ރާއްޖޭގައި ޗާޓާޑް ޕްރޮފެޝަނަލް އެކައުންޓެންޓުން ތަމްރީނު ކުރުމަށްޓަކައި 200 ސްކޮލާޝިޕް ހުޅުވާލައިފި އެވެ.
މިއަދު އިއުލާނު ކުރި 200 ސްކޮލާޝިޕް ބަހާލާފައި ވަނީ ދެ ކެޓަގަރީއަކަށެވެ. އެއީ 150 އޯޕަން ކެޓަގަރީ އަދި 50 ޕަބްލިކް ކެޓަގަރީ އެވެ. މި ސްކޮލާޝިޕްތައް ދެނީ އޭސީސީއޭގެ ސްކިލްސް އަދި ޕްރޮފެޝަނަލް ލެވެލްއަށާއި، ސީމާގެ މެނޭޖްމަންޓް އަދި ސްޓްރެޓީޖިކް ލެވެލް އަށެވެ.
މި ސްކޮލާޝިޕްތައް ދެނީ، ސީމާ އަދި އޭސީސީއޭގެ ފަހު ދެ ލެވެލްގެ އިމްތިހާނު ފީ އާއި އެނޫންވެސް އެހެނިހެން ހަރަދުތައް ހިމެނޭ ގޮތަށެވެ.
މިއަދު މި ހުޅުވާލި 200 ފުރުސަތަކީ ވަރަށް މުހިންމު ފުރުސަތުތަކެއް ކަމަށާއި މިއީ ޗާޓާޑް އެކައުންޓެންޓުންނަށް ވުމަށްޓަކައި އެއާއި ގުޅުން ހުރި ހުރިހާ ހަރަދެއް ދޭ ގޮތަށް ހުޅުވާލި ސްކޮލަޝިޕްގެ ފުރުސަތުތައް ކަމަށް މި ސްކޮލަޝިޕް އިއުލާން ކުރުމާއި ގުޅިގެން ހަޔާ އެޑިޔުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވި އެވެ.
"އަޅުގަނޑު އުއްމީދު ކުރަނީ ވީހާވެސް ގިނަ ޒުވާނުން މި ފުރުސަތު ބޭނުން ހިއްޕަވާނެ ކަމަށް. ވަކިން ހާއްސަކޮށް މި ދާއިރާގައި ވަޒީފާ އަދާކުރަމުންދާ ޒުވާނުންނާއި މި ދާއިރާއިން ތައުލީމު ހާސިލު ކުރަމުންދާ ޒުވާނުން މިކަމަށް ކުރިމަތިލައްވާނެ ކަމަށް އަޅުގަނޑު އުއްމީދު ކުރަން" މިނިސްޓަރު ވިދާޅުވި އެވެ.
މިނިސްޓަރު އިތުރަށް ވިދާޅުވީ 50 ފުރުސަތު ޕަބްލިކް ސެކްޓަރަށް ރިޒާވް ކުރުމުގެ ބޭނުމަކީ ދައުލަތުގެ މާލީ ކަންކަމުގައި މަސައްކަތް ކުރާ ޒުވާނުންގެ ފަންނީ ގާބިލުކަން އިތުރުކުރުން ކަމަށެވެ.
"އަޅުގަނޑުމެންގެ މާލީ ބަޔާންތަކާއި އަޅުގަނޑުމެން މިނެރޭ އޮޑިޓް ރިޕޯޓުތަކަކީ އާންމުންނަށް އޮޅުން ނާރާނެފަދަ ގޮތަކަށް ކުށެއް ނެތް ގޮތަކަށް ކަން ކުރެވޭނެފަދަ ބަޔަކު ލިޔާ ރިޕޯޓުތަކަކަށް ވާންޖެހޭ." ފަންނީ، ގާބިލު، ތައުލީމީ ޒުވާނުން މިކަންކަމުގައި އުޅެގެން މެނުވީ މަސައްކަތްތައް ރަނގަޅު ފެންވަރެއްގައި ނުކުރެވޭނެ ކަން ފާހަގަކުރައްވާ މިނިސްޓަރު ވިދާޅުވި އެވެ.
މިއީ، މި ދާއިރާއިން ސްކޮލާޝިޕް ދިނުމަށް ހުޅުވާލި ދެވަނަ ފަހަރެވެ. ނިމިދިޔަ އަހަރުވެސް ވަނީ މި ދާއިރާއިން ކިޔެވުމަށް 173 ސްކޮލާޝިޕް ދީފަ އެވެ. މިދިޔަ އަހަރުގެ ސްކޮލާޝިޕްތައް ކާމިޔާބުކުރި ކެންޑިޑޭޓުންގެ ތެރެއިން 100 އަށްވުރެން ގިނަ ކެންޑިޑޭޓުން ވަނީ ސްކޮލާޝިޕްގައި ކިޔެވުން ފަށާފަ އެވެ.
މި ސްކޮލާޝިޕްތަކަށް ހޮވޭ ދަރިވަރުން ބައިވެރިވާ ޕްރޮގްރާމް ފުރިހަމަ ކުރުމަށް ގިނަވެގެން ދެ އަހަރު ދުވަސް ދޭއިރު، ދެ އަހަރުގެ މުއްދަތަށް ރާއްޖޭގައި ހިދުމަތް ކުރުމަށް ބޮންޑުކުރާނެ އެވެ.
