ހުޅުމާލޭގައި ގާއިމްކޮށްފައިވާ އުމަރު ޒާހިރު އޮފީސް އިމާރާތް މިއަދު ހުޅުވައިފި އެވެ.
އެ އޮފީސް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ރައީސް އިބްރާހިމް މުހައްމަދު ސޯލިހް ވިދާޅުވީ، އުމަރު ޒާހިރުގެ ނަންފުޅަށް ނިސްބަތްކޮށް ސަރުކާރުގެ އޮފީސް އިމާރާތެއް މިއަދު ހުޅުވުމުން އެމަނިކުފާނުގެ ގައުމީ ހިދުމަތުގެ ކުލަގަދަކަން ރަމްޒުކޮށްދޭ ކަމަށެވެ.
"ހުޅުލޭގެ އުތުރު ފަޅުތެރެއަށް އޮއްސާލި ފުރަތަމަ ވެލި މުށާއެކު މި ރަށް ހިއްކާ، ނިންމާ، އިމާރަތްކޮށް، މީހުން ދިރިއުޅޭ ފެންވަރަށް ތަރައްގީ ކުރުމުގައި ވެސް އެމަނިކުފާނުގެ ހިއްސާ ވަރަށް ބޮޑު،" އާ އޮފީސް އިމާރާތް ބިނާކޮށްފައި ހުރި ހުޅުމާލެއަކީ ވެސް އުމަރު ޒާހިރުގެ ވަރަށް ރޭވުންތެރި މަސައްކަތްތަކަކާއެކު ވުޖޫދުވެގެން އައި ރަށެއްކަން ފާހަގަކުރައްވަމުން ރައީސް ވިދާޅުވި އެވެ.
ރައީސް ވިދާޅުވީ ކާތިބެއްގެ ވަޒީފާއިން ދައުލަތަށް ހިދުމަތް ކުރައްވަން ފެއްޓެވި އުމަރު ޒާހިރުގެ ގައުމީ ހިދުމަތުގެ ދަތުރު 49 އަހަރަށް ދެމިގެން ދިޔައިރު، އެ ދަތުރު ނިންމަވާލެއްވީ ރައީސުލްޖުމްހޫރިއްޔާ އޮފީހުގެ ސީނިއާ މިނިސްޓަރުކަމުގެ މަގާމާއެކު ކަމަށެވެ.
"އެއީ ގައުމަށް ހިދުމަތްތަކެއް ކޮށްދެއްވުނު ކަމުގެ ހިތްހަމަޖެހުން. ގައުމު ބަލައިގަތް ކަމުގެ ހިތްހަމަޖެހުން. ނަތީޖާ ނެރެދެއްވުނު ކަމުގެ ހިތްހަމަޖެހުން،" ރައީސް ސޯލިހު ވިދާޅުވި އެވެ.
އުމަރު ޒާހިރުގެ އުމުރުފުޅުގެ ދެބައިކުޅަ އެއްބަޔަށްވުރެ ގިނަ ދުވަހު ގައުމަށް ހިދުމަތް ކޮށްދެއްވިކަން ސަރުކާރުން ބަލައިގަތްކަމުގެ އެއް ހެއްކަކީ މިއަދު ސަރުކާރުގެ އޮފީސް އިމާރާތެއް އެމަނިކުފާނުގެ ނަންފުޅަށް ހާއްސަވެގެން ދިއުން ކަމަށް ރައީސް ވިދާޅުވި އެވެ.
ހުޅުމާލޭގައި ދައުލަތުގެ އޮފީހެއް ނުވަތަ އޮފީސް އިމާރާތެއް ހިންގަން ފަށާ މިއީ ފުރަތަމަ ފަހަރެވެ. މިއީ މާލެއިން ބޭރުގައި ދައުލަތުގެ އޮފީސް އިމާރާތްތައް ހިންގާ ފުރަތަމަ ފަހަރުވެސް މެއެވެ.
ޒަމާނީ ވަސީލަތްތަކާއި، ހިތްހަމަޖެހޭ ތަނަވަސް މާހައުލެއްގައި މަސައްކަތް ކުރެވޭ ފަދައިން އިމާރާތްކޮށްފައިވާ މި އިމާރާތުގެ ކޮންމެ ފަންގިފިލާއެއްގައި ހިންގަން ހަމަޖެހިފައިވަނީ އެއް މިނިސްޓްރީ އެވެ. މި އިމާރާތުގައި ޓްރާންސްޕޯޓް މިނިސްޓްރީ، ޖެންޑާ މިނިސްޓްރީ އަދި ހަޔާ އެޑިއުކޭޝަން މިނިސްޓްރީ ހިންގާ ގޮތަށް ވަނީ ހަމަޖެހިފަ އެވެ.
ސަރުކާރުގެ އޮފީސްތައް ހިންގާ ހުރަވީ ބިލްޑިންއާއި ގާޒީ ބިލްޑިން ބޭނުން ނުކުރެވޭ ވަރަށް ހަލާކުވެފައިވާތީ ގިނަ އޮފީސްތަކެއް ހިންގަން ޖެހިފައި އޮތީ ކުލީ އިމާރާތްތަކުގަ އެވެ. ނަމަވެސް ހުޅުމާލޭގައި މިއަދު ހުޅުވި އާ އޮފީސް އިމާރާތާއެކު އެކަމަށް ކޮންމެވެސް ވަރެއްގެ ލުޔެއް ލިބިގެންދާނެ އެވެ.
