އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރު ރާއްޖޭގެ އުތުރުގެ އަތޮޅުތަކަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު އަވަށްޓެރި ސްރީ ލަންކާއަށް މިއަދު ފުރާވަޑައިގެންފި އެވެ.
ޖައިޝަންކަރުގެ ދަތުރުފުޅު ނިންމަވާލެއްވުމަށްފަހު މިއަދު މެންދުރުފަހު ފުރާވަޑައިގެންނެވީ ނ. މާފަރު އެއާޕޯޓުންނެވެ. މާފަރުން އެމަނިކުފާނަށް އަލްވަދާއު ވިދާޅުވީ ފޮރިން މިނިސްޓަރު އަބްދުﷲ ޝާހިދެވެ.
އެ ދަތުރުފުޅުގައި ޖައިޝަންކަރު ވަނީ އިންޑިއާ ސަރުކާރުގެ އެހީގައި ހދ. ހަނިމާދޫ އެއާޕޯޓު ތަރައްގީ ކުރުމަށް ހިންގާ މަޝްރޫއުގެ އަމަލީ މަސައްކަތް ފެށުމަށް ބޭއްވި ހާއްސަ ރަސްމިއްޔާތުގައި ބައިވެރިވެވަޑައިގެންފަ އެވެ.
އެ ރަސްމިއްޔާތުގައި ވާހަކަދައްކަވަމުން ޖަޔަޝަންކަރު ވިދާޅުވީ 2020 ވަނަ އަހަރުނެ ފެށިގެން އިންޑިއާއިން ރާއްޖެއަށް އަންނަ ފަތުރުވެރިންގެ އަދަދު ވަރަށް އިތުރު ކަމަށާއި އެކަމާ މެދު ވަރަށް ފަހުރުވެރިވާ ކަމަށެވެ.
އޭގެ އިތުރުން، އެ ދަތުރުފުޅުގެ ތެރެއިން ރާއްޖެ އާއި އިންޑިއާއާ ދެމެދު ހަތަރު އެއްބަސްވުމެއްގައި ވަނީ ސޮއިކޮށްފަ އެވެ. އެގޮތުން ޖައިޝަންކަރުގެ ދަތުރުފުޅުގައި ސޮއިކޮށްފައިވަނީ ގްރާންޓު އެހީއެއްގެ ގޮތުގައި 100 މިލިއަން ރުފިޔާ ދިނުމުގެ އެއްބަސްވުމަކާއި ގދ. ގައްދޫގައި ސްޕޯޓްސް ކޮމްޕްލެކްސްއެއް އެޅުމުގެ އެއްބަސްްވުމުގައި އަދި ދެ ކަނޑު އެމްބިއުލޭންސް ހަދިޔާ ކުރުމުގެ އެއްބަސްވުމުގަ އާއި އެމްއެމްޔޫއާއެކު އޮތް ގުޅުން ފުޅާ ކުރުމަށްވި އެއްބަސްވުމެއްގަ އެވެ.
ހަނިމާދޫގެ ރަސްމިއްޔާތަށްފަހު ޖައިޝަންކަރު ވަނީ ހއ. އުތީމުގެ އާސާރީ ސަރަހައްދަށް ޒިޔާރަތް ކުރައްވާފަ އެވެ. އަދި އިންޑިއާ ސަރުކާރުގެ އެހީގެ ދަށުން ށ. ފޯކައިދޫގައި ގާއިމުކުރި ކޮމިއުނިޓީ ސެންޓަރު ހުޅުވުމުގެ ރަސްމިއްޔާތުގައި ވެސް އެމަނިކުފާނު ބައިވެރިވެވަޑައިގެންނެވި އެވެ.
އެއީ އިންޑިއާގެ އެކްސްޓާނަލް އެފެއާޒް މިނިސްޓަރުކަމުގެ މަގާމާއި ޖައިޝަންކަރު ހަވާލުވެވަޑައިގެންނެވި ފަހުން ރާއްޖެއަށް ކުރެއްވި ހަތަރު ވަނަ ދަތުރުފުޅެވެ.
