ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ރިޔާސީ ޕްރައިމަރީގެ ވޯޓުލުން ނިމުމާ އެކު މާޒީ އެކަހެރިކޮށް އެކުގައި ރިޔާސީ އިންތިހާބު ކާމިޔާބު ކުރުމަށް މަސައްކަތް ކުރުމަށް އެ ޕާޓީގެ މެމްބަރުންގެ އަރިހުން ރައީސް އިބްރާހިމް މުހައްމަދު ސޯލިހު އަނެއްކާ ވެސް އެދިވަޑައިގެންފި އެވެ.
އެމްޑީޕީގެ ދެވަނަ ސަރުކާރުގެ ރައީސް އާ ދެކޮޅަށް މި ޕްރައިމަރީގައި ނުކުންނަވާ ހުންނެވީ އެ ޕާޓީގެ ފުރަތަމަ ސަރުކާރުގައި ރައީސްކަން ކުރެއްވި ރައީސް މުހައްމަދު ނަޝީދެވެ. އެމަނިކުފާނު ހުންނެވީ މަޖިލިސް ރައީސްގެ މަގާމުގަ އެވެ. މިއީ ދައުލަތުގެ ދެ ބާރެއްގެ ވެރިޔަކު ޕާޓީއެއްގެ ޕްރައިމަރީގައި ވާދަކުރައްވާ ފުރަތަމަ ފަހަރެވެ.
ގާތްގަނޑަކަށް އެއް މަސް ދުވަހުގެ ކެމްޕޭނަކަށް ފަހު މާދަމާ ވޯޓުލާއިރު ދެ ފެކްޝަނަކަށް ޕާޓީ އޮތީ ބެހިފަ އެވެ. ދެ ރައީސުންގެ ފެކްޝަންތަކުގެ މެދުގައި ހޫނު ބަހުގެ ހަމަލާތަކެއް ބަދަލުކޮށް ބޮޑެތި ތުހުމަތުތަކެއް އެއް ބަޔަކު އަނެއް ބަޔަކަށް ވަނީ ކޮށްފަ އެވެ.
ކެމްޕޭން ނިންމާލުމަށް ހުޅުމާލޭގައި ބޭއްވި އެއްވުމުގައި ރައީސް ވަނީ ޕްރައިމަރީއަށް ފަހު ޕާޓީގެ އަމާޒުތައް ބައްޓަން ކުރަންވީ ގޮތަކާ ގުޅޭގޮތުން ވާހަކަފުޅު ދައްކަވާފަ އެވެ.
"[ކުރަންވީ ކަމަކީ] މި މަސައްކަތް ނިމުމާ އެކު މާޒީ އެކަހެރިކޮށް އެކީގައި މަސަސއްކަތް ކުރަން ނުކުތުން. އެކުގައި ރިޔާސީ އިންތިހާބު ކާމިޔާބުކުރަން އެކައްޗެއްގެ ގޮތުގައި މަސައްކަތް ފެށުން. އެކަން ކުރެވިއްޖެނަމަ ބޮޑުތަނުން އެމްޑީޕީން ކާމިޔާބުކުރާނެ،" ރައީސް ވިދާޅުވި އެވެ.
ވޯޓުލާއިރު އެމްޑީޕީގެ މެމްބަރުންގެ މީގެކުރިން ކުރި ތަޖުރިބާތައް ހަނދާނުގައި ބަހައްޓަން ޖެހޭ ކަމަށް ވެސް އެމަނިކުފާނު ވިދާޅުވި އެވެ. މި ކެމްޕޭނުގެ ތެރެއިން އެމަނިކުފާނުގެ އެ ވާހަކަތައް ތަކުރާރު ކުރެއްވި އެވެ.
"2013 އިން ފެށިގެން 2018 އާ ދޭތެރޭ މުޅި ރާއްޖެ ތަހައްމަލު ކުރި ބިރުވެރިކަމާ މެދު ވިސްނަވާ. މިއަދު ހަމަޖެހިގެން މި ތިބެވެނީ ބަޔަކު މަސައްކަތްތަކެއް ކޮށްގެން،" ރައީސް ވިދާޅުވި އެވެ.
އިދިކޮޅާއި އެތެރެއިން އުނދަގޫ ކުރިމަތިކުރުވި. އެކަންކަމާ ދޭތެރޭ ވިސްނުންތެރިކަމާ އެކު ގޮތް ނިންމުމުން މި ހިސާބަށް އާދެވުނީ. ދެވަނަ ފަހަރަށް އެކަހަލަ ދަތި އުނދަގުލެއް ކުރިމަތިވިޔަ ނުދޭނަން،
ކެމްޕޭނުގެ ތެރެއިން ކުރި ދަތުރުތަކުން އިންތިހާބުގެ ނަތީޖާ ސާފުކޮށް ފެންނަ ކަމަށާއި ހުރިހާ ރައްޔިތުން ވެސް ތިބީ ތަރައްގީއައިގެން ކުރިއަށްދާން ތައްޔާރަށް ކަމަށް އެމަނިކުފާނު ވިދާޅުވި އެވެ.
"ކޮންމެ ރަށަކުން ވެސް ފެންނަނީ ތަރައްގީއައިގެން ކުރިއަށްދާން ބޭނުންވާތަން. މަސައްކަތްތައް ނިންމާލަން އެދެމުންދަނީ. އެ މަސައްކަތްތަކަށް ކުދި ބަދަލުތައް ގެންނަން އެދެނީ. ކޮންމެ ރަށެއްގައި ވެސް ބޭނުންވަނީ މިކަން ނުހުއްޓި ގޮސް ނިންމާލަން. އެހެންވެ މި ދެންނެވީ ނަތީޖާ ވަރަށް ސާފޭ،" ރައީސް ސޯލިހުގެ ކެމްޕޭނުގެ ފަހު ރެލީގައި އެމަނިކުފާނު ވިދާޅުވި އެވެ.
މާދަމާ ބާއްވާ ރިޔާސީ ޕްރައިމަރީގައި އެމްޑީޕީގެ 57،000 މެމްބަރުންނަށް ވޯޓުލެވޭނެ އެވެ. މިއީ މިފަހުން ޕާޓީގެ އެތެރޭގެ އިންތިހާބެއް މިހާ ވާދަވެރިކޮށް ކުރިއަށްދާ ފުރަތަމަ ފަހަރެވެ. އަދި ޕާޓީއެއްގެ ކުރިމަގާމެދު ވޯޓަކުން މިހާބޮޑު ނިންމުމެއް ނިންމާ މަންޒަރު ފެންނަ ފުރަތަމަ ފަހަރެވެ.
