ރާއްޖޭގެ މަޝްހޫރު ފިލްމު ޕުރޮޑަކްޝަން ހައުސް، ޑާކް ރެއިން އެންޓަޓެއިންމަންޓުގެ އާ ފިލްމު "ބީވީމާ" ގެ ޓިކެޓު އޮލިމްޕަހުގައި މިއަދު ވިއްކަން ފަށައިފި އެވެ.
ޑާކް ރެއިން އެންޓަޓެއިންމަންޓުގެ ބީވީމާ އަކީ ރާއްޖޭގެ މަޝްހޫރު ލަވަކިޔުންތެރިޔާ މަރިޔަމް އަޝްފާ ފުރަތަމަ ފަހަރަށް ބޮޑު ސްކްރީނުން ފެނިގެންދާނެ ފިލްމެވެ. އަޝްފާގެ އިތުރުން އެ ފިލްމުގެ ތަރިންގެ ތެރޭގައި އިސްމާއިލް ރަޝީދު (ކޮޕީ އިއްސެ) އާއި އައިމިނަތު ރަޝްފާ (އާޝާ) ގެ އިތުރުން ފިލްމީ ދާއިރާއަށް އަލަށް ތައާރަފުވާ، އާދަމް ޒިދާން (ނާނަ) ހިމެނެ އެވެ.
އަހުމަދު ޒަރީރު ލިޔެ، އައިޝަތު ފުއާދު ތައުފީގާއި މުހައްމަދު އަލީ (މޮގާ) ޕްރޮޑިއުސް ކޮށްފައިވާ ފިލްމު ޕްރިމިއާ ކުރާ ރޭގެ ޓިކެޓެއް އުޅެނީ 150ރ. އަށެވެ. އެހެން ރޭތަކުގެ ޓިކެޓު 100ރ. ހުރި އިރު، މިހާރު ވެސް ގިނަ އަދަދެއްގެ ޓިކެޓު ވިކެމުންދާ ކަމަށް ޑާކްރެއިންގެ ވެރިޔާ، މޮގާ ބުންޏެވެ.
އޭނާ ބުނީ ޓިކެޓު ވިއްކަމުން ދަނީ މީގެ ކުރިން ވެސް ޑާކްރެއިންއިން ޓިކެޓު ވިއްކަމުން އައި އަގުގައި ކަމަށެވެ.
"2014 ގައި ވެސް އަޅުގަނޑުމެން ވިއްކަމުން ދިޔަ އަގުގައި މިހާރުވެސް ވިއްކަމުން މިދަނީ، ދެ ޝޯއެއް މިހާރުވެސް އެއްކޮށް ބުކް ކޮށްފައި ހުރީ، އެކަމަކު ޓިކެޓު ބައްލަވައިގަތީމަ އެ ސްލޮޓު ޔަގީން ވާނީ،" މޮގާ ބުންޏެވެ.
އޭނާ ބުނީ އެ ފިލްމަކީ ލޯބީގެ ފިލްމެއް ކަމަށާއި ފިލްމާ މެދު އެއްޗެއް ބުނަން ދޫކޮށްލާނީ ބެލުންތެރިންނަށް ކަމަށެވެ.
"އަޅުގަނޑަށް ވަރަށް ޔަގީން މި ފިލްމު ބަލާފައި ހަމަ ކަމުދާނެކަން، އެއްޗެއް ބުނަން ދޫކޮށްލާނީ ބެލުންތެރިންނަށް،" މީގެ ކުރިންވެސް ކާމިޔާބު އެތައް ފިލްމެއް ބެލުންތެރިންނާ ހަމައަށް ގެނެސްދީފައިވާ ޕްރޮޑިއުސަރު ބުންޏެވެ.
ބީވީމާގެ ޓިކެޓު މިއަދު ވިއްކަން ފެށިއިރު، އެ ފިލްމުގެ މަސައްކަތް ނިމި މިއަދާ ހަމައަށް ބެލުންތެރިންނާ ހަމައަށް ނުގެނެސްދެވި އޮތީ މަރާމާތަށް އޮލިމްޕަސް ބަންދުކޮށްފައި ހުރުމާ ގުޅިގެންނެވެ.
