ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ރިޔާސީ ޕްރައިމަރީގެ ކެމްޕޭނުގެ ތެރެއިން ބޭއްވި އެންމެ ފަހު ޖަލްސާގައި ރައީސް އިބްރާހިމް މުހައްމަދު ސޯލިހު އެ ޕާޓީއަށް ދެ ވަނަ ދައުރެއް ހޯދޭނެ ކަމަށް ދެކެވަޑައިގަންނަވާ ސަބަބުތައް ހާމަކުރައްވައިފި އެވެ.
އައްޑޫ ސިޓީ ހިިތަދޫގައި ގިނަ އަދަދެއްގެ އެމްޑީޕީ މެމްބަރުންނާއެކު ބޭއްވި ބައްދަލުވުމެއްގައި ވާހަކަފުޅު ދައްކަވަމުން އެމަނިކުފާނު ވަނީ ކެމްޕެއިނުގައި ކުރެއްވި ދަތުރުފުޅުތަކުން ޕްރައިމަރީގެ ނަތީޖާ ސާފުވެފައިވާ ކަމަށް ވިދާޅުވެފަ އެވެ.
"މީގެ 30، 40 އަހަރު ނުކުރެވޭ މަސައްކަތް މިދިޔަ ހަތަރު އަހަރު ދުވަހު މިދަނީ ކުރަމުން. މި ވާހަކަ ދައްކަނީ އަޅުގަނޑާއި އަޅުގަނޑުގެ ޓީމުންނެއް ނޫން. އެ ވާހަކަ ދައްކަމުން ދަނީ ރާއްޖޭގެ ރައްޔިތުން. ކޮންމެ ރަށަކުން ވެސް ބުނަމުން ދަނީ މިއިން ޒަމާނަކު ނާންނަ ތަރައްގީ އެބަ އަންނަ ކަމަށް،" ރައީސް ސޯލިހު ވިދާޅުވި އެވެ.
ކޯލިޝަނަކާ އެކު ހަތަރު އަހަރު ފުރިހަމަކޮށް ފަސް ވަނަ އަހަރެއް ރައީސް ހޭދަކުރައްވަމުންދާއިރު އެމަނިކުފާނު ވަނީ މާޒީން ދައްކާ ހަގީގަތަކީ ރިޔާސީ އިންތިހާބު ޔަގީން ކުރެވެން އޮތީ އެ މަގު ކަމަށް ވިދާޅުވެފަ އެވެ. އެހެން ނަމަވެސް، އެމްޑީޕީ އެކަނި ވެރިކަމެއް ކުރާތަން ބޭނުންވާ ކަމަށް ވެސް އެމަނިކުފާނު ވިދާޅުވި އެވެ.
ކޯލިޝަނެއްގެ ތެރެއިން މަސައްކަތްކުރާއިރު ދޫތަކެއް ދޭން ޖެހޭ. އެކަމަކު ލިބޭ އެތި މާ ބޮޑު. މެނިފެސްޓޯ ބަރާބަރަށް ތަންފީޒު ކުރެވެމުން އެބަދޭ،" ރައީސް ވިދާޅުވި އެވެ.
އެމްޑީޕީގެ މެމްބަރުންނަށް މިއަދު ވެސް އޮތީ ދެ ގޮތެއް ކަމަށާއި އެއީ މި މެނިފެސްޓޯއާ އެކު ކުރިއަށް ދިޔުން ނުވަތަ އަލުން އެނބުރި މަގުމައްޗަށް ނުކުތުން ކަމަށް އެމަނިކުފާނު ވިދާޅުވި އެވެ.
މިރޭގެ ޖަލްސާގައި ރައީސް ސޯލިހު ވާހަކަފުޅު ދައްކަވަނީ. ދެވަނަ ދައުރެއްގެ މުހިންމުކަން ފާހަގަކުރެއްވި --- އެމްޑީޕީ ކުރިއަށް ކެމްޕޭން ޓީމް
"ހުއްޓި ތިބި ހިސާބަކީ މި ކަންކަމާއިގެން ކުރިއަށްދާނީތޯ، ނޫނީ ދާގޮތަށް ގޮސް މަގުމަތިވާނެތޯ ނިންމާ ހިސާބު. މި އިންތިހާބު ޕްރައިމަރީ ނިންމާ ގޮތަށް މިކަން ބުރަވެގެންދާނީ. ސަރުކާރެއް އެކުލަވާލަން ޖެހޭ ކަންކަން ވަރަށް ސާފުކޮށް ފެންނާނެ. އެ ހުރިހާ ކަމެއްގެ މައްޗަށް ވިސްނާވަޑައިގެން، އެމްޑީޕީގެ ސަރުކާރެއް އެކުލަވާލުމަށް ލިބޭ ފުރުސަތު ގެއްލުވާލުމަށް އިލްތިމާސްކުރަން،" ރައީސް މިރޭ ވިދާޅުވި އެވެ.
