ބޭރުގެ ފަރާތްތަކަށް ދިގު މުއްދަތަކަށް ތިލަފުށިން ބިން ކުއްޔަށް ދޫކުރަން ނިންމާފައިވާތީ ރާއްޖޭގެ ވިޔަފާއިވެރިން ބައްދަލުކޮށް މަޝްވަރާކޮށްފި އެވެ.
މިއަދު މާލޭގައި ކުރިއަށް ގެންދިޔަ އެ މަޝްވަރާ ބައްދައްލުވުމުގައި ސިނާއީ ދާއިރާގައި ހަރަކާތްތެރިވާ ގިނަ އަދަދެއްގެ ދިވެހި ކުންފުނިތަކުގެ ވެރިން ބައިވެރި އެވެ.
އެ ބައްދަލުވުމުގައި ތިލަފުށިން ދިގު މުއްދަތަކަށް ބިން ކުއްޔަށް ދޫކުރުމާ ގުޅޭ ގޮތުން ދިވެހި ވިޔަފާރިވެރިންގެ ފަރާތުން ދައުލަތުގެ ކަމާބެހޭ އިދާރާތަކުގެ އިތުރުން ރައީސުލްޖުމްހޫރިއްޔާއާ ވެސް ބައްދަލުކޮށް މަޝްވަރާކުރުމަށް ނިންމާފައިވެ އެވެ.
ރާއްޖޭގެ އެންމެ ބޮޑެތި ކުންފުނިތަކުގެ ވެރިން ބައިވެރިވި އެ ބައްދަލުވުމުގައި ބައިވެރިވުމުގެ ފުރުސަތު ބައެއް މީޑިއާތަކަށް ދިން ނަމަވެސް, އެ ބައްދަލުވުމުގައި ދެކެވުނު ވާހަކަތައް އަދި ހާމަ ނުކުރުމަށް އެ ފަރާތްތަކުން އެދުނެވެ.
ނަމަވެސް އެ ބައްދަލުވުމަކީ އެއްވެސް ހާލެއްގައި ސިޔާސީ ބައްދަލުވުމެއް ނޫން ކަމާއި ސިޔާސީ އެއްވެސް ނުފޫޒެއް ވެސް އޮތް ބައްދަލުވުމެއް ނޫން ކަން އެ ފަރާތްތަކުން ބުންޏެވެ.
ވަރަށް އަވަސް މުސްތަގުބަލެއްގައި އެ ބޭފުޅުންގެ ފަރާތުން ކުރިއަށް ގެންދިޔަ މަޝްވަރާތަކާއި އަދި ނިންމުނު ކަންކަމާ ގުޅޭ ގޮތުން މީޑިއާތަކާ މައުލޫމާތު ހިއްސާ ކުރާނެ އެވެ.
ސިނާއީ މަސައްކަތްތައް ކުރުމަށް ތިލަފުށީގެ ބިން ބޭރު ފަރާތްތަކަށް ކުއްޔަށް ދޫކުރުމަށް އެޗްޑީސީން ހުޅުވާލީ މިދިޔަ އަންގާރަ ދުވަހު އެވެ.
އެ ކުންފުނިން ނެރުނު އިއުލާނުގައި ވަނީ ދިވެހި ކުންފުނިތަކަށް ތިލަފުށިން މިލްކު ކުރެވޭ ގޮތަށް ވެސް ބިޑު ކުރުމުގެ ފުރުސަތު ހުޅުވާލާފަ އެވެ.
ސަރުކާރުން ތިލަފުށި ތަރައްގީކުރަން އެކުލަވާލި މާސްޓާ ޕްލޭނުގައިވާ ގޮތުން އިތުރު 151 ހެކްޓަރުގެ ބިން ހިއްކާ ތަރައްގީކުރުމަށް ވަނީ ނިންމާފަ އެވެ. އަދި ތިލަފުއްޓަކީ ކުނި މެނޭޖުކުރާ ރަށެއްގެ ގޮތުގައި އޮތް އޮތުން ނިމުމަކަށް ގެނެސް އެ ރަށަކީ ރާއްޖޭގެ "ސިނާއީ މައި ހަބު" ކަމުގައި އެ ހެދުމުގެ މަގުޗާޓެއް ވެސް އެޗްޑީސީން ވަނީ އެކުލަވާލައި އާންމު ކޮށްފަ އެވެ.
ބޭރުގެ ފަރާތްތަކަށް ދިގު މުއްދަތަކަށް ތިލަފުށިން ބިން ކުއްޔަށް ދޫކުރަން ނިންމުމާ ގުޅިގެން ކަންބޮޑުވުން ފާޅުކުރައްވައި ކުރީގެ ޑިފެންސް މިނިސްޓަރު އަދި މިހާރު މަޑުއްވަރީ ދާއިރާގެ މެންބަރު، އާދަމް ޝަރީފު ވަނީ ފާއިތުވި ހަފުތާގައި ރައްޔިތުންގެ މަޖިލީހަށް ކުއްލި މައްސަލައެއް ވެސް ހުށަހަޅުއްވާފަ އެވެ. ނަމަވެސް މަޖިލީހުން ވަނީ އެ މައްސަލަ ބޭރުކޮށްލާފަ އެވެ.
އެޗްޑީސީން ކުރި އިއުލާނާ ގުޅިގެން ރާއްޖޭގެ ބައެއް ސިޔާސީ ޕާޓީތަކުން ވެސް ވަނީ ކަންބޮޑުވުން ފާޅުކޮށްފަ އެވެ.
