު ސިޔާމަށް ދިނުމަށް ދޭން ނިންމާފައިވަނީ އިދިކޮޅުގެ ރިޔާސީ ކެންޑިޑޭޓު ޔާމީން އަބްދުލްގައްޔޫމްގެ އިރުޝާދުގެ ދަށުން ކަމަށެވެ.
ކޯލިޝަންގެ މަޝްވަރާ ކުރިއަށް ދާނީ މިއަދު ހަވީރު 5:00 ގައި ސަން ސިޔާމް ބިލްޑިންގައި ކަމަށް ވެސް އޭނާ ވިދާޅުވި އެވެ.
އެމްޑީއޭއިން އިއްޔެ ބޭއްވި ބައްދަލުވުމުގައި ނިންމާފައި ވަނީ ރިޔާސީ އިންތިހާބުގައި އެމްޑީއޭގެ ފަރާތުން ނުކުންނާނީ ކޯލިޝަން ޕާޓުނަރެއްގެ ގޮތުގައި ކަމަށެވެ. ނަމަވެސް, ކޯލިޝަން ހަދާނެ ވަކި ޕާޓީއެއް އަދި ނިންމާފައި ނުވެ އެވެ.
އިދިކޮޅުން ސިޔާމާއެކު ކޯލިޝަން ހެދުމަށް ދައުވަތު ދީފައިވާއިރު، ސިޔާމާއެކު ކުރިން ހެދި ކޯލިޝަނުގެ ތަޖުރިބާ ހިތި ކަމަށާއި މީގެ ފަހުން އެއްވެސް އިންތިހާބެއްގައި ކޯލިޝަން ނުހަދާނެ ކަމަށް ޔާމީން މީގެ ކުރިން ވަނީ ވިދާޅުވެފަ އެވެ.
އެމްޑީއޭއިން 2013 ވަނަ އަހަރުގެ އިންތިހާބަށް ނުކުތީ ޕީޕީއެމްގެ ކޯލިޝަން ޕާޓުނަރެއްގެ ގޮތުގަ އެވެ. އަދި، 2014 ގެ މަޖިލިސް އިންތިހާބުގައި ވެސް އެމްޑީއޭއިން ވާދަކުރީ ޕީޕީއެމްއާ އެކު ކޯލިޝަން ހަދައިގެންނެވެ. އެފަހަރު އެ ޕާޓީން މަޖިލީހުގެ ދެ ގޮނޑި ކާމިޔާބު ކުރި އެވެ.
އެއަށްފަހު ވެސް ޕީޕީއެމްއާ އެކު ތަފާތު އެކި މަސައްކަތްތައް ކުރުމަށްފަހު 2018 ވަނަ އިންތިހާބަށް ޕީޕީއެމްއިން ކުރިމަތިލީ އެމްޑީއޭގެ ތާއީދާ ނުލަ އެވެ. އެއީ ކޯލިޝަންގެ އެގްރީމެންޓު ހަމަވުމުންނެވެ. އެމްޑީއޭއިން އެ އިންތިހާބުގައި ރަސްމީކޮށް އެއްވެސް ކެންޑިޑޭޓަކަށް ތާއީދެއް ނުކުރެ އެވެ.
