މި އަހަރުގެ ސެޕްޓެމްބަރު މަހު އޮންނަ ރިޔާސީ އިންތިހާބުގައި ވާދަކުރައްވާނެ ކަން އިއުލާންކުރައްވައި، އިދިކޮޅު ޕީޕީއެމް މެންބަރުންގެ ތާއީދު ބޭނުންވާ ކަމަށް ކުރީގެ ހޯމް މިިނިސްޓަރު އުމަރު ނަސީރު ވިދާޅުވެއްޖެ އެވެ.
"އާ މިސްރާބަކަށް" ޝިއާރަކާ އެކު އުމަރުގެ ރިޔާސީ ކެމްޕޭން ލޯންޗު ކުރެއްވުމަށް ރޭ ސަލްޓަން ޕާކްގައި ބޭއްވި ޖަލްސާގައި އުމަރު ވިދާޅުވީ ޕީޕީއެމް އުފެއްދުމުގައި އޭނާގެ ދައުރު ވަރަށް ބޮޑު ކަމަށެވެ. އުމަރު ހުށަހަޅުއްވާ ރިޔާސީ ވައުދުތަކަކީ އެ ޕާޓީގެ ސިޔާސީ ފަލްސަފާގެ ގޮތުގައި އުމަރު ސިފަކުރެއްވި އެވެ.
"ޕީޕީއެމްގެ މެންބަރުންނަށް އަޅުގަނޑު ގޮވާލަން، ޕީޕީއެމްގެ މެންބަރުންނަކީ އަޅުގަނޑު އަހުން، އަޅުގަނޑަކީ ޕީޕީއެމް އުފެއްދި އެއް ފައުންޑަރު، އެހެންވީމަ އަޅުގަނޑަށް ޔަގީން ޕީޕީއެމްގެ މެންބަރުން ވަޑައިގަންނަވާނެ ކަން އަޅުގަނޑާ އެކީގައި އަޅުގަނޑު މި ކުރާ ދަތުރުގައި،" އުމަރު ވިދާޅުވި އެވެ.
ޕީޕީއެމްގެ މެންބަރުންގެ ސަޕޯޓް ބޭނުންވާ ކަމަށް އުމަރު ވިދާޅުވިއިރު، އެ ޕާޓީގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީން ހުންނެވީ 11 އަހަރުގެ ޖަލު ހުކުމެއް ތަންފީޒުކުރެއްވުމުގަ އެވެ. ކްރިމިނަލް ކޯޓުން އިއްވި ހުކުމް ދެމިއޮތްހާ ހިނދަކު ޔާމީނަށް ރިޔާސީ އިންތިހާބުގައި ވާދަނުކުރެވޭނެ އެވެ.
ދެހާސްތޭރަވަނަ އަހަރުގެ ރިޔާސީ އިންތިހާބުގައި ވާދަކުރަން، ޕީޕީއެމްގެ ރިޔާސީ ޓިކެޓު ހޯދުމަށް ބޭއްވި އެތެރޭގެ ޕްރައިމަރީގައި ޔާމީނާ ވާދަކުރައްވައި ނާކާމިޔާބުވެވަޑައިގަތް އުމަރު ރޭ ދެއްކެވި ވާހަކައިގައި އޭނާގެ ބައެއް ރިޔާސީ ވައުދުތައް ވެސް ހުށަހެޅުއްވި އެވެ.
އުމަރު ހުށަހެޅުއްވި ބައެއް ވައުދުތައް
- މިފްކޯ ޕްރައިވަޓައިޒްކޮށް، މަސް ބަންދުކުރުމުގެ ވިޔަފާރި ސަރުކާރުން ދޫކޮށްލުން
- ކުދި ވިޔަފާރިތަކަށް ޓެކްސް ދައްކަން ނުޖެހުން
- ރާއްޖޭގެ އެންމެ އުތުރުގައި ޓްރާންޝިޕްމަންޓް ބަނދަރެއް ހެދުން
- އައްޑޫގައި ފްރީ ޓްރޭޑް ޕޯޓެއް ގާއިމްކޮށް ބޭރުގެ ވިޔަފާރިންނަށް ހުޅުވާލުން
- ރައްޔިތުންގެ މަޖިލިސް، 50 މެންބަރުންނަށް ކުޑަކުރުން
- ސަރުކާރުގެ މުއައްސަސާތައް މަދުކުރަން އޭގެ 30 ޕަސެންޓް އުނިކުރުން
- އެޓޯލް މިނިސްޓްރީ އުފައްދައި، ކޮންމެ އަތޮޅަކު ގަވަރުނަރަކު ބެހެއްޓުން
- ސްކޫލް ނިންމާ ކުދިން، މަދުވެގެން އަހަރު ދުވަހު ސިފައިންގެއަށް ހިދުމަތް ކުރުން
ރިޔާސީ އިންތިހާބުގައި އަމިއްލަ ގޮތުން ވާދަކުރައްވާނެ ކަން ރަސްމީކޮށް މިހާތަނަށް އިއުލާން ކުރެއްވީ އުމަރު އެކަންޏެވެ. ޔާމީނަށް ވާދަނުކުރެވޭ ހާލަތުގައި އަމަލުކުރާނެ ވަކި ގޮތެއް އެ ޕާޓީން އަދި ހާމައެއް ނުކުރެ އެވެ.
ވެރިކަން ކުރާ މައި ޕާޓީ، އެމްޑީޕީގެ ކެންޑިޑޭޓަކީ ރައީސް އިބްރާހީމް މުހައްމަދު ސޯލިހެވެ. ވެރިކަން ކުރާ ކޯލިޝަންގައި ދެން ހިމެނޭ އަދާލަތު ޕާޓީ، ޖޭޕީ، އަދި އެމްއާރުއެމުން އަދި ވަކި ގޮތެއް ނުނިންމަ އެވެ.
އެމްޑީއޭގެ ލީޑަރު އަދި ދ. މީދޫ ދާއިރާގެ މެންބަރު އަހުމަދު ސިޔާމް މުހައްމަދު ވެސް ވާދަކުރައްވާނެ ކަމަށް އިއުލާންކުރައްވާފައިވާއިރު، އަލަށް އުފެއްދި އެމްއެންޕީގެ ކެންޑިޑޭޓަކީ ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް (ކާނަލް) އެވެ.
