އެމްޑީޕީ ރިޔާސީ ޕްރައިމަރީ އިންތިހާބުގެ ސައްހަކަމާމެދު ސުވަލު އުފެދޭ އެއްވެސް ކަމެއް ވޯޓުލުމުގެ ތެރޭގައި ހިނގާނެ ކަމަށް ގަބޫލު ނުކުރައްވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ޕްރައިމަރީގައި ވޯޓު ލެއްވުމަށް އިސްކަންދަރު ސްކޫލަށް ވަޑައިގެން ނޫސްވެރިންނާ ވާހަކަ ދައްކަވަމުން ރައީސް ސޯލިހު ވިދާޅުވީ އެމްޑީޕީގެ އެތެރޭގެ އެއްވެސް އިންތިހާބެއްގައި ވޯޓު އޮޅުވާލަން އުޅުން ފަދަ އެއްވެސް ކަމެއް މިހާތަނަށް ހިނގާފައެއް ނެތް ކަމަށާއި ޕާޓީގެ އެތެރޭގެ އިންތިޒާމުތައް ހަމަޖައްސާފައި ހުރީ އެއަށްވުރެ ރަނގަޅަށް ކަމަށެވެ.
"އެމްޑީޕީގެ އެތެރޭގެ އިންތިހާބުތައް ބާއްވަމުންދާގޮތް ވަރަށް ސާފުކޮށް ތި ހުރިހާ ބޭފުޅުންނަށް ފެނިވަޑައިގަންނަވާނެ. މީގެ ކުރިން ވެސް އެކަންކަން ކޮށްފައި ތިއްބެވި ބޭފުޅުން އެ ތިއްބެވީ އެކަން ހިންގަން. އެހެންކަމުން އެކަހަލަ އެއްވެސް ކަމެއް މި ވޯޓު ތެރޭގައި ހިނގާނެ ކަމަށް އަޅުގަނޑު ގަބޫލެއް ނުކުރަން،" ވޯޓުގެ ސައްހަކަމާމެދު ފުރިހަމަ ޔަގީންކަން އޮތްކަން ފާހަގަކުރައްވަމުން ރައީސް ވިދާޅުވި އެވެ.
އިންތިހާބުގެ ސައްހަކަމާމެދު ރައީސް ސޯލިހަށް ސުވާލު ނުއުފެދޭއިރު، ވާދަވެރި ކެންޑިޑޭޓް ރައީސް މުހައްމަދު ނަޝީދުގެ ކެމްޕޭން ޓީމުން ވަނީ ޕްރައިމަރީ އޮޅުވާލުމަށް ގިނަ މަސައްކަތްތަކެއް ކުރަން ރާވާފައިވާ ކަމަށް ތުހުމަތުކޮށްފަ އެވެ.
ރައީސް ނަޝީދުގެ ފަޅިން ކޮށްފައިވާ ތުހުމަތުތަކަށް ރައްދު ދެއްވައި، އެމްޑީޕީގެ ޕްރައިމަރީ ކޮމިޓީގެ މުގައްރިރު އިބްރާހިމް ވަހީދު ވިދާޅުވީ ފޮއްޓަށް ވޯޓުލެވޭނެ ފަރާތްތައް ކަނޑައަޅާނީ އެ ފޮއްޓަކާ ހަވާލުވެ ހުންނަ ވެރިޔާ ކަމަށާއި ވޯޓުލާންވާ ގޮތް އެއްވެސް ކެންޑިޑޭޓަކަށް ނުނިންމޭނެ ކަމަށެވެ.
ރައީސް އިތުރަށް ވިދާޅުވީ ވަރަށް ތަފާތު ބޮޑުކޮށް މި އިންތިހާބު ކާމިޔާބު ކުރެވޭނެ ކަމަށާއި ކުރެއްވި ގިނަ މަސައްކަތްތަކުގެ ނަތީޖާއެއްގެ ގޮތުގައި އިންތިހާބު ކާމިޔާބު ކުރެވޭ މަންޒަރު ފެނިވަޑައިގަންނަވާ ކަމަށެވެ.
"މި ކުރާ މަސައްކަތަކީ ޑިފަރެންސް ބޮޑު ކުރުމަށް ކުރާ މަސައްކަތެއް. އަޅުގަނޑު އުއްމީދު ކުރަނީ ޑަބަލް ޑިޖިޓުގެ ތަފާތެއް، މީގައި، ނަތީޖާ ނިކުންނަ އިރުގައި ފެންނާނެ ކަމަށް،" ރައީސް ވިދާޅުވި އެވެ.
ނޫސްވެރިންގެ އިތުރު ސުވާލުތަކަށް ޖަވާބު ދެއްވަމުން ރައީސް ވިދާޅުވީ ޕްރައިމަރީއަށްފަހު ރިޔާސީ އިންތިހާބަށް ނިކުންނައިރު ރަނިންމޭޓަކީ ކާކުތޯ ކަނޑައެޅުމަށް ޕާޓީތެރޭގައި މަޝްވަރާ ކުރާނެ ކަމަށެވެ.
ރައީސް ސޯލިހު ވިދާޅުވީ ރިޔާސީ އިންތިހާބަކަށް ކުރިމަތިލާއިން ވޯޓު އިތުރު ކުރުމަށް މަސައްކަތް ކުރާނެ ކަމަށާއި އެގޮތުން މަސްވެރިންނާއި ފަތުރުވެރިކަމުގެ ދާއިރާގައި މަސައްކަތްކުރާ މީހުންނާއި ސިއްހީ އަދި ތައުލީމީ ދާއިރާގައި މަސައްކަތް ކުރާ މީހުންގެ ވިސްނުން ހުރި ގޮތް ބަލައި، ތާއީދު ބޭނުންވާ ކަމަށެވެ. މީގެ އިތުރުން އެހެން ސިޔާސީ ޕާޓީތަކުގެ މެންބަރުންގެ ތާއީދު ހޯދަން ވެސް މަސައްކަތް ކުރަން ޖެހޭ ކަމަށް ވެސް ރައީސް ވިދާޅުވި އެވެ.
މިއަދު މުޅި ރާއްޖޭގައި ބާއްވާ އެމްޑީޕީގެ ރިޔާސީ ޕްރައިމަރީގައި 57،257 މީހުންނަށް ވޯޓުލުމުގެ ހައްގު ލިބެ އެވެ. އަދި މުޅި ރާއްޖޭގައި 243 ވޯޓު ފޮށި ވަނީ ބަހައްޓައިފަ އެވެ. މިއީ ސިޔާސީ ޕާޓީއަކުން ބާއްވާ އެތެރޭގެ އެންމެ ބޮޑު އިންތިހާބެވެ.
