ބޭންކް އޮފް މޯލްޑިވްސް (ބީއެމްއެލް)ގެ ވަކިވަކި ބޯޑު ޑިރެކްޓަރުންގެ މުސާރައިގެ މައުލޫމާތު ހާމަކުރުމަށް ހައި ކޯޓުން މިއަދު ކުރި ހުކުމާ އެކު، މައުލޫމާތު ހޯދުމާއި ލިބި ގަތުމުގެ ގާނޫނުގެ ދަށަށް ސަރުކާރު ހިއްސާ އޮންނަ ކުންފުނިތައް ވަދެއްޖެ އެވެ.
އެ ގާނޫނުގެ ދަށުން، އެކި އިދާރާތަކުގެ މައުލޫމާތު ހޯދުމަށް މަސައްކަތް ކުރަމުންދާ އަހުމަދު އައިމަން ބީއެމްއެލްގައި އެ މައުލޫމާތަށް އެދުނީ 2020 ވަނަ އަހަރުގެ ތެރޭގަ އެވެ.
އައިމަން އެދިފައިވަނީ ބީއެމްއެލްގެ ހުރިހާ މުވައްޒަފުންގެ މުސާރަ އާއި އިނާޔަތްތަކުގެ ތަފްސީލް ދިނުމަށެވެ. އެއީ ގޮތުން ބޭންކުގެ ބޯޑު އޮފް ޑިރެކްޓާސް ސީނިއާ މެނޭޖްމަންޓް ސްޓާފުންނާއި، އައިލެންޑް އެވިއޭޝަން ސާވިސްގައި މަސައްކަތް ކުރާ ހުރިހާ މުވައްޒަފުންގެ މުސާރަ އާއި އިނާޔަތްތައް ވަކިވަކިން އެނގޭނެ ގޮތަށެވެ.
އޭނާ އެދިފައިވާ މައުލޫމާތު ބީއެމްއެލުން ނުދެ އެވެ. އެހެންވެ އިންފޮމޭޝަން ކޮމިޝަނަރުގެ އޮފީހަށް އައިމަން މައްސަލަ ހުށަހެޅުމުން އެ އޮފީހުން ވެސް ވަނީ އެ މައުލޫމާތު ދިނުމަށް ބޭންކަށް އަންގައިފަ އެވެ.
އިންފޮމޭޝަން ކޮމިޝަނަރުގެ އޮފީހުގެ ނިންމުން ބާތިލްކޮށްދިނުމަށް ބޭންކުން ވަނީ ހައި ކޯޓުގައި އިސްތިއުނާފް ކޮށްފަ އެވެ. ބީއެމްއެލުން ވަކާލާތު ކުރި ކަމަކީ، ގާނޫނުގައި މައުލޫމާތު ދިނުމަށް ލާޒިމުކޮށްފައިވާ ދައުލަތުގެ އިދާރާތަކުގެ ތެރޭގައި އެ ބޭންކު ނުހިމެނޭ ކަމަށެވެ.
ހައި ކޯޓުން ކޮށްފައިވާ ހުކުމުގައި ވަނީ، ގާނޫނުގައި ދައުލަތުގެ އިދާރާތަކުގެ ތެރޭގައި އެ ތަނެއް ހިންގުމުގައި ދައުލަތެއް މަސްއޫލިއްޔަތެއް އަދާކުރާ ތަންތަން ހިމެނޭ ކަމަށް ބަޔާންކޮށްފައިވާއިރު އޭގެ ތެރޭގައި ބީއެމްއެލް ފަދަ ސަރުކާރު ހިއްސާވާ ކުންފުނިތައް ވަންނާނެ ކަމަށެވެ.
އެހެންކަމުން އިންފޮމޭޝަން ކޮމިޝަނަރުގެ އޮފީހުގެ ނިންމުން ބާތިލްކުރަން ޖެހޭ އެއްވެސް ގާނޫނީ އަދި ޝަރުއީ ސަބަބެއް ނެތް ކަމަށް ހައި ކޯޓުގެ ހުކުމުގައިވެ އެވެ.
މި ގޮތަށް ހައި ކޯޓުން ހުކުމްކުރީ މައްސަލަ ބެއްލެވި ތިން ފަނޑިޔާރުންގެ އިއްތިފާގުންނެވެ. ބެންޗުގެ ރިޔާސަތުގައި އިންނެވީ ފަނޑިޔާރު ހުސައިން މަޒީދެވެ. ދެން ތިއްބެވީ ފަނޑިޔާރު ހަސަން ޝަފީއު އާއި ފަނޑިޔާރު މުހައްމަދު ނިޔާޒެވެ.
