ކުށްކޮށްގެން ހޯދާ މުދަލާއި ފައިސާ ދައުލަތަށް ނެގުމުގެ ނިޒާމު ރާއްޖޭގައި އޮތްގޮތް ދެނެގަތުމުގެ ގޮތުން އެންޓި-ކޮރަޕްޝަން ކޮމިޝަން (އޭސީސީ) އިން ހެދި ދިރާސާ ނިންމައި، ރިޕޯޓު އާންމުކޮށްފި އެވެ.
މި ދިރާސާ އާންމުކޮށްފައި ވަނީ އެކަމަށްޓަަކައި ރޭ ބޭއްވި ހާއްސަ ރަސްމިއްޔާތެއްގަ އެވެ. އޭސީސީގެ އިސްނެގުމުގެ މަތިން ހަދާފައިވާ މި ދިރާސާގައި ވަނީ ކުށްކޮށްގެން ހޯދާ މުދަލާއި ފައިސާ އަނބުރާ ހޯދުމަށް ރާއްޖޭގައި އެކަށީގެންވާ ނިޒާމުތަކާއި ގާނޫނު އޮނިގަނޑު އޮތް ގޮތާއި އެކަމުގައި ހުރި މައްސަލަތައް ބަލާފައި އެވެ.
އޭސީސީން ބުނީ މި ދިރާސާގައި ބޭނުންކޮށްފައި ވަނީ ޑޮކްޓްރިނަލް ލީގަލް ރިސާޗް މެތަޑު ކަމަށެވެ. އަދި ދިރާސާގައި ކުށްކޮށްގެން ހޯދާ މުދަލާއި ފައިސާ އަނބުރާ ދައުލަތަށް ހޯދުމުގެ ގާނޫނީ ނިޒާމު ރާއްޖޭގައި އޮންނަ ގޮތް ދެނެގަތުމަށް، ކަމާގުޅުންހުރި ގާނޫނީ ލިޔެކިޔުން ދިރާސާ ކޮށްފައިވާނެ ކަމަށް އެ ކޮމިޝަނުން ބުނެ އެވެ.
ދިރާސާގެ ހޯދުންތަކާ ބެހޭގޮތުން އޭސީސީން ބުނީ ޖިނާއީ އަދުލުގެ ނިޒާމުގެ ތެރެއިން ކޮރަޕްޝަނުގެ ކުށްކޮށްގެން ހޯދާ މުދަލާއި ފައިސާ ދައުލަތަށް ނެގޭނީ، ކޮރަޕްޝަންގެ ކުށް ކޮށްގެން ހޯދާ މުދަލާއި ފައިސާ ދައުލަތަށް ނެގޭނެކަން ގާނޫނަކުން ކަނޑައެޅިގެން ބަޔާންކޮށްފައިވާނެ ކަމަށެވެ. އެހެން ނަމަވެސް، މިވަގުތު ކޮރަޕްޝަންގެ ކުށްކޮށްގެން ހޯދާ މުދަލާއި ފައިސާ ދައުލަތަށް ނެގޭނެކަން ގާނޫނަކުން ނައްސުން ކަނޑައެޅިގެން ބަޔާންކޮށްފައި ނުވާ ކަމަސެވެ.
ހަމައެއާއެކު އެސެޓް ރިކަވާ ކުރުމަށް ވަށާޖެހޭ ގާނޫނެއް ނެތުމުން ދިމާވާ ގޮންޖެހުންތައް ވެސް ދިރާސާއިން ފާހަގަކުރެވިފައިވާ ކަމަށް އެ ކޮމިޝަނުން ބުނެފައި ވެއެވެ.
މިހާރު އޭސީސީގެ ވެބްސައިޓުގައި އާންމުކޮށްފައިވާ އެ ދިރާސާ ރިޕޯޓުގައި ވަނީ ދިރާސާއިން ފާހަގަކުރެވުނު މައްސަލަތައް ހައްލުކުރުމަށް ނިޒާމަށް ގެންނަން ފެންނަ މައިގަނޑު އަށް ލަފައެއް ހުށަހަޅާފަ އެވެ.
