ވޭތުވެދިޔަ ހަތަރު އަހަރުގެ ތަޖުރިބާ އަށް ފަހު ރައީސް އިބްރާހިމް މުހައްމަދު ސޯލިހަށް ދެއްވާނީ 'އޭ ޕްލަސް' ރިޕޯޓެއް ކަމަށާއި އެ މަނިކުފާނުގެ ޒައާމަތުގެ ފުވައްމުލަކު އެދޭ ތަރައްގީ ހޯދޭނެ ކަމުގެ ޔަގީންކަން އެބަ އޮތް ކަމަށް އެ ސިޓީގެ މޭޔަރު އިސްމާއިލް ރަފީގު ވިދާޅުވެއްޖެ އެވެ.
މި މަހުގެ 28 ގައި ބާއްވާ އެމްޑީޕީގެ ޕްރައިމަރީގައި ރައީސް ސޯލިހަށް ތާއިދު ކުރައްވަން ނިންމެވި ސަބަބުތައް، ފުވައްމަލަކުގައި މިރޭ ބޭއްވި ރައީސް ސޯލިހުގެ ކެމްޕެއިން ބައްދަލުވުމުގައި މޭޔަރު އިސްމާއީލް ހާމަކޮށް ދެއްވެވި އެވެ.
އޭނާ ވިދާޅުވީ ކުރިއަށް އޮތް ތަނުގައި ވެސް ރާއްޖެއަށް ހެޔޮ ބަދަލު ގެންނާނީ އެމްޑީޕީން ކަމަށާއި އެކަމަށްޓަކައި އެ ޕާޓީ ވެރިކަމުގައި އޮތުން މުހިންމު ކަމަށެވެ. އެމްޑީޕީ ވެރިކަމުގައި އޮތުމަށްޓަކައި އެހެން ފަރާތްތަކާއެކު ކޯލިޝަން ހެދޭނީ ދޫދެއްވުމުގެ ވިސްނުން ގެންގުޅުއްވާ ލީޑަރަކަށް ކަމަށާއި ރައީސް ސޯލިހުގެ ކިބައިގައި އެ ސިފަ ހުންނެވިކަން އިސްމާއީލް ފާހަގަ ކުރެއްވެވި އެވެ.
"ރާއްޖޭގެ ސިޔާސީ މަޝްރަހު މިހާރު އޮތް ގޮތުން އަޅުގަނޑުމެން އެކަންޏެއް މިކަމެއް [ރިޔާސީ އިންތިހާބު ކާމިޔާބުކުރުން] ނުވާނެ. ރައީސްކަމަށް ނުކުންނަ މީހަކު ވާން އެބަ ޖެހޭ ދޫދިނުމުގެ ވިސްނުން ގެންގުޅެން، ރައްޔިތުންގެ ބޭނުންތައް އެނގެން،" ކޯލިޝަނަކާ ނުލައި ރިޔާސީ އިންތިހާބު ކާމިޔާބު ކުރަން ދަތިވާނެ ކަމާއި ކޯލިޝަނަކާއެކު މަސައްކަތް ކުރެއްވުމުގެ ގާބިލްކަން ރައީސް ސޯލިހުގެ ހުރިކަން ފާހަގަ ކުރެއްވުމުގެ ގޮތުން އޭނާ ވިދާޅުވި އެވެ.
ފުވައްމުލަކާއި މުޅި ރާއްޖޭގެ ތަރައްގީ އަށް ރައީސް ސޯލިހު އިސްކަން ދެއްވާ ކަމަށާއި ދިވެހި ރައްޔިތެއްގެ ހައިސިއްޔަތުން ވެސް އަދި ފުވައްމަލަކު ރައްޔިތެއްގެ ހައިސިއްޔަތުން ވެސް ރައީސް ސޯލިހަށް އޭނާ ދެއްވާނީ "އޭ ޕްލަސް" އެއް ކަމަށް އިސްމާއީލް ވިދާޅުވި އެވެ.