ކެމްޕެއިނުގެ ތެރެއިން އެމްޑީޕީގެ މެމްބަރުންގެ ހިޔާލު ހޯއްދެވި ކަމަށާއި މެމްބަރުން ތިއްބެވީ ތަރައްގީއާއެކު ކުރިއަށްދާން ކަމަށް އެމަނިކުފާނު ވިދާޅުވި އެވެ.
އައްޑޫއަށް ހާއްސަ ސަމާލުކަމެއް
ރައީސް ސޯލިހުގެ ވާހަކަފުޅު ފައްޓަވަމުން ވަނީ 2018 ގެ ކެމްޕޭނު ވެސް އަދި މިއަހަރުގެ ރިޔާސީ ޕްރައިމަރީގައި ވެސް ކެމްޕޭން ނިންމީ އައްޑޫން ކަން ފާހަގަކުރައްވާފަ އެވެ.
"އެ ދުވަހު މުޅި ރާއްޖެއަށް އަޅުގަނޑުމެން ގެންނަން ބޭނުންވި ތަރައްގީ އާއި ބަދަލުގެ މެނިފެސްޓޯ ހާމަކުރީ. އަދި އައްޑޫއަށް ގެންނަން ޖެހޭ ތަރައްގީ ހުށަހެޅީ ތިބޭފުޅުން. އެ ދުވަހު ތިބޭފުޅުން ހަވާލު ކުރި ކަންތައްތައް ބަރާބަރަށް ތި ބޭފުޅުން އެދިވަޑައިގެންނެވި ގޮތަށް ދަނީ ކުރަމުން،" ރައީސް ވިދާޅުވި އެވެ.
އެގޮތުން، އައްޑޫއަށް ހަ ބިލިއަންގެ އިނެވްސްޓުމަންޓެއް ކުރަމުންދާ ކަމަށާއި އެގޮތުން، މި ސިޓީގައި ގާއިމުކުރަން ޖެހޭ 8،000 އެނދުގެ މަސައްކަތް ކުރިއަށްދާ ކަމަށް ވެސް ވިދާޅުވި އެވެ.
"އައްޑޫގެ ތަރައްގީއަށް ހުށަހެޅި ގިނަ ކަންކަން ކުރިއަށް އެބަދޭ. ބިން އިތުރު ކުރުމަށް ކުރާ މަސައްކަތުގައި 236 ހެކްޓަރު އިތުރުކޮށް ފަސް ރިސޯޓު ހެދުމުގެ އަމަލީ މަސައްކަތް ފެށިގެން މިހާރު އެދަނީ. ހަންކެޑެ މަޝްރޫއުގެ އެންމެފަހުގެ ޕްލޭންތައް ކުރެވި އެއަށް ބޭނުންވާ ފައިސާ ހޯދުމުގެ މަސައްކަތް ދަނީ ކުރަމުން،" ރައީސް ސޯލިހު މިރޭ ވިދާޅުވި އެވެ.
މިރޭގެ ޖަލްސާގައި ބައިވެރިވި އެމްޑީޕީގެ މެމްބަރުން. އައްޑޫ ސިޓީގައި ޕްރައިމަރީގެ ފޯރި ފެންނަނީ ވަރަށް ގަދަކޮށް --- ފޮޓޯ: އެމްޑީޕީ ކުރިއަށް ކެމްޕޭން ޓީމު
ހަމައެހެންމެ، އައްޑޫގައި އޮތް ޝަންގްރިއްލާ ރިސޯޓު ނުހުޅުވި ރައްޔިތުންގެ މެދުގައި އޮތް ކަންބޮޑުވުންތަކަށް ހައްލު ހޯދުމުގެ ގޮތުން ސަރުކާރުގެ ހިއްސާ ދޫކޮށްލުމަށް އިކޮނޮމިކް ކައުންސިލުން ނިންމާފައިވާ ކަމަށް ވެސް އެމަނިކުފާނު ވިދާޅުވި އެވެ.
"ޝަންގްރިއްލާގެ ވެރިންނަށް އެކަން އަންގައިފި. އޮގަސްޓު ސެޕްޓެމްބަރުގައި ޝަންގްރިއްލާ ހުޅުވޭ ވަރަށް މަސައްކަތްކުރާނެ ކަމުގެ ޔަގީންކަން ދީފި. އެކަން ކައިރިން ބަލާނަން،" ރައީސް ވިދާޅުވި އެވެ.
އޭގެ އިތުރުން ވެސް އައްޑޫގެ ތަރައްގީއަށް ކުރަމުންދާ މަސައްކަތްތައް އެއްކޮށް ނިންމާލުމަށް ދެވަނަ ދައުރެއް އެމްޑީޕީއަށް މުހިންމުވާ ކަމަށް އެމަނިކުފާނު ވިދާޅުވި އެވެ.
