ސަރުކާރުން ގދ. ތިނަދޫ ތަރައްގީ ކުރަމުން މި ގެންދަނީ އެ ރަށް ސިޓީއަކަށް ބަދަލުކުރުމަށް ކަމަށާއި ސިޓީއަކަށް ބޭނުންވާ ހުރިހާ ވަސީލަތްތަކެއް އެރަށުގައި ގާއިމުކުރައްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
މި މަހު 28 ގައި ބާއްވާ އެމްޑީޕީގެ ރިޔާސީ ޕްރައިމަރީގެ ކެމްޕޭނުގައި މިއަދު ތިނަދޫއަށް ވަޑައިެގެން ރައީސް ވިދާޅުވީ މި ސަރުކާރުގެ ތަރައްގީގެ ސިޔާސަތުގައި ތިނަދޫއަކީ މުހިންމު ރަށެއް ކަމަށެވެ.
ތިނަދޫއަށް ގެނެސްދެއްވާ ތަރައްގީގެ މަޝްރޫއުތައް ތަފުސީލު ކުރައްވަމުން ރައީސް އިތުރަށް ވިދާޅުވީ ވިދާޅުވީ ތިނަދޫގައި ބައިނަލްއަގުވާމީ ކޮމާޝަލް ޕޯޓެއް ވެސް އަޅުއްވާނެ ކަމަށެވެ. އެ މަޝްރޫއުގެ ފުރަތަމަ ފިޔަވަހީގެ މަސައްކަތް މިހާރު ކުރިއަށްދާ ކަމަށް ވެސް އެމަނިކުފާނު ވިދާޅުވި އެވެ. އަދި ތިނަދޫ ކައިރީގައި ބައިނަލްއަގުވާމީ އެއާޕޯޓެއް އަޅުއްވާނެ ކަމަށް ވެސް ރައީސް ވިދާޅުވި އެވެ.
އޭގެ އިތުރުން، ތިނަދޫގައި މިހާރު ހުރި ހޮސްޕިޓަލު ތަރައްގީ ކުރުމުގެ އިތުރުން މުޅިން އަލަށް ޓާޝަރީ ހޮސްޕިޓަލެއް އެޅިގެންދާނެ ކަމަށާއި އެ މަޝްރޫއު މިހާރު އޮތީ ޓެންޑާ ސްޓޭޖުގައި ކަމަށް ވެސް ރައީސް ވިދާޅުވި އެވެ. އަދި ތިނަދޫގެ ދަރިންނަށް ރަށުގައި ތިބެގެން ރަނގަޅު ފެންވަރުގެ ތައުލީމު ހާސިލްކުރެވޭނެ އިންތިޒާމުތައް ގާއިމުކުރުމުގެ މަސައްކަތް ވެސް ސަރުކާރުން މިހާރު ކުރަމުންދާ ކަމަށް ވެސް ވިދާޅުވި އެވެ.
ތިނަދޫ އެމްޑީޕީ ޖަގަހަ ދޮށަށް އެއްވެފައިވާ އެމަނިކުފާނަށް ތާއިދުކުރާ ގިނަ ސަޕޯޓަރުންގެ ކިބައިން ފޯރި ނަންގަވާ ރައީސް އިތުރަށް ފާހަގަކުރެއްވި މަޝްރޫއުތަކުގެ ތެރޭގައި ތިނަދޫގައި ފުރަތަމަ އަޅަން ސަރުކާރުން ބުނި ހައުސިން ޔުނިޓުތައް 100 އިން 200 އަށް އިތުރުކޮށް އެ ރަށުގެ ހިއްކި ބިމުން ވަރަށް އަވަހަށް ގޯތި ދިނުން ވެސް ހިމެނިގެން ދިޔަ އެވެ.
ރައީސް އިތުރަށް ވިދާޅުވީ ދެން ތިނަދޫއަށް ބޭނުންވާ ކަންކަމާއި އާބާދީގެ އަދަދު މިއަދު ރަށު ކައުންސިލުން ހޯދުމަށް އެދިލައްވާފައިވާނެ ކަމަށެވެ.
"އިރާދަކުރެއްވިއްޔާ މި އިންތިހާބަށްފަހު ލަސްތަކެއް ނުވެ، މި ރަށް ސިޓީއަކަށް ބަދަލުވުމުގެ ރަސްމިއްޔާތުގައި ބައިވެރިވާން އަޅުގަނޑު އަންނާނަން،" ރައީސް ސޯލިހު ވިދާޅުވި އެވެ.
މަސްވެރިކަމާއި ފަތުރުވެރިކަން އެންމެ ފުޅާކޮށް ތަރައްގީކުރެވޭނެ އަތޮޅަކީ ހުވަދޫ
ތިނަދޫގައި ހުންނަވާ ރައީސް އިތުރަށް ވިދާޅުވީ ގުދުރަތީ ގޮތުން ވެސް ރާއްޖޭގައި އޮތް އެންމެ ބޮޑު އަތޮޅަކީ ގައުމީ އެންމެ ބޮޑު ދެ ސިނާއަތް ކަމަށްވާ މަސްވެރިކަމާއި ފަތުރުވެރިކަން އެންމެ ފުޅާކޮށް ތަރައްގީކުރެވޭނެ އަތޮޅު ކަމަށެވެ.
"މިހާރުވެސް މުޅި ރާއްޖޭގައި މަސްވެރިކަމުގެ އެންމެ ކުރީގައި އޮތީ ހުވަދޫ އަތޮޅު، އޭގެ ތެރެއިން ތިނަދޫއަކީ މުހިންމު ރަށެއް،" ރައީސް ވިދާޅުވި އެވެ.
އޭގެ އިތުރުން، މަސްވެރިކަމުގެ ދާއިރާއަށް މިހާރު ބޭނުންވެފައިވާ ގިނަ މަސައްކަތްތައް މިހާރު ވަނީ ފެށުމުގެ މަގުމަތީގައި ކަމަށް ވިދާޅުވެ ރައީސް ފާހަގަކުރެއްވީ މިފްކޯ އާއި އެސްޓީއޯގެ ދަށުން އިތުރުކުރަމުން ގެންދާ ކޯލްޑް ސްޓޯރޭޖްގެ ކެޕޭސިޓީ އާއި އެހެނިހެން މަސްވެރިކަމުގެ މަޝްރޫއުތަކެވެ.
ފަތުރުވެރިކަމަށް ބެލި ނަމަވެސް، އެ ދާއިރާއިން ތަރައްގީ ކުރުމަށް އެންމެ 'ފައްކާ' ރަށްތައް ހުރީ ހުވަދޫ އަތޮޅުގައި ކަމަށް ފާހަގަ ކުރައްވާ ރައީސް ވިދާޅުވީ އެ މަސައްކަތް ކުރުމަށް ބޭނުންވަނީ ވަސީލަތްތައް ފަހިކުރުން ކަމަށެވެ.
"އެހެންވެ އަޅުގަނޑުމެން މިތަނުގައި އިންޓަނޭޝަނަލް އެއާޕޯޓަކާއި، ކޮމާޝަލް ޕޯޓަކާއި، ބޭނުންވާ އަސާސީ ހިދުމަތްތަކާއި، ސިއްހީ ހިދުމަތްތައް ގާއިމުކޮށްދިނުމުގެ މަސައްކަތް ފަށައިގެން ކުރިއަށް މި ގެންދަނީ" ރައީސް ވިދާޅުވި އެވެ.
