ކުދި އަދި މެދުފަންތީގެ ވިޔަފާރިތަކަށް "ގްރީން ފައިނޭންސް" ވޯކްޝޮޕެއް ދިވެހިރާއްޖޭގެ ގައުމީ ޔުނިވާސިޓީގައި ބާއްވައިފި އެވެ.
ޕްރިވެންޝަން އޮފް މެރިން ލިޓަރ އިންދަ ލަކްޝަޑްވީޕް ސީ (ޕްރޮމިސް) ޕްރޮޖެކްޓަކީ ދެމެހެއްޓެނިވި ގޮތެއްގައި ތަކެތި އުފައްދައި ބޭނުންކުރުން ޕްރޮމޯޓުކުރުމަށް، ޔޫރަޕްގެ އިއްތިހާދުގެ މާލީ އެހީއާއެކު ރާއްޖެ އާއި ސިރީލަންކާ އާއި އިންޑިއާގައި މޫދަށް އެޅޭ ކުނިބުނި މަދުކޮށް ރައްކާތެރިކަމާއެކު އެތަކެތި މެނޭޖުކުރުމަށް، އުފައްދާފައިވާ ޕްރޮޖެކްޓެކެވެ.
މޫދަށް އެޅޭ ކުނި މަދުކޮށް، ކުދި އަދި މެދު ފަންތީގެ ވިޔަފާރިތަކުން އުފައްދާ ކުނިބުނި ރަނގަޅު ގޮތުގައި މެނޭޖުކޮށް، ދެމެހެއްޓެނިވި ގޮތެއްގައި ނައްތާލުމަށް އެހީތެރިވެދިނުމުގެ ގޮތުން، ޕްރޮމިސް ޕްރޮޖެކްޓުން ތަފާތު އެތައް މަސައްކަތްތަކެއް ކުރަމުންދާނެ އެވެ.
މި ވޯކްޝޮޕް އިފްތިތާހު ކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވީ، ހަޔަ އެޑިއުކޭޝަން މިނިސްޓަރު ޑރ. އިބްރާހިމް ހަސަން އެވެ.
މިނިސްޓަރުގެ ވާހަކަގައި ރަގަނޅު ގޮތުގައި ކުނި މެނޭޖް ނުކުރެވުމުގެ ސަބަބުން މޫދަށް އެޅޭ ކުނި ގިނަވެ އޭގެ ސަބަބުން ކަނޑުގެ ދިރުމަށް ލިބެމުންދާ ގެއްލުމާއި މޫދު ތަޣައްޔަރުވުމުގެ ސަބަބުން ތިމާވެއްޓަށް ލިބޭ ގެއްލުންތަކުގެ އަލިއަޅުއްވާލެއްވި އެވެ.
މިއަދު ބޭއްވި "އެމްއެސްއެމްއީ ގްރީން ފައިނޭންސް" ވޯކްޝޮޕްގައި ފަތުރުވެރިކަމުގެ ދައިރާގައި މަސައްކަތްކުރާ ކުދި އަދި މެދު ފަންތީގެ ވިޔަފާރިތަކުން ބައިވެރިވި އެވެ. އަދި ފައިނޭސިންގް އިންސްޓިޓިއުޝަންސް ގޮތުގައި ބޭންކް އޮފް މޯލްޑިވްސް، އެސްއެމްއީ ފައިނޭންސް ކޯޕަރޭޝަން، މޯލްޑިވްސް ފައިނޭންސް އެންޑް ލީސިން ކޮމްޕެނީ ބައިވެރިވެ އެ ފަރާތްތަކުގެ ފައިނޭންސިން ސްކީމްއާ ބެހޭ ގޮތުން މައުލޫމާތު ފޯރުކޮށްދިފައިވެ އެވެެ.
މި ވޯކްޝޮޕްގެ އިތުރުން 07 ފެބްރުއަރީ 2023 ވަނަ ދުވަހު މި ޕްރޮޖެކްޓްގެ ތިންވަނަ ޕޮލިސީ ރައުންޑްޓޭބަލް މީޓިން ދިވެހިރާއްޖޭގެ ގައުމީ ޔުނިވަސިޓީގައި ވަނީ ބާއްވާފަ އެވެ. އަދި ޕްލާސްޓިކާއި ކުނި މެނޭޖްކުރުމަށް އެކުލަވާލެވިފައިވާ ސިޔާސަތުތައް، ތަންފީޒުކުރުމުގައި ހުރި ގޮންޖެހުންތަކަށް ހައްލު ހޯދުމުގައި ސްޓޭކްހޯލްޑަރުންގެ މަޝްވަރާ އާއި ހިޔާލު ހޯދުމުގެ ގޮތުން މީގެކުރީގައި ދެ ޕޮލިސީ ރައުންޑް ޓޭބަލް މީޓިންއެއް ވެސް ވަނީ ބާއްވާފަ އެވެ.
ތިންވަނަ ޕޮލިސީ ރައުންޑްޓޭބަލް މީޓިންގައި ބައިވެރިންގެ ފަރާތުން ކުނިބުނި މެނޭޖްކުރުން ހަރުދަނާކުރުމަށް ހުށައަޅާފައިވާ ހަތަރު ކަމެއް އިތުރަށް މަޝްވަރާކޮށް ތަރައްގީކުރި އެވެ. މި މީޓިންގްގައި ކަމާއިބެހޭ ސަރުކާރުގެ އޮފީސްތަކުންނާއި މުއައްސަސާތަކުން އަދި އެސޯސިއޭޝަންތަކުން، އެންވަޔަރަމެންޓަލް އެންޖީއޯތަކުން، އަދި އިންޓަނޭޝަނަލް ބައެއް އޭޖެންސީތަކާއި އެކަޑެމިއާއިން ބައިވެރިވެ ވަޑައިގެންނެވި އެވެ.
