ކުޑަކުއްޖަކާ ބެހުނު ބިދޭސީއެއްގެ މައްސަލަ އިސްތިއުނާާފު ކުރަމުން ދަނިކޮށް އޭނާ ޑީޕޯޓުކޮށްލީ މައްސަލަ ބަލާކަން ރަސްމީކޮށް ނާންގާތީ ކަމަށް އިމިގްރޭޝަނުން ބުނެފި އެވެ.
ޑީޕޯޓުކޮށްލި އިންޑިއާގެ ރައްޔިތެއް ކަމަށްވާ ރަމޭޝް ސިލްވަމޮނީގެ މައްޗަށް އެ މައްސަލަ ސާބިތު ނުވާކަމަށް ކްރިމިނަލް ކޯޓުން ނިންމާފައި ވަނީ މިދިޔަ ސެޕްޓެމްބަރު މަހުގެ ތެރޭގަ އެވެ.
މައްސަލަ ސާބިތު ނުވާކަމަށް ކްރިމިނަލް ކޯޓުން ނިންމުމާ ގުޅިގެން އޭނާ ޑީޕޯޓުކޮށްލާފައި ވަނީ މިދިޔަ ޑިސެމްބަރު މަހުގެ އަށް ވަނަ ދުވަހު އެވެ.
އެ ދުވަހަކީ ރަމޭޝްގެ މައްސަލަ ހައިކޯޓުގައި އިސްތިއުނާފްކުރި ދުވަސް ކަމަށް ވެއެވެ. އޭނާ ޑީޕޯޓުކޮށްލިއިރު އޭނާއާ ގުޅޭ އެއްވެސް މައްސަލައެއް ބަލަމުން ދާކަން ނޭނގޭ ކަމަށް އިމިގްރޭޝަނުން މިކަމާ ގުޅިގެން ރޭ ނެރުނު ބަޔާނެއްގައި ވަނީ ބުނެފަ އެވެ.
"ރާއްޖެއިން ޑީޕޯޓުކޮށްލުމާ ހަމައަށް ވެސް އޭނާއާ ގުޅޭ އެއްވެސް ޖިނާއީ މައްސަލައެއް ދިވެހިރާއްޖޭގެ އެއްވެސް ކޯޓެއްގައި އިސްތިއުނާފުކޮށްފައިވާކަން ޕްރޮސެކިއުޓާ ޖެނެރަލް އޮފީހުން މި އިދާރާއަށް އަންގާފައިނުވާކަމާއި، ރަމޭޝް ސިލްވަމޮނީގެ ރާއްޖެއިން ފުރުން މަނާކުރާ އެއްވެސް އަމުރެއް މި އިދާރާއަށް ލިބިފައި ނުވާކަމުގައިވެސް ދަންނަވަމެވެ،" އިމިގްރޭޝަނުގެ ބަޔާނުގައި ވެއެވެ.
ރަމޭޝްގެ މައްޗަށް ކޮށްފައިވަނީ ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަސްތުގައި އަތްލުމުގެ ކުށުގެ ދައުވާ އެވެ. އެ ދައުވާއަށް އޭނާ އިންކާރުކުރި އެވެ.
މި މައްސަލަ ސާބިތު ނުވާކަމަށް ކްރިމިނަލް ކޯޓުން އޭރު ހުކުމްކުރި އިރު، ދައުލަަތުން ވަނީ މިކަމާ ގުޅޭ ގިނަ ހެކިތަކެއް އޭނާއާ ދެކޮޅަށް ހުށަހަޅާފަ އެވެ.
