އަންނަ ސެޕްޓެމްބަރު މަހު އޮންނަ ރިޔާސީ އިންތިހާބުގައި ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޓިކެޓުގައި ވާދަކުރައްވާ މިހާރުގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ކޯލިޝަން ހެދުމުގެ ބާރު ދިނުމަށް އެ ޕާޓީގެ ގައުމީ މަޖިލީހުން ފާސްކޮށްފި އެވެ.
ޖެނުއަރީ މަހުގެ 28 ވަނަ ދުވަހު ބޭއްވި އެމްޑީޕީގެ ޕްރައިމަރީ އިންތިހާބު ބޮޑު ފަރަގަކުން ކާމިޔާބުކުރެއްވީ ރައީސް ސޯލިހު އެވެ. އެ އިންތިހާބުގައި ދެން ވާދަކުރެއްވީ އެމްޑީޕީގެ ރައީސް މުހައްމަދު ނަޝީދެވެ. ނަޝީދަށް ލިބިވަޑައިގަތީ 39 އިންސައްތަ ވޯޓެވެ. އިންތިހާބު ކާމިޔާބު ކުރެއްވި ރައީސް ސޯލިހަށް ލިބިވަޑައިގަތީ 61 އިންސައްތަ ވޯޓެވެ.
މިރޭ ބޭއްވި އެ ޕާޓީގެ ގައުމީ މަޖިލީހުގެ ޖަލްސާގައި 80 މެމްބަރުންގެ އިއްތިފާގުން ފާސްކޮށްފައި ވަނީ ސެޕްޓެމްބަރުގައި އޮންނަ ރިޔާސީ އިންތިހާބު ކާމިޔާބު ކުރުމަށްޓަކައި ރިޔާސީ ކެންޑިޑޭޓުގެ ހައިސިއްޔަތުން ކެންޑިޑޭޓު ބޭނުންފުޅުވާ ބޭފުޅުންނާއި ޕާޓީތަކާއި މަޝްވަރާކޮށް ގޮތް ނިންމުމުގެ ބާރު ދިނުމަށެވެ.
މި ގަރާރު ހުށަހެޅުއްވީ ރިޔާސީ ޕްރައިމަރީ ކާމިޔާބު ކުރެއްވިއިރު ރައީސް ސޯލިހުގެ ކެމްޕޭން މެނޭޖަރަކަށް ހުންނެވި ކިނބިދޫ ދާއިރާގެ މެމްބަރު މުހައްމަދު ނާޝިޒު އެވެ.
މި ޖަލްސާގައި ޕްރައިމަރީން ބަލިވެވަޑައިގަތް ރައީސް ނަޝީދަށް ތާއިދުކުރައްވާ އެމަނިކުފާނުގެ އަރިސް މެމްބަރުން ބައިވެރިވެވަޑައިގެންފައި ނުވެ އެވެ.
މީގެކުރިން ރައީސް ސޯލިހު ވަނީ ރަސްމީކޮށް އެއްވެސް ކޯލިޝަން މެންބަރަކާ އެކު އަލުން 2023 އަށް ކޯލިޝަން ހެދުމުގެ މަޝްވަރާ ނުކުރާކަން ހާމަކުރައްވާފަ އެވެ. ނުރަސްމީކޮށް އެ ވާހަކަ ދެކެވިފައި ހުންނާނެ ކަމަށާއި, އެ ވާހަކަތަކުގެ ތެރެއިން ގިނަ ކަންކަމުގައި ހިޔާލު އެއްގޮތް ކަމަށް ރައީސް ވިދާޅުވެފައިވެ އެވެ.
އެންމެ ފަހުގެ ރިޔާސީ އިންތިހާބާ ޖެހެންދެން އޭގެ ކުރިން ކޮންމެ ރިޔާސީ އިންތިހާބެއްގައި ވެސް ކާމިޔާބުކުރާ ކޯލިޝަން އުފެދެނީ ދެވަނަ ބުރުގެ ވޯޓަކަށް ދިއުމުންނެވެ. އެހެންނަމަވެސް, 2018 ވަނަ އަހަރުގެ ރިޔާސީ އިންތިހާބަށް ރައީސް ސޯލިހު ކުރިމަތިލެއްވީވެސް ކޯލިޝަނަކާ އެކު އެވެ.
މިފަހަރު ވެސް އެމަނިކުފާނު ރިޔާސީ އިންތިހާބު ކާމިޔާބު ކުރުމަށް ޖައްސަވާ ހިސާބަކީ ކޯލިޝަނަކާ އެކު ނުކުތުމެވެ. ޕްރައިމަރީގެ ކާމިޔާބަށް ފަހު ރައީސް ވަނީ ކޯލިޝަންގެ މަސައްކަތްތައް ފައްޓަވާނެކަން ހާމަކުރައްވާފަ އެވެ.
އަޅުގަނޑަށް ޔަގީންކަން އެބައޮތް ސިޔާސީ ގޮތުން ބައެއް ކަންތައްތަކުގައި ހިޔާލު އެއްގޮތް ނޫން މީހުންނާއެކީގައި ކޯލިޝަނެއް ހަދައިގެން ރިޔާސީ އިންތިހާބު ކާމިޔާބު ކުރެވޭނެ ކަމަށް، އެ ފުރުސަތު އެހެން އޮތީމައި އަޅުގަނޑު ރިޔާސީ އިންތިހާބުގެ ޕްރައިމަރީގައި ވާދަކުރަން ނިންމީ،" ރައީސް ސޯލިހުގެ ޕްރަމަރީ ލޯންޗިން ޖަލްސާގައި އެމަނިކުފާނު ވިދާޅުވި އެވެ.
ރާއްޖޭގައި ބޭއްވި އެންމެ ފުރަތަމަ މަލްޓި ޕާޓީ ޑިމޮކްރަޓިކް އިންތިހާބުގައި އެމްޑީޕީން ވާދަކުރެއްވި ރައީސް ނަޝީދަށް ވެސް 2008 ވަނަ އަހަރު މި ބާރުތައް ދިނުމަށް އޭރުގެ އެމްޑީޕީ ގައުމީ މަޖިލީހުން ފާސްކުރި އެވެ. އެ ފަހަރުގެ އިންތިހާބުގެ ދެވަނަ ބުރު ކާމިޔާބުކޮށް ނަޝީދު ވެރިކަމަށް ވަޑައިގެންނެވީ ކޯލިޝަނެއްގެ ތެރެއިންނެވެ.
