މިއަދު އިއުލާނު ކުރި ސްޓޫޑެންޓް ލޯނު ސްކީމުގައި މިވަގުތު ކިޔަވަމުންދާ ދަރިވަރުންނަށް ވެސް ލުއި ގޮތްތަކެއް ހަމަޖައްސާފައިވާކަން ހަޔާ އެޑިއުކޭޝަން މިނިސްޓްރީން ހާމަކޮށްފި އެވެ.
ސްޓޫޑެންޓް ލޯނު ސްކީމް އިއުލާން ކުރައްވާ ހަޔާ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވީ ސަރުކާރުގެ ފުރަތަމަ ޑިގްރީ ސްކީމުގެ ދަށުން ކިޔަވަމުންދާ ދަރިވަރުންނަށް, އެ ދަރިވަރުންގެ އެހެނިހެން ހަރަދުތައް ހަމަޖެއްސުމަށްޓަކައި ލޯނަށް އެދި ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ.
މިދިޔަ އަހަރު އެ ފުރުސަތު ހުޅުވާލީ ވަކި ދާއިރާތަކުން ކިޔަވާ ދަރިވަރުންނަށެވެ. އެއާ ހިލާފަށް ކޮންމެ ދާއިރާއަކުން ކިޔަވާ ދަރިވަރަކަށް ވެސް އިތުރު އެހީ ބޭނުންވާނަމަ މިއަހަރު ލޯނަށް އެދުމުގެ ފުރުސަތު ހުޅުވާލާފައިވާ ކަމަށް މިނިސްޓަރު ވިދާޅުވި އެވެ.
ކިޔަވަމުންދާ ދަރިވަރުންނަށް ދެން ތައާރަފު ކުރި ލުޔަކީ, ސްޓޫޑެންޓް ލޯނުން ކިޔެވި ދަރިވަރުންނަށް ޓޮޕް-އަޕް ފުރުސަތެއް ހުޅުވާލުމެވެ.
"ކުރިން ލޯނު ނަގާފައިވީ ނަމަވެސް އެހެން ސަބަބުތަކާ ހުރެ ދަރިވަރުގެ އަމިއްލަ އިހްތިޔާރުން ބޭރުން ކަނޑައެޅިފައިވާ މުއްދަތުގައި ކޯސް ފުރިހަމަ ނުކުރެވިފައިވާ ފަރާތްތަކަށް ލޯނުގެ އެކްސްޓެންޝަނުގެ ގޮތުގައި އިތުރު ފައިސާ ދޭން އަޅުގަނޑުމެން މިފަހަރު ހަމަޖައްސާފައިވާ ވާހަކަ އުފަލާއެކު ފާހަގަކުރަން،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ މި ފުރުސަތުތައް ލައިސަންސް ލެވެލް, ޑިޕްލޮމާ ލެވެލް, ޑިގްރީ ލެވެލް އަދި މާސްޓާސް ލެވެލްގައި ފަހިވެގެންދާނެ ކަމަށެވެ. ކުރިން ލޯނު ނަގައިގެން އަމިއްލަ އިހްތިޔާރުން ބޭރުގައިވާ ސަބަބަކާހުރެ ކޯސް ފުރިހަމަ ނުކުރެވި އޮތްނަމަ އަލުން ލޯނަށް އެދި ހުށަހަޅައިގެން ކުރިއަށް ގެންދެވޭނެ ކަމަށް އޭނާ ވިދާޅުވި އެވެ.
މިނިސްޓަރު އިތުރަށް ވިދާޅުވީ މިއަހަރުގެ ސްކީމުގައި ޕީއެޗްޑީ ހެދުމަށް 15 ފުރުސަތު ހުޅުވާލާފައިވާ ކަމަށެވެ. އަދި، އެ ފުރުސަތުތައް ހުޅުވާލީ ރާއްޖޭގެ ޕްރައިވެޓް ކޮލެޖުތަކާއި ޔުނިވާސިޓީތަކަށް މީހުން ބިނާ ކުރަން އެހީތެރިވެ ދިނުމުގެ ގޮތުން ކަމަށް މިނިސްޓަރު އިބްރާހިމް ހަސަން ވިދާޅުވި އެވެ.
ޕްރައިވެޓް ކޮލެޖުތައް ބާރުވެރި ކުރުމަށް ހުޅުވާލާ މި ފުރުސަތު ދެވޭނީ ކޮލެޖުގެ ނޮމިނޭޝަން ސިޓީއަކާއެކު ހުށަހަޅާ އެޕްލިކޭޝަންތަކަށް ކަމަށް އޭނާ ވިދާޅުވި އެވެ.
ޖުމްލަ 720 ފުރުސަތާއެކު މިއަހަރުގެ ސްޓޫޑެންޓް ލޯން ސްކީމް ހުޅުވާލީ މިއަދެވެ. އަންނަ މަހު 15 އާ ހަމައަށް ލޯނަށް އެދި ހުށަހެޅޭއިރު, މިއަހަރު ވަނީ ޕައިލެޓް, އެމްބީބީއެސް އަދި މެޑިސިން ދާއިރާއަށް ދޭ ފުރުސަތުތައް އިތުރުކޮށްފަ އެވެ.
