އިންޓަނޭޝަނަލް ބޯޑީބޯޑިން ކޯޕަރޭޝަން (އައިބީސީ) ވޯލްޑް ޓުއާގައި މި އަހަރު ވެސް "މޯލްޑިވްސް ޕްރޯ" ހިމަނައި، އައިބީސީގެ މި އަހަރުގެ ކަލަންޑަރު އިއުލާން ކޮށްފި އެވެ.
ބޮޑީބޯޑިންގެ ދުނިޔޭގެ އެންމެ މަތީ ފަންތީގެ މުބާރާތުގައި ހިމެނޭ އެއް ލެގު ރާއްޖޭގައި ފުރަތަމަ ފަހަރަށް ބޭއްވީ މިދިޔަ އަހަރު އެވެ. މިދިޔަ އަހަރުގެ ޖުލައި 29 އިން އޮގަސްޓް 7 މާލޭގައި ކުރިއަށްދިޔަ "މޯލްޑިވްސް ޕްރޯ" އަކީ މިދިޔަ އަހަރު އައިބީސީ ޓުއާގައި ކުރިއަށްދިޔަ ދެ ވަނަ އަށް އެންމެ އަގުބޮޑު މުބާާރާތެވެ. މި މުބާރާތުގައި ދުނިޔޭގެ 15 ގައުމަކުން މަޝްހޫރު ބޯޑަރުން ވާދަކުރި އެވެ.
މިދިޔަ އަހަރުގެ މުބާރާތުގައި ދިވެހި އެތުލީޓުން ރަނގަޅު ނަތީޖާތަކެއް ނެރުނެވެ. މިގޮތުން ޖޫނިއާ ބައިގެ ފައިނަލްގައި އާމިން އުމަރު މޫސާ ވާދަކުރިއިރު، ޑްރޮޕް ނީ ބައިގެ ސެމީ ފައިނަލުގައި އަލީ ހުޝްރުވާން އަހުމަދު (ކުޑަ އައްޔަ) ވާދަކުރި އެވެ. މި ނަތީޖާތަކާ އެކު ދުނިޔޭގެ ރޭންކިންގައި ވެސް މި ދެ ކުޅުންތެރިން ހިމެނުނެވެ. އަހަރު ނިންމާލިއިރު، ކުޑަ އައްޔަ އޮތީ ޑްރޮޕް-ނީ ބައިގެ 12 ވަނައިގަ އެވެ.
އެ މުބާރާތުން ލިބުނު ތަޖުރިބާ އަށް ބަލައި ރާއްޖޭގެ ބައެއް ބޯޑަރުން އަންނަނީ ވޯލްޑް ޓުއާގެ ބައެއް މުބާރާތްތަކުގައި މިއަހަރު ވާދަކުރުމަށް މަސައްކަތް ކުރަމުންނެވެ. މި ގޮތުން ރާއްޖޭގެ ޗެމްޕިއަން، ކުޑަ އައްޔަ އަންނަނީ މޯލްޑިވްސް ޕްރޯ ހިމެނޭ ގޮތަށް ހަތަރު މުބާރާތެއްގައި ވާދަކުރުމަށް މަސައްކަތް ކުރަމުންނެވެ.
އައިބީސީ ވޯލްޑް ޓުއާގައި ހިމެނޭ މުބާރާތެއް އޭޝިއާ ސަރަހައްދުގައި ފުރަތަމަ ފަހަރަށް ބޭއްވުމަށް ފަހު އައިބީސީ އިން ބުނީ ރާއްޖޭގައި ބޭއްވި މުބާރާތަކީ އިންތިޒާމްގެ ގޮތުންނާއި ލެވެލްގެ ގޮތުން ބަލާއިރު، ވަރަށް ފެންވަރު ރަނގަޅު މުބާރާތެއް ކަމަށެވެ. އަދި ރާއްޖޭގައި ބޮޑީބޯޑިން ކުރިއެރުވުމަށް ގިނަ މަސައްކަތްތަކެއް ކުރާނެ ކަމަށް އެ އިދާރާއިން ހާމަކުރި އެވެ.
ރާއްޖޭގައި "މޯލްޑިވްސް ޕްރޯ އޮންނާނީ އޮގަސްޓް 3-12 އަށެވެ. އައިބީސީގެ 2023ގެ މުބާރާތްތައް އިއުލާންކުރިއިރު، މި އަހަރު ވެސް "މޯލްޑިވްސް ޕްރޯ" ހިމެނުނީ ދެ ވަނަ އަށް އެންމެ އަގުބޮޑު މުބާރާތުގެ ގޮތުގަ އެވެ. މިދިޔަ އަހަރާ ހިލާފަށް މި އަހަރުގެ މުބާރާތުގެ ފިރިހެން އޯޕަން ބައިގެ އެއް ވަނަ އަށް 3000 ޕޮއިންޓް ލިބޭނެ އެވެ. އެ ގޮތުން، 3000 ޕޮއިންޓަކީ ވޯލްޑް ޓުއާގައި އެއް މުބާރާތަކުން އެންމެ ގިނައިން ކުޅުންތެރިއަކަށް ލިބޭނެ އަދަދެވެ.
ރާއްޖޭގައި ބާއްވާ މުބާރާތުގައި ހަތަރު ކެޓަގަރީ އެއް ހިމަނާފައިވުމާއި، ޕޮއިންޓްގެ އަދަދަށް ބަލާއިރު އެންމެ މަތިން ޕޮއިންޓް ލިބޭ މުބާރާތަކަށް މޯލްޑިވްސް ޕްރޯ ވުމުގެ ސަބަބުން މި އަހަރު ގިނަ ބޯޑަރުންތަކެއް ރާއްޖެ އަންނާނެ ކަމަށް ބެލެވެ އެވެ.
އައިބީސީ ވޯލްޑް ޓުއާގައި މި އަހަރު ހިމެނި އެހެން މުބާރާތްތަކަށް ބަލާއިރު، ދެން އެންމެ ފާހަގަކޮށްލެވޭ މުބާރާތްތަކަކީ ވޯލްޑް ޗެމްޕިއަން، ކަނޑައަޅާ ކެނެރީ އައިލެންޑްސްގައި ބާއްވާ ފްރޮންޓޮން ކިންގް މުބާރާތާއި، ބްރެޒިލްގައި އޮންނަ އިޗްކޮޗިއާރާ ޕްރޯ އާއި ޗިލީގައި އޮންނަ އަންޓޮފަގަސްޓާ ބޮޑީބޯޑިން ފެސްޓިވަލް އެވެ.
