ރައީސުލްޖުމްހޫރިއްޔާކަމުގެ މަގާމަށް ގެނައީ މުޅި ރާއްޖޭގެ އަގުލަބިއްޔަތުން ކަމަށާއި, ހިދުމަތް ދިނުމުގައި އެއްވެސް މީހަކު ބަކީކޮށް ނުލެވޭނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމްޑިޕީ ރިޔާސީ ޕްރައިމަރީގެ ކެމްޕޭނަށް ލާމު އަތޮޅަށް ވަޑައިގެން, ލ. ކައްދޫގައި ރައްޔިތުންނާ މުހާތަބު ކުރައްވާ ރައީސް ވިދާޅުވީ, މުޅި ރާއްޖޭގެ އަގުލަބިއްޔަތުން ވެރިކަމަށް އައިސް އެއްވެސް މީހަކު ބާކީކޮށް ނުލެވެނެ ކަމަށާއި, އެކަން ކުރަނީ ހަމަހަމަކަމާ އެކީގައި ކަމަށެވެ.
"އަޅުގަނޑު މި މަގާމަށް ގެނައީ ރައްޔިތުންގެ ވޯޓުން. ލާމު އަތޮޅު ރައްޔިތުންގެ ވޯޓުން އައްޑު އަތޮޅު ރައްޔިތުންގެ ވޯޓުން, މާލޭ ރައްޔިތުންގެ ވޯޓުން, މުޅި ރާއްޖޭގެ އަގުލަބިއްޔަތުން. އެހެންކަމުން އަޅުގަނޑަށް ހިދުމަތް ދިނުމުގައި އެއްވެސް މީހަކު ބާކީއެއް ނުކުރެވޭނެ." އެންމެނަށް ހިދުމަތް ކުރަނީ ހަމަހަމަކަމާ އެކީގައި ކަމަށާއި, ކުރިއަށް އޮތް ތަނުގައި ވެސް ކަން ކުރަމުން ގެންދާނީ އެހެންކަން ފާހަގަކުރައްވަމުން ރައީސް ވިދާޅުވި އެވެ.
ހަމަހަމަކަމުގެ ވާހަކަ ރައީސް ދައްކަވާފައި މިވަނީ, ކުދި ރަށްރަށުގައި އުޅޭ ރައްޔިތުންނަށް ހިދުމަތް ދޭން ފެށީމައި އެއީ ބޭކާރު ހަރަދަކަށްވެ, ބޭނުން ނެތް ކަމެއްގެ ގޮތުގައި ބައެއް ފަރާތްތަކުން ދެކެމުންދާތީ އެވެ. ރައީސް ވިދާޅުވި ގޮތުގައި އެއީ އެމަނިކުފާނު ގަބޫލުކުރައްވާނެ ކަމެއް ނޫނެވެ.
ރައީސް ވިދާޅުވީ ރައްޔިތުންނަށް އުފަވެރި ފާގަތި ދިރިއުޅުމެއް އުޅެވޭނީ ފުރަތަމަ ކަމަކަށް އެމީހުންނަށް ބޭނުންވާ އަސާސީ ހިދުމަތްތައް ފޯރުކޮށްދެވިގެން ކަމަށާއި, ކޮންމެ ރައްޔިތަކަށް ބޭނުންވާ އަސާސީ ހައްގުތައް ކަށަވަރުކޮށްދިނުމަކީ ގާނޫނު އަސާސީން ވެރިއަކުގެ މައްޗަށް ލާޒިމުކޮށްފައި އޮތް ކަމެއް ކަމަށެވެ
އެކަން ނުކޮށް ކުރާނެ އެހެން ކަމެއް ނޯންނާނެ ވެރިކަމުގައި ހުންނަ މީހާ.
ރައްޔިތުންނަށް ބޭނުންވާ އަސާސީ ހިދުމަތްތައް ފޯރުކޮށްދިނުމަށް އިސްކަން ދިނީ އެ ހިދުމަތް ކަށަވަރުނުކޮށް ކުރާނެ އެހެން ކަމެއް ނޯންނާނެތީ ކަމަށް ރައީސް ވިދާޅުވި އވެެ.
އިތުރަށް ވާހަކަދައްކަވަމުން ރައީސް ވިދާޅުވީ މާލެއަށް ތޮށްޖެހިފައިވާ ތޮށްޖެހުން ހައްލު ކުރުމަށްޓަކައި ރާއްޖޭގެ އެކި ސަރަހައްދުތަކުގައި އެބަ ވަކި ކަންތައްތަކެއް ކުރަން ޖެހޭ ކަމަށެވެ. އެގޮތުން ސިއްހީ ހިދުމަތް ގާތުން ލިބުމާއި, ދަރިންނަށް ތައުލީމު ފޯރުކޮށްދިނުމާއި, ފަސޭހައިން ދިރިއުޅެވޭނެ ގޮތްތައް ހޯދަން ޖެހެ ކަމަށެވެ.
"މިއީ އެރަށްރަށަށް ގެނެވޭ ތަރައްގީއާއެކު މާލެއަށް ލުޔެއް ލިބެން އޮތް ގޮތް. އެހެންވެ އެކި ސަރަހައްދުތަކާއި ޓާޝަރީ ހޮސްޕިޓަލްތަކާއި ސްކޫލުތައް ތަރައްގީކޮށް, ދަތުރުފަތުރުގެ ނިޒާމު މުހިންމުވަނީ" ރައީސް ވިދާޅުވި އެވެ.
ރައީސް ސޯލިހު މިރޭ ލާމު އަތޮޅަށް ވަޑައިގެންނެވިއިރު, ލާމުގައި ގުޅިފައިވާ ރަށްތަކެއްގެ އެމްޑީޕީ މެންބަރުން ވަނީ ރައީސަށް މަރުހަބާ ދެންނެވުމަށް ކައްދުއަށް އެއްވެފަ އެވެ. ލާމުން ރައީސް ސޯލިހަށް ބޮޑު ތަރުހީބެއް ފެންނަން އޮތްއިރު, އެމަނިކުފާނު ވަނީ ބޮޑުތަނުން ރިޔާސީ ޕްރައިމަރީ ކާމިޔާބުކޮށް, ރިޔާސީ އިންތިހާބުވެސް ކާމިޔާބުކޮށްދެއްވާނެ ކަމުގެ ޔަގީންކަން ރައްޔިތުންނަށް އަރުވާފަ އެވެ.
އެމަނިކުފާނު ވަނީ ޕްރައިމަރީގައި ރައްޔިތުންދޭ ވޯޓަކީ ބޭކާރުވެ, ބާކީވެގެންދާ އެއްޗެއްގެ ގޮތުގައި ނުހެދުމަށް އިލްތިމާސް ކުރައްވާފަ އެވެ. އަދި މި އިންތިހާބު ބޮޑުތަނުން ކާމިޔާބު ކުރެވޭތަން ވަރަށް ސާފުކޮށް ފެންނަމުންދާ ކަމަށާއި, އެ ކާމިޔާބީގައި ލާމު އަތޮޅު އެކަހެރި ނުވުމަށް ވެސް އެދިވަޑައިގެންނެވި އެވެ.
