ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީ (ޖޭޕީ) އިން ނަގާނެ ސްޓޭންޑެއް ކަނޑައެޅުން އެޖެންޑާ ކޮށްފައިވާ އެ ޕާޓީގެ ކޮންގްރެސް ފެބްރުއަރީ މަހުގެ ފަހު ހަފުތާގައި ބޭއްވުމަށް ނިންމައިފި އެވެ.
ޖޭޕީގެ ކޮންގްރެސް ބޭއްވުމަށް އެންމެ ފުރަތަމަ ނިންމީ މިދިޔަ އަހަރުގެ ޑިސެމްބަރު މަހަށެވެ. ނަމަވެސް، މި އަހަރުގެ ކުރީކޮޅުގެ ތާރީހެއްގައި ބާއްވާ ގޮތަށް ކޮންގްރެސް ފަސްކުރަން ނިންމި އެވެ.
ކޮންގްރެސް ބާއްވާނެ ތާރީހަކާ ގުޅޭ ގޮތުން ސުވާލު ކުރުމުން އެ ޕާޓީގެ ތަރުޖަމާނު އަލީ ސޯލިހު ވިދާޅުވީ، ފެބްރުއަރީ މަހުގެ ކުރީކޮޅު ބާއްވާ ކައުންސިލް ބައްދަލުވުމެއްގައި ތާރީހަކާ މެދު ގޮތެއް ނިންމާނެ ކަމަށެވެ.
"ހަމަ ޔަގީނުން ވެސް އެ ތާރީހު ވާނީ ފެބްރުއަރީ މަހުގެ ފަހު ހަފުތާގެ ހިމެނޭ ތާރީހަކަށް،" ސަރުކާރު ކޯލިޝަންގައި ހިމެނޭ ޖޭޕީގެ ސްލޮޓްގައި ޓްރާންސްޕޯޓް މިނިސްޓްރީގެ ސްޓޭޓް މިިނިސްޓަރުގެ މަގާމުގައި ވެސް ހުންނެވި އަލީ ސޯލިހު ވިދާޅުވި އެވެ.
ޖުމްހޫރީ ޕާޓީގެ ވިސްނުމަކީ ރިޔާސީ އިންތިހާބުގައި ކެންޑިޑޭޓަކު ނެރުން ކަމަށް މީގެ ކުރިން ވެސް އެ ޕާޓީގެ އިސް ބޭފުޅުން ގެންދެވީ ވިދާޅުވަމުންނެވެ. އެ ކަމާ މެދު ގޮތެއް ނިންމުން އޮންނާނީ ޕާޓީގެ ކޮންގްރެސް އިންނެވެ.
"އަޅުގަނޑުމެންގެ ސްޓޭންޑަކީ ކެންޑިޑޭޓަކު ނެރުން، [އެކަމަކު] އެ ބާރު އޮތީ ގައުމީ ޖަލްސާއިން ނިންމަން، ވާދަކުރާނީ ކިހިނެއްތޯ، ގިނިކަންޏާ ނުކުންނާނީތޯ، އެހެން ބަޔަކާއެކު ކޯލިޝަން ހަދާނެތޯ، އެހެން ޕާޓީއެއްގެ ކެންޑިޑޭޓެއްގެ ފަހަތަށް އަރާނީތޯ ވެސް ނިންމާނީ ކައުންސިލުން،" އަލީ ސޯލިހު ވެސް ވިދާޅުވެފައިވެ އެވެ.
ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު ގާސިމް އިބްރާހީމް ވެސް މީގެ ކުރިން ވިދާޅުވެފައިވަނީ ސިޔާސީ ޕާޓީއެއް އުފައްދަނީ ވެރިކަމަށް އައުމަށް ނުވަތަ ވެރިކަމުގައި ހިއްސާއެއް އޮތުމަށް މަސައްކަތް ކުރުމަށެވެ.
ރިޔާސީ އިންތިހާބުގައި ވާދަކުރުމަށް ކައުންސިލްގެ ނިންމުމެއް އޮތް އިރު، އެއާ މެދު ކޮންގްރެސްއިން އަދި ގޮތެއް ނިންމަން ޖެހެ އެވެ. އެ ނިންމުން އަދި ބަދަލުނުވާނެ ކަމަށް ދަންނަވަން ދަތި ކަމަށް ވެސް ގާސިމް ކުރިން ވިދާޅުވެފައިވެ އެވެ.
2018 ވަނަ އަހަރު ރިޔާސީ އިންތިހާބު އޮތް އިރު، ގާސިމް ހިމެނޭހެން އޭރުގެ އިދިކޮޅު ހުރިހާ ލީޑަރުން ތިބީ ޖަލު ހުކުމެއްގައި ނުވަތަ ހުކުމެއް ނެތި ބަންދުގަ އެވެ. އެހެންވެ ގާސިމްގެ ޖޭޕީގެ އިތުރަށް އެމްއާރުއެމާއި އަދާލަތު ޕާޓީން ތާއީދުކުރީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހަށެވެ.
ރައީސް ސޯލިހު ބޭނުންފުޅުވަނީ ކުރިއަށް އޮތް ރިޔާސީ އިންތިހާބުގައި ވެސް މިހާރު ކޯލިޝަންގައި ހިމެނޭ ޕާޓީތަކާއެކު ކޯލިޝަން އުފައްދައިގެން ވާދަކުރުމަށެވެ. ނަމަވެސް، ޖޭޕީގެ އިތުރުން އަދާލަތު ޕާޓީއާއި އެމްއާރުއެމުން ވެސް އެކަމުގައި އަދި ވަކި ގޮތެއް ނުނިންމަ އެވެ.
ޖޭޕީން މީގެ ކުރިން 2008 އަދި 2013 ގެ ރިޔާސީ އިންތިހާބުގައި ވެސް ވާދަކުރި އެވެ. އެ ދެ އަހަރު ވެސް އެ ޕާޓީގެ ޓިކެޓުގައި ވާދަކުރެއްވީ ގާސިމެވެ. 2008 ވަނަ އަހަރު ގާސިމަށް ލިބުނީ ވޯޓުލީ މީހުންގެ 15 ޕަސެންޓެވެ. 2013 ގައި ގާސިމަށް ލިބުނީ ވޯޓުލީ މީހުންގެ 24 ޕަސެންޓެވެ.
ނަމަވެސް، އެ ދެ ފަހަރު ވެސް އިންތިހާބު ކާމިޔާބުކޮށްފައިވަނީ ގާސިމްގެ ތާއީދު އޮތް ކެންޑިޑޭޓެވެ. ދެވަނަ ބުރުގައި ގާސިމް ތާއީދުކުރެއްވީ، ފުރަތަމަ ބުރުގައި ދެވަނައަށް އެންމެ ގިނަ ވޯޓު ލިބޭ ކެންޑިޑޭޓެވެ. ރައީސް މުހައްމަދު ނަޝީދާއި، ރައީސް އަބްދުﷲ ޔާމީން ވެސް ސަރުކާރު އެކުލަވާލީ ޖޭޕީއަށް ހިއްސާއެއްދޭ ގޮތަށެވެ.
