މި ސަރުކާރުން ބިންވެރިޔާ ސްކީމުގެ ދަށުން މާލެ ސަރަހައްދުން ދޫކުރުމަށް ހަމަޖެހިފައިވާ ގޯތިތަކުގެ އަދަދު އިތުރުކުރުމަށް ނިންމާފައިވާ ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.
މިހާރު ނިންމާފައި ވަނީ ހުޅުމާލޭން 1،000 ގޯތީގެ އިތުރުން، ގުޅީފަޅުން 2،000 ގޯއްޗާއި އަދި ގިރާވަރު ފަޅު ހިއްކާ އެ ބިމުން މަދުވެގެން 2,000 ގޯތި މާލޭ ރަށްވެހިންނަށް ދިނުމަށެވެ. އެ 5،000 ގޯތީގެ ތެރެއިން ފުރަތަމަ ބުރުގައި ދޫކުރާނީ 3،000 ގޯއްޗެވެ. ގޯއްޗާއި ފްލެޓަށް ކުރިމަތިލުމަށް ސަރުކާރުން ހުޅުވާލީ މިދިޔަ ޖޫން 26 ވަނަ ދުވަހު އެވެ.
މި އަހަރު ރައްޔިތުންގެ މަޖިލިސް ހުޅުވަން ބޭއްވި ޖަލްސާގައި ރިޔާސީ ބަޔާން އިއްވަމުން ރައީސް ސޯލިހު ވިދާޅުވީ، މާލެ ސަރަހައްދުން ދޫކުރުމަށް ނިންމާފައިވާ ގޯތީގެ އަދަދު އިތުރުކުރުމަށްް ނިންމާފައިވާ ކަމަށެވެ.
"މިއަދު ދަންނަވަން އޮތް އާ ވާހަކައަކީ ކުރިން ދޭނެ ކަމަށް ދެންނެވި އަދަދަށްވުރެ މާލެ ސަރަހައްދުން ދޭ ގޯތީގެ އަދަދު އިތުރުކުރުމަށް އަޅުގަނޑު ނިންމި ވާހަކަ," މި ދައުރުގެ ފަހު ރިޔާސީ ބަޔާނުގައި ރައީސް ސޯލިހް ވިދާޅުވި އެވެ.
ރައީސް ވިދާޅުވީ މާލޭން ބޯހިޔާވަހިކަމަށް ހުޅުވާލި ފްލެޓަށް 20،769 އަދި ގޯއްޗަށް އެދި 15164 އެޕްލިކޭޝަން ފޯމު ހުށަހަޅާފައިވާ ކަމަށާއި، މިހާރު އަންނަނީ އެ އެޕްލިކޭޝަަންތައް ޕްރޮސެސްކުރުމުގެ މަސައްކަތް ކަމަށެވެ. މި އަހަރުގެ ޖޫން މަސް ނިމުމުގެ ކުރިން ފްލެޓާއި ގޯތި ލިބޭ ފަރާތްތަކަށް ލިއުން ހަވާލުކުރާނެ ކަމަށް ވިދާޅުވި އެވެ.
މީގެ އިތުރުން ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ދޫކުރާ ލޯނަށް އެދި ހުސްވި ޖަނަވަރީ މަހުގެ ނިޔަލަށް 579 ފޮމު ހުށަހަޅާފައިވާ ކަމާއި، އޭގެ ތެރެއިން 55 އިންސައްތަ ލޯނު މިހާރު އެޕްރޫވްކުރެވިފައިވާ ކަަންް ރައީސް ފާހަގަކުރެއްވި އެވެ. މިހާތަނަށް ލޯނު އެއްބަސްވުމުގައި ސޮއިކޮށްފައި ވަނީ 249 ފަރާތަކާ އެކު އެވެ.
އަދި އަތޮޅުތެރޭގައި އިމާރާތް ކުރާ ހައުސިން ޔުނިޓްތަކުން 556 ހައުސިން ޔުނިޓް އަންނަ މޭ މަހުގެ ނިޔަލަށް އެއްކޮށް ނިންމާނެ ކަމަށް ވެސް އެމަނިކުފާނު ވިދާޅުވި އެވެ. އަދި އިތުރު 2200 ހައުސިން ޔުނިޓްގެ މަސައްކަތް އަތޮޅުތެރޭގައި ހިނގަމުންދާކަން ވެސް ފާހަގަކުރެއްވި އެވެ.
