ސަރުކާރުގެ އަމާޒަކީ ވޭސްޓް މެނޭޖްމަންޓް ކޯޕަރޭޝަން، ވެމްކޯއަކީ ފަންނީ ގޮތުންނާއި މާލީ ގޮތުން ގާބިލް ކުންފުންޏަކަށް ހެދުން ކަމަށް އެންވައިރަމެންޓް މިނިސްޓަރު އައިމިނަތު ޝައުނާ ރޭ ވިދާޅުވެއްޖެ އެވެ.
ވެމްކޯގެ ހަތް ވަނަ އަހަރީ ދުވަހުގެ މުނާސަބަތުގައި ބޭއްވި ރަސްމިއްޔާތު ޝަރަފުކޮށްދެއްވައި ޝައުނާ ވިދާޅުވީ ރާއްޖޭގެ އެންމެ އުތުރާއި އެންމެ ދެކުނުގައި ގާއިމްކުރެވޭ ސަރަޙައްދީ ކުނި މެނޭޖްކުރާ މަރުކަޒުތައް ހިންގާ ބެލެހެއްޓުމުގެ ޒިންމާ އަދާކުރާ ބަޔަކީ ވެމްކޯ ކަމަށެވެ.
ގްރޭޓާ މާލެ ވޭސްޓު-ޓު-އެނަރޖީ ޕްރޮޖެކްޓްގެ މަސައްކަތް މެދުކެނޑުމެއްނެތި ކުރިއަށް ދާ ކަން ފާހަގަކުރައްވައި ޝައުނާ ވިދާޅުވީ މި ނިޒާމަށް ބޭނުންވާ ކުނި ތިލަފުށްޓަށް ގެނައުމާއި، ކުނި ވަކިކުރުމާއި، ޝްރެޑްކުރުމާއި ބޭލްކުރުންފަދަ މުހިންމު މަސައްކަތްތައް މިހާރު ވެސް ކުރަމުން އަންނަ ކަމަށެވެ.
އަދި، މި ޕްރޮޖެކްޓުގެ ތެރެއިން ވެމްކޯއިން ކުރާ މަސައްކަތްތަކަކީ ބައިނަލްއަގުވާމީ މިންގަނޑުތަކަށް ފެތޭ މަސައްކަތަކަށް ހެދުމަށް ފަންނީ ކޮންސަލްޓަންޓުންގެ އެހީތެރިކަން ފޯރުކޮށްދެވިގެންދާނެ ކަމަށެވެ.
"ވެމްކޯއަކީ ކުނިމެނޭޖްކުރުމުގެ ޒަމާނީ އާލާތްތަކާއެކު ފައްކާކުރެވެމުން އަންނަ އަދި ކުނި މެނޭޖްކުރުމަށް އިންގިލާބީ ބަދަލެއް ގެންނާނެ ކުންފުންޏެއް،" ޝައުނާ ވިދާޅުވި އެވެ.
ޝައުނާ ވިދާޅުވީ ރާއްޖޭގެ ރަށްރަށުގެ ފުނިޖެހިފައިވާ ކުނިތައް ނަގައި، ކުނި މެނޭޖުކުރުކުމުގައި ގޮންޖެހުންތައް ފިލުވާ ބަޔަކީ ވެމްކޯ ކަމަށެވެ.
"ޖުމްލަ 48 ރަށަކުން ކުނި ނަގައި ސާފުކުރެވިފައިވޭ، އޭގެތެރޭގައި ލެގަސީ ވޭސްޓް ކްލީންއަޕް ޕްރޮގްރާމްގެ ދަށުން ކުނީގެ މައްސަލަ އެންމެ ބޮޑަށް ދިމާވެފައިވާ 20 ރަށަކުން ގާތްގަނޑަކަށް 155400 ޓަނުގެ ކުނި ނަގައި ސާފުކުރެވިފައިވޭ، އަދި ސައުތް މާލެ އަތޮޅުގެ 8 ރަށަކުން ގާތްގަނޑަކަށް 5100 ޓަނުގެ ކުނި ސާފުކުރެވިފައިވޭ،" ޝައުނާ ވިދާޅުވި އެވެ.
ވެމްކޯއަކީ ހަމައެކަނި ކުނި ނަގައި ސާފުކުރުމުގެ މަސައްކަތް ކުރާ ކުންފުންޏަކަށް ވުރެ، ރައްކާތެރި ގޮތުގައި ކުނި މެނޭޖްކުރުމުގެ ހުރިހާ މަސައްކަތެއް ކުރަމުން އަންނަ ފަންނީ ގޮތުންނާއި މާލީ ގޮތުން ގާބިލް ކުންފުންޏަކަށް ހެދުމަށް ސަރުކާރުން މަސައްކަތް ކުރަމުން އަންނަ ކަމަށް ވެސް މިނިސްޓަރު ވިދާޅުވި އެވެ.
