ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ އިންތިހާބީ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހު، މޯލްޑިވްސް ޑިވެލޮޕްމެންޓު އެލަޔަންސް (އެމްޑީއޭ) ގެ ލީޑަރު އަދި ރައްޔިތުންގެ މަޖިލީހުގެ ދ. މީދޫ ދާއިރާގެ މެމްބަރު އަހްމަދު ސިޔާމް މުހައްމަދު (ސަން ސިޔާމް) އާ ބައްދަލުކުރައްވައިފި އެވެ.
މި ބައްދަލުކުރެއްވުން އޮތީ މިއަދު މެންދުރުގެ ވަގުތެއްގައި ރައީސް އޮފީހުގަ އެވެ. އަދި، މި ބައްދަލުކުރެއްވުމަށް ފަހު ސަން ސިޔާމް ރައީސް އޮފީހުން ނުކުމެ ކާރަށް އެރިތަން "އަދަދު" ގެ ނޫސްވެރިންނަށް ވަނީ ފެނިފަ އެވެ. ޝިޔާމް ނުކުންނެވިއިރު އަރިހުގައި ހުންނެވީ ރައީސް އޮފީހުގެ ޗީފް އޮފް ސްޓާފް އަލީ ޒާހިރު އެވެ.
ރައީސް އޮފީހުގައި މި ބައްދަލުވުން ކުރިއަށްދިޔަކަން ދެ ބޭފުޅުންގެ ވެސް ގާތް ބައެއް ބޭފުޅުން ވަނީ "އަދަދު" އަށް ކަށަވަރުކޮށްދީފަ އެވެ. ނަމަވެސް، މި ބައްދަލުވުމުގައި މަޝްވަރާ ކުރެއްވި ކަންކަމާ ގުޅޭގޮތުން އެއްވެސް މައުލޫމާތެއް ހިއްސާކޮށްފައެއް ނުވެ އެވެ.
ބޮޑަށް ބެލެވޭ ގޮތުގައި މިއީ ސެޕްޓެމްބަރުގައި އޮންނަ ރިޔާސީ އިންތިހާބާ މެދު ގޮތްތަކެއް ކަނޑައެޅުމަށް ބޭއްވި ބައްދަލުވުމެކެވެ. ދެ ޕާޓީން ވެސް އިންތިހާބުގައި ވާދަކުރައްވާނީ މި ދެ ބޭފުޅުން ކަމަށް ވާއިރު ކޯލިޝަނެއް ހެދުމުގެ މަޝްވަރާތައް ކުރިއަށްދާނެ ކަމަށް ބެލެވެ އެވެ.
މީގެ ކުރިން އެމްޑީޕީން އެމްޑީއޭއާއެކު ސިޔާސީ އެއްވެސް މަސައްކަތެއް ކޮށްފައެއް ނުވެ އެވެ. މީގެ ކުރިން އެމްޑީއޭއިން ސިޔާސީ ހަރަކާތްތައް ކުރިއަށްގެންދިޔައީ އެމްޑީޕީއާ ވާދަވެރި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާއެކު އެވެ. އަދި، އެމްޑީއޭއަކީ ކުރީގެ ރައީސް އަބްދުﷲ ޔާމީންގެ ސަރުކާރުގައި ކޯލިޝަން ޕާޓްނަރެކެވެ.
ރައީސް ސޯލިހުގެ ވިސްނުންފުޅު ހުންނެވީ ކޯލިޝަނަކާ އެކު އިންތިހާބާ ކުރިމަތިލުމަށެވެ. މި ވަގުތު އެމަނިކުފާނުގެ ސަރުކާރާ އެކު ތިބި އެއްވެސް ޕާޓީއަކުން 2023 ގެ އިންތިހާބަށް ކޯލިޝަނެއް ހެދުމާ ގުޅޭ މަޝްވަރާތައް ކޮށްފައި ނުވެ އެވެ. ނަމަވެސް، ކުރިއަށް އޮތް ދުވަސްތަކުގައި މިކަމުގެ ސައްލާތައް ކުރެވި ވަކި ގޮތެއް ނިންމާނެ ކަމަށް ބެލެވެ އެވެ.
ވެރިކަމުގެ ނިޒާމާ މެދު އުފެދިފައިވާ ބަހުސްގައި ބަރުލަމާނީ ނިޒާމަށް ތާއީދު ނުކުރައްވާ ކަމަށާއި ވިސްނުން ހުރީ މިހާރު އޮތް ރިޔާސީ ނިޒާމުގައި ވެރިކަން ހިންގުމަށް ކަމަށް މީގެކުރިން ސިޔާމް ވިދާޅުވެފައިވެ އެވެ. އަދި، އިންތިހާބުގައު ވާދަ ކުރައްވާނީ ކޯލިޝަނަކާ ނުލައި ކަމުގެ އިޝާރާތެއް ވެސް އޭނާ ދެއްވާފައިވެ އެވެ.
