ރާއްޖޭގައި ހުންނަ އިންޑިއާ ހައި ކޮމިޝަނުގައި ހުޅުޖަހަން ގޮވާލި މައްސަލާގައި އައްބާސް އާދިލް ރިޒާގެ މައްޗަށް ދައުވާކޮށްފި އެވެ.
ޕްރޮސެކިއުޓާ ޖެނެރަލް (ޕީޖީ) އޮފީހުުން މީޑިއާތަކަށް ފޮނުވި މެސެޖެއްގައިވާ ގޮތުން އައްބާސްގެ މައްޗަށް އުފުލާފައިވަނީ ފަނާކޮށްފާނެ ކަމުގެ ބިރު ދެއްކުމުގެ ދައުވާ އެވެ. އޭގެ އަސާސީ އަދަބަކީ އެއް އަހަރާއި ހަތް މަހާއި ހަ ދުވަހުގެ މުއްދަތަކަށް ޖަލަށް ލުމެވެ.
ޕީޖީ އޮފީހުން ބުނި ގޮތުގައި، އެ ދައުވާ އުފުލާފައިވަނީ އިންޑިއާ ހައި ކޮމިޝަނުގައި ހުޅު ޖަހަން ގޮވުމުގެ އިތުރަށް، ކްލަބް ހައުސްގައި ވާހަކަ ދައްކަމުން ކުރީގެ ރައީސް އަބްދުﷲ ޔާމީންގެ މައްޗަށް ކުރި ހުކުމާ ދެކޮޅަށް މާލޭގެ އެކި ތަންތަނުގައި ހުޅުޖަހައި ހަމަނުޖެހުން ހިންގަން ހިތްވަރު ދީފައިވާތީ އެވެ.
މިދިޔަ ޑިސެމްބަރު މަހުގެ 25 ވަނަ ދުވަހު މި މައްސަލާގައި އައްބާސް ހައްޔަރު ވެސް ކުރި އެވެ. އެ ފަހުން ބަންދުގައި ދުވަސްތަކެއް ވަން ދެން ބެހެއްޓުމަށް ފަހު އޭނާ ދޫކޮށްލީ މިދިޔަ ޖެނުއަރީ މަހުގެ 13 ވަނަ ދުވަހުގަ އެވެ.
އައްބާސްއަކީ ޔާމީނުގެ ވެރިކަމުގައި ސަރުކާރުގެ ތަރުޖަމާނުކަން ވެސް ކުރެއްވި ފަރާތެކެވެ. އަދި ކޮމިޝަނާ ޖެނެރަލް އޮފް ކަސްޓަމްސްގެ މަގާމާއި މެލޭޝިޔާގައި ހުންނަ ސަރުކާރުގެ ޓްރޭޑް ރެޕްރެޒެންޓިވްގެ މަގާމު ވެސް އެ ވެރިކަމުގެ ތެރޭގައި ފުރުއްވި އެވެ. އަދި ކުރީގެ ރައީސް މުހައްމަދު ވަހީދުގެ ވެރިކަމުގައި ފިނޭންސް މިނިސްޓްރީގެ ސްޓޭޓް މިނިސްޓަރުކަން ވެސް ކުރެއްވި އެވެ.