ބޭނުންވަނީ ފުވައްމަލަކުގެ ތަރައްގީގެ ހުއްޓުމެއް ނެތި ކުރިއަށް ދިއުން ކަމަށާއި މީގެ ކުރިން ދުވަހަކު ވެސް ފެނިފައި ނެތް މިންވަރަށް މި ސަރުކާރުން ފުވައްމުލަކުގައި ތަރައްގީގެ މަޝްރޫއުތައް ހިންގަމުންދާކަން އިސްމާއީލް ފާހަގަ ކުރެއްވެވި އެވެ. އެފަދަ އެއް މަޝްރޫއެއްގެ ގޮތުގައި އޭނާ ފާހަގަ ކުރެއްވީ 18.5 ކިލޯމީޓަރު ގެ މަގު ހެދުމެވެ.
"މިގޮތަށް ވަރަށް ބައިވަރު ޕްރޮޖެކްޓް އެބަހުރި. އަޅުގަނޑު ހަމަ އިތުރަށް ފާހަގަކޮށްލަން ބޭނުންވަނީ އަޅުގަނޑުމެންނަށް ރައީސްއާއެކު މަސައްކަތް ކުރަން ފަސޭހައޭ. ފުވައްމުލަކު ރައްޔިތުން އެދޭ ކަންތައްތައް ކޮށްދެއްވާކަން. އެކަން ހަމައެކަނި އަޑު އައްސަވާފައި ދޫކޮށް ނުލައްވާކަން،" އޭނާ ވިދާޅުވި އެވެ.
ރައީސް ސޯލިހަކީ ކަންކަމުގައި ދޫދެއްވާ ބޭފުޅެއްކަން އިސްމާއީލް ފާހަގަ ކުރެއްވި އަނެއް ސަބަބަކީ ފުވައްމުލަކުގެ ތަރައްގީއާ ގުޅޭ ގޮތުން ކައުންސިލުން އެދިފައިވާ ބަދަލުތައް ގެނެސްފައިވުމެވެ.
އެފަދަ ބައެއް މަޝްރޫއުތައް އޭނާ ފާހަގަ ކުރެއްވެވި އެވެ. އެގޮތުން އެ ސިޓީގައި 200 ހައުސިން ޔުނިޓު އިމާރާތްކުރުމަށް ޕްލޭންކުރި މަޝްރޫއު 400 ހައުސިން ޔުނިޓަށް ބަދަލުކުރުމާއި ދެ ވަނަ ފޭހުގައި 10 ކިލޯމީޓަރުގެ ބަދަލުގައި 12 ކިލޯމީޓަރުގެ މަގު ހެދުމަށް ނިންމާފައި އޮތުން ފާހަގަ ކުރެއްވެވި އެވެ.
"އެހެންވެ އަޅުގަނޑަށް ޔަގީން ރައީސަކީ ފުވައްމުލަކު ތަރައްގީ އަށް އިސްކަން ދެއްވާ ބޭފުޅެއްކަން. އަދި ހަމަ ރާއްޖޭގެ ހުރިހާ ރަށެއްގެ ތަރައްގީއަށް ވެސް އިސްކަން ދެއްވާ ބޭފުޅެއްކަން. ހަމައެކަނި މާލެއަށް ނޫންކަން. އެކަމަށްޓަކައި ރައީސްއާއެކު މުހުރީ. އިރާދަ ކުރެއްވިއްޔާ ފުވައްމަލަކު އަޅުގަނޑުމެން ރައީސްއަށް މެޖޯރިޓީ ހޯދައިދޭނަން،" އޭނާ ވިދާޅުވި އެވެ.
ރައީސް ސޯލިހުގެ ޒައާމަތުގައި 2023 އާއެކު ފުވައްމުލަކު ބޭނުންވާ ތަރައްގީ ހޯދޭނެ ކަމަށާއި އެ ސިޓީގެ ތަރައްގީ އަށް އިތުރު އެތައް މަޝްރޫއެއް ރޭވިފައި އެބަ ހުރިކަން އިސްމާއީލް ފާހަގަ ކުރެއްވެވި އެވެ. އަދި ޕްރައިމަރީގައި ރައީސް ސޯލިހަށް ދޭ ވޯޓަކީ 2023 ގެ ރިޔާސީ އިންތިހާބު އެމްޑީޕީއަށް ކާމިޔާބު ކުރުމަށް ދެވޭ ވޯޓެއް ކަމަށް ވެސް އޭނާ ވިދާޅުވި އެވެ.
