މި އަހަރު ބާއްވާ ރިޔާސީ އިންތިހާބު ކާމިޔާބުނުކޮށް އޭގެ ފަހުން އޮންނަ ރައްޔިތުން މަޖިލީހުގެ އިންތިހާބާއި ލޯކަލް ކައުންސިލް އިންތިހާބު ކާމިޔާބު ނުކުރެވޭނެ ކަމަށާއި، އެމްޑީޕީގެ ރިޔާސީ ޕްރައިމަރީގައި މެންބަރުން ހިޔާރުކުރަންވީ ޕާޓީއަށް ވެރިކަމަށް އާދެވޭނެ ގޮތް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވި އެވެ.
އެމްޑީޕީގެ ރިޔާސީ ޕްރައިމަރީ ކެމްޕެއިނުގައި ފުވައްމުލަކު ސިޓީގެ މާދަނޑު ޖަގަހަ ހުޅުއްވައިދެއްވުމަށްފަހު ވާހަކަދައްކަވަމުން ރައީސް ސޯލިހު ވިދާޅުވީ ބައެއް ބޭފުޅުންގެ ވިސްނުން މިހާރުވެސް 2023 ގެ ބަދަލުގައި ހުރީ 2024 ވަނަ އަހަރު ބާއްވާ މަޖިލިސް އިންތިހާބަށް ކަމަށެވެ. ނަމަވެސް އެ އިންތިހާބާއި އޭގެ ފަހުން ބާއްވާ ލޯކަލް ކައުންސިލް އިންތިހާބު ވެސް ކާމިޔާބުކުރެވޭނީ މި އަހަރުގެ ރިޔާސީ އިންތިހާބު ކާމިޔާބުކޮށް ވެރިކަމުގައި ތިބެގެން ކަމަށް ރައީސް ވިދާޅުވި އެވެ.
"ވެރިކަމުގައި ތިބެގެން ނޫނިއްޔާ ރައްޔިތުން މަޖިލީހެއްވެސް [ލޯކަލް ކައުންސިލް އިންތިހާބެއްވެސް] ނެތް ކާމިޔާބުކުރެވިފައެއް،" ރައީސް ވިދާޅުވި އެވެ.
ރައީސް މިސާލު ޖައްސަވަމުން ވިދާޅުވީ 2013 ވަނަ އަހަރު ޕީޕީއެމް އިން މަޖިލީހުގެ މެޖޯރިޓީ ހޯދި ގޮތަށް އެންމެ ފަހުގެ މަޖިލިސް އިންތިހާބު އެމްޑީޕީއިންވެސް ކާމިޔާބުކުރި ސަބަބަކީ ވެރިކަމުގައި އެ ޕާޓީތަކުން އޮތް އޮތުން ކަމަށެވެ.
އޭގެ އިތުރުން، ރައީސް ވިދާޅުވީ މި ޕްރައިމަރީގައި އެމްޑީޕީގެ މެންބަރުންގެ ކުރިމަތީގައި އޮތް ސުވާލަކީ ރާއްޖޭގެ ސިޓީތަކާއި ރަށްތަކުގައި ކުރިއަށްދާ ތަރައްގީގެ މަސައްކަތްތައް ހުއްޓާލާނީތޯ ނުވަތަ އެކަންތައްތައް ކުރިއަށް ގެންދާނީތޯ އުފެދޭ ސުވާލު ކަމަށެވެ.
ރައީސް އިޝާރާތް ކުރެއްވީ އެމަނިކުފާނުގެ ކެމްޕެއިނުގައި ތަކުރާރުކޮށް ވިދާޅުވަމުން ގެންދަވާ 'ވިނިން ފޯމިއުލާގެ' އަށެވެ. އެގޮތުން ގިނަ ޕާޓީތަކާއެކު ރިޔާސީ އިންތިހާބު ކާމިޔާބު ކުރެވޭނެ ކެންޑިޑޭޓަކީ އެމަނިކުފާނު ކަމަށް މީގެ ކުރިން ވެސް ވަނީ ވިދާޅުވެފަ އެވެ.
