މި އަހަރުގެ ހައްޖުގެ އަޅުކަން އަދާކުރުމަށް ދުނިޔޭގެ އެކި ގައުމުތަކުން ދެ މިލިއަން މީހުން ބައިވެރިކުރުމަށް ތައްޔާރުވަމުންދާ ކަމަށް ސައުދީ އަރަބިއްޔާގެ ހައްޖާއި އުމްރާގެ ކަންތައްތަކާބެހޭ ވަޒީރު ޑރ.ތައުފީގު އައްރަބީއާ ހާމަކޮށްފި އެވެ.
ސައުދީ ސަރުކާރުން ވަނީ ހައްޖަށް މީހުން ގެންނަމުން އައި އަދަދަށް ބަދަލު ގެނައުމަށްފަހު މި އަހަރު އަލުން ކޯޓާއަށް ހުޅުވާލަން ނިންމާފަ އެވެ. އެގޮތުން މި އަހަރު ކޮވިޑުގެ ކުރިން ހައްޖުވެރިންނަށް ދިން ހައްޖު ކޯޓާ ހަމަ އެވަރަށް ދޭނެ ކަމަށް ސައުދީ ސަރުކާރުން މީގެ ކުރިން ވަނީ ހާމަކޮށްފަ އެވެ.
ސައުދީން ބުނީ ކޮވިޑްގެ ބަލިމަޑުކަމުގެ ކުރިން ވެސް ހަމަ އެ އަދަދުތަކާ އެކު މި އަހަރު ހައްޖުގެ އަޅުކަން ޕްރީފޯމް ކުރުމަށް ހައްޖުވެރިންނަށް މަރުހަބާ ކިޔާނެ ކަމަށެވެ.
މި އަހަރުގެ ހައްޖުވެރިންގެ ކަންކަމާއި ގުޅިގެން ވާހަކަ ދައްކަވަމުން ޑރ. ތައުފީގު ވިދާޅުވީ، ހައްޖާއި އުމްރާގެ ނިޒާމާ ގުޅުންހުރި އެންމެހާ އިދާރާތަކުން، ވަގުތާއި މަސައްކަތް ސަލާމަތްކުރެވޭނެ ފަދަ ގޮތަކަށް، ހިދުމަތް ފޯރުކޮށްދިނުމަށް މަސައްކަތްކުރައްވަމުން ގެންދަވާ ކަމަށެވެ.
މީގެ އިތުރުން އުމްރާގެ އަޅުކަމަށްދޭ 30 ދުވަހުގެ ވިސާގެ މުއްދަތު 90 ދުވަހަށް ވަނީ އިތުރުކޮށްފަ އެވެ. އަދި ކޮންމެ ވިސާއެއްގައި ވެސް މިހާރު އުމްރާގެ އަޅުކަން ކުރުމަށް ސައުދީއަށް އެތެރެވެވޭ ގޮތަށް ވެސް ވަނީ ހަމަޖައްސާފަ އެވެ.
ކޮވިޑާ ގުޅިގެން އެޅި ފިޔަވަޅުތަކަށް ލުއި ދިނުމަށްފަހު މިދިޔަ އަހަރު ސައުދީން ވަނީ އެއްމިލިއަން މީހުންނަށް ހައްޖު ކޯޓާ ދޫކޮށްފަ އެވެ.
މިދިޔަ އަހަރު ހައްޖުގައި ބައިވެރިވުމަށް ރާއްޖެއަށް ލިބުނީ 453 މީހުންގެ ކޯޓާއެކެވެ. އެ ކޯޓާއަށް މީހުން ހައްޖަށް ގެންދިޔައީ ހަމައެކަނި ހައްޖު ކޯޕަރޭޝަންގެ ފަރާތުންނެވެ.
މި އަހަރު ހައްޖަށްދާ މީހުންނަށް ކުރިން ދިން ކޯޓާއާ އެއްވަރަށް މީހުން ގެންދަން ނިންމާފައިވީ ނަމަވެސް ވަކިވަކި ގައުމުތަކަށް ކޯޓާ ދޭނީ ކިހާ އަދަދަކަށް ކަމެއް ސައުދީން ހާމަކޮށްފައެއް ނުވެ އެވެ.
