ކުރީގެ ރައީސް އަބްދުﷲ ޔާމީނާ އެކު ކުރާނެ އެއްވެސް މަސައްކަތެއް ނޯންނާނެ ކަމަށް ވިދާޅުވެ ރައީސް އިބްރާހިމް މުހައްމަދު ސޯލިހު އެމަނިކުފާނުގެ ވާދަވެރިޔާ ރައީސް މުހައްމަދު ނަޝީދަށް މިރޭ ރައްދު ދެއްވައިފި އެވެ.
ރިޔާސީ ޕްރައިމަރީގެ ކެމްޕޭން ފޯރިއާ އެކު ރާއްޖޭގެ އެކި ކަންކޮޅުތަކުގައި ކުރަމުންދާއިރު ނަޝީދު ވަނީ ދާދި ފަހުން ބޭއްވި ނޫސްވެރިންގެ ބައްދަލުވުމެއްގައި ޔާމީންއަކީ ވަރަށް ގާބިލު ބޭފުޅެއް ކަމަށާއި އޮތް ހަމައެކަނި ހިޔާލު ތަފާތުވުމަކީ "އިންޑިއާ އައުޓް" ކަމަށް ވިދާޅުވެ ޔާމީނަށް ވަރަށް ބޮޑަށް ތައުރީފު ކުރައްވާފަ އެވެ.
ޔާމީނަކީ އިންޓަލެކްޗުއަލް އަދި ތައުލީމީ ބޭފުޅެއް ކަމަށް ވިދާޅުވެ ރައީސް އިބްރާހިމް މުހައްމަދު ސޯލިހާ މެދު އެގޮތަށް ދެންނެވެން ނޯންނާނެ ކަމަށް ނަޝީދު ވިދާޅުވި އެވެ. ނަޝީދު އެހެން ވިދާޅުވުމުން އެމްޑީޕީގެ ބައެއް ބޭފުޅުންގެ ފާޑުކިޔުން ވަނީ އަމާޒުވެފަ އެވެ.
މިރޭ ގިނަ އަދަދެއްގެ ސަޕޯޓަރުންނާ އެކު އާޓިފިޝަލް ބީޗުގައި ބޭއްވި އެއްވުމުގައި ރައީސް ސޯލިހު ވަނީ އެކަމަށް ރައްދު ދެއްވާފަ އެވެ.
"ނުކުރެވޭނެ އަދި ކުރަން ހެޔޮނުވާ ކަންކަން ހުންނާނެ. ރައީސް ޔާމީން އަޅުގަނޑަށް އޯކޭއެއް ނޫން. ޔާމީނާ އެކު ކުރާނެ އެއްވެސް މަސައްކަތެއް ނޯންނާނެ،" އެމަނިކުފާނު ވިދާޅުވި އެވެ.
އާޓިފިޝަލް ބީޗުގައި ކުރިއަށްދާ ރައީސް ސޯލިހުގެ ކެމްޕޭން ޖަލްސާ. -- ފޮޓޯ: އަބްދުﷲ އިޔާން/ އަދަދު
އާޓިފިޝަލް ބީޗުގައި ކުރިއަށްދާ ރައީސް ސޯލިހުގެ ކެމްޕޭން ޖަލްސާ. -- ފޮޓޯ: އަބްދުﷲ އިޔާން/ އަދަދު
މިރޭގެ ޖަލްސާގައި ވެސް ރައީސް ވަނީ ދެވަނަ ދައުރެއް އެމްޑީޕީއަށް ހޯދުމުގެ މުހިންމު ކަމަށް ފާހަގަކުރައްވައި އެމަނިކުފާނުގެ ސަރުކާރުން ކުރިއަށް ގެންގޮސްފައިވާ މަޝްރޫއުތަކުގެ ތަފްސީލުތައް ހިއްސާކުރައްވާފަ އެވެ. އެގޮތުން، ފަސް އަހަރު ތެރޭ އެންމެ ގިނަ މަޝްރޫއުއެއް ހިންގި ސަރުކާރަކީ އެމަނިކުފާނުގެ ސަރުކާރު ކަމަށް ވިދާޅުވި އެވެ.
"ރާއްޖޭގައި އޮތް އެންމެ ބޮޑު ސިޔާސީ ޕާޓީއަށް ފުރުސަތު ގެއްލިއްޖެނަމަ ކަން ދިމާވާ ގޮތް އަޅުގަނޑުމެން ދެކެފިން. ދައުލަތުގެ ބަޖެޓުން ހަރަދުކުރާނީ ތަރައްގީގެ މަޝްރޫއުތަކަށްތޯ ނުވަތަ ޕެޕާ ސްޕްރޭ އާއި ކަރަންޓު މުގުރުތޯ ނިންމާނީ ތި ބޭފުޅުން،" އެމަނިކުފާނު ވިދާޅުވި އެވެ.
އަދި، މިއީ އެމްޑީޕީއަށް ތާރީހީ ވަގުތު ކޮޅެއް ކަމަށާއި އެއީ، މިއީ އެ ޕާޓީއަށް ވެރިކަމުގައި ދެވަނަ ދައުރަކަށް ދިޔުމަށް ލިބޭ ފުރަތަމަ ފުރުސަތަށް ވާތީ ކަމަށް އެމަނިކުފާނު ވިދާޅުވި އެވެ.
"އަޅުގަނޑާ އެކު ތިޔަ ބޭފުޅުން މި ފުރުސަތުގެ ބޭނުން ހިއްޕަވާ. އަޅުގަނޑު މި ހުރީ ތައްޔާރަށް. ތަފާތު ބޮޑު ތާއިދަކާ އެކު މި ޕްރައިމަރީ އަޅުގަނޑު ކާމިޔާބު ކުރާނަން. އެކަމާ އެއްވެސް ޝައްކެއް ނެތް،" ރައީސް ވިދާޅުވި އެވެ.
ޔާމީނަށް ތައުރީފްކޮށް ނަޝީދު ވާހަކަ ދެއްކެވިއިރު އެމްޑީޕީގެ ޕްރައިމަރީގެ ކެމްޕެއިނަށް ރަށްރަށަށް ވަޑައިގަތުމުން ޕީޕީއެމްގެ މެންބަރުން ދެއްވާ ތަރުހީބަށް ވެސް އެމަނިކުފާނު ޝުކުރު އަދާކުރެއްވި އެވެ. އެހެން ނަމަވެސް، ޔާމީން ވެރިކަމުގައި ހުންނެވި ދައުރުގައި އެމަނިކުފާނަށް އަމާޒުކޮށް ނަޝީދު ވަރަށް ބޮޑަށް ފާޑުވިދާޅުވި އެވެ.
ޖެނުއަރީ 28، ގައި ބާއްވާ ރިޔާސީ ޕްރައިމަރީއަކީ ސިޔާސީ ޕާޓީއަކުން ބާއްވާ އެންމެ މުހިންމު އެތެރޭގެ އިންތިހާބެވެ. ރައީސްކަން ކުރިން ކުރެއްވި ބޭފުޅަކާއި މިހާރުގެ ރައީސުލްޖުމްހޫރިއްޔާ ވާދަ ކުރައްވާ އިންތިހާބުގައި އެމްޑީޕީގެ 57،000 އަށް ވުރެ ގިނަ މެމްބަރުންނަށް ވޯޓު ލެވޭނެ އެވެ.
